މޯލްޑިވްސް އެއަޕޯޓްސް ކޮމްޕެނީ ލިމިޓެޓް (އެމްއޭސީއެލް) އިން މިދިޔަ އަހަރުގެ ބޯނަސްގެ ގޮތުގައި ކޮންމެ މުވައްޒަކަށް 25،000ރ. ދޭން ނިންމައިފިއެވެ.
އެ ކުންފުނިން މިއަދު ނެރުނު ސާކިއުލާގައި ބުނާ ގޮތުން، ބޯނަސްގެ ގޮތުގައި 25،000ރ. ލިބޭނީ މިދިޔަ އަހަރު އެއްކޮށް މަސައްކަތްކުރި މުވައްޒަފުންނަށް ކަމަށެވެ.
މިދިޔަ އަހަރުގެ ހަ މަސް ދުވަހު ނުވަތަ އެއަށްވުރެ ގިނަ ދުވަހު މަސައްކަތް ކޮށްފައިވާ މުވައްޒަފުންނާއި މިދިޔަ އަހަރު ވަޒީފާއިން ވަކިވެފައިވާ މުވައްޒަފުންނަށް ބޯނަސް ދޭން ނިންމައިފައި ވަނީ ވަޒީފާގައި އުޅުނު ދުވަހުގެ ނިސްބަތުން ކަމަށް އެ ސާކިއުލާގައި ބަޔާންކޮށްފައިވެއެވެ.
އަދި، ޑިސިޕްލިނަރީ ޕޮލިސީގެ ދަށުން މިދިޔަ އަހަރު ވަޒީފާއިން ވަކިކޮށްފައިވާ މުވައްޒަފުންނަށް ބޯނަސްއެއް ނުލިބޭނެ އެވެ.
މިދިޔަ އަހަރުގެ ބޯނަސް ފައިސާ، އެންމެ ލަސްވެގެން އަންނަ އާދިއްތަ ދުވަހުގެ ކުރިން މުވައްޒަފުންގެ އެކައުންޓުތަކަށް ޖަމާކުރާނެ ކަމަށް އެ ކުންފުނިން ހާމަކޮށްފައިވެއެވެ.
ދެ އަހަރުގެ މެދުކެނޑުމަކަށްފަހު މިދިޔަ އަހަރު އަހަރީ ބޯނަސްގެ ގޮތުގައި ވެސް ކޮންމެ މުވައްޒަކަށް 25،000ރ. ދީފައިވެ އެވެ.
