ދޮންކޭލަކީ ހަށިގަނޑަށް ފައިދާހުރި މޭވާއެއް ކަމަށް ވަރަށް މީހުން ކިޔައި އުޅެއެވެ. ދޮންކެޔޮ ކަނީ ހިކެން ކަމަށް ވާނަމަ، މިކަމާ ދޭތެރޭ ޑޮކްޓަރުން ދެކޭ ގޮތް ބަލާލަމާ ހިނގާށެވެ.
އެމެރިކާގެ ޑޮކްޓަރެއް ކަމަށްވާ ކާލް ބެންޑާ
އޭނާ ވިދާޅުވާ ގޮތުގައި، ދޮންކޭލަކީ ބަރުދަން ލުއިކުރުމަށްޓަކައި، ކެއުން މުހިއްމު މޭވާއެކެެވެ. ދޮންކެޔޮ ކައިގެން، ހަމަ ނޭނގި ހުއްޓާ ހިކޭ ތަން ފެންނާނެއެވެ. މީގެއިތުރުން، ގިނައިން ތަރުކާރީއާއި މޭވާ ބޭނުންކުރުމަކީ ބަރުދަން ލުއިކުރުމަށް އެހީތެރިވެދޭނެ ކަމެކެވެ. އެކަމަކު އެކަން ބިނާ ވެގެންވަނީ ދުވާލެއްގެ މައްޗަށް އެމީހެއްގެ ހަށިގަނޑުން ކެލަރީ އަނދަައިގެންދާ މިންވަރެއްގެ މައްޗަށެވެ. ކުރުކޮށް ބުނާނަމަ، ދޮންކޭލަކީ ކެއުމުގައި ބޭނުންކުރަން އެންމެ ރަނގަޅު މޭވާއެވެ. އެހެނީ، ބަރުދަން ލުއިކުރުމަަށް ކުރާ މަސައްކަތުގައި ދޮންކެޔޮ ކައިގެން ނަތީޖާ ނެރެވޭނެއެވެ.
އެމެރިކާގެ ޑޮކްޓަރެއް ކަމަށްވާ ސެޓެފަނީ ސްމޯލް
އޭނާ ވިދާޅުވާ ގޮތުގައި، ދޮންކޭލަކީ ފައިބާ ހިމެނޭ މޭވާއެއް ކަމުން ހަޖަމުކުރުމުގެ ނިޒާމްގެ މަސައްކަތްތައް ލަސްކޮށްލައެވެ. ނަތީޖާއަކީ ބަނޑު ހުސްކޮށް ހުރުމުގެ ބަދަލުގައި ބަނޑު ފުރިފައި ހުންނަ ކަމުގެ އިޙްސާސްއެއް ކުރެވުމެވެ. ދިރާސާތައް ދައްކާ ގޮތުން، ފައިބާ އެކުލެވޭ ކާނާގެ ސަބަބުން ގާތްގަނޑަކަށް، 30 އިންސައްތައާ ހަމައަށް ބަރުދަން އިތުރުވުމަށް އޮންނަ ފުރުޞަތު ކުޑަ ކޮށްދެއެވެ.
އެމެރިކާގެ ޑޮކްޓަރެއް ކަމަށްވާ މެރިއޭން ޑޮމިންގިސް
އޭނާ ވިދާޅުވާ ގޮތުގައި، ދޮންކޭލަކީ ފައިބާ އެކުލެވޭ މޭވާއެއް ކަމުން، މެދު ސައިޒުގެ ދޮންކޭލަކުން، އެވްރެޖްކޮށް 3.1 ގުރާމުގެ ފައިބާ ލިއްބައިދެއެވެ. ފައިބާއަކީ ހަޖަމުކުރުމުގެ ނިޒާމަށް ވަރަށް މުހިއްމު މާއްދާއެއް ކަމުން، ދޮންކޮޔެ ކެއުމުން ބަރުދަން އިތުރުވުމުން ދުުރުކޮށްދެއެވެ. އެހެނީ، ދޮންކެޔޮ ކައިގެން ހުންނަ ވަގުތު ބަނޑު ފުރިފައި ހުންނަކަން އިޙްސާސްކުރެވި، އެހެނިހެން ތަކެތި މާގިނައިން ކެއުމުން ދުރުކޮށްދެއެވެ.
އާޖެންޓީނާގެ ޑޮކްޓަރެއް ކަމަށްވާ މާރިއާ އެރިއެންޓީ
އޭނާ ވިދާޅުވާ ގޮތުގައި، ދޮންކޭލަކީ ކާބޯހައިޑްރޭޓްސް އެކުލެވޭ މިންވަރު ގިނަ މޭވާއެއް ކަމަށް ވިޔަސް، އޭގައި ފައިބާ އެކުލެވޭތީ، ހަޖަމުކުރުން ގިނަ ވަގުތަަށް ދެމިގެން ދެއެވެ. ނަތީޖާއަކީ ބަނޑު ފުރިފައި ހުންނަކަން އިޙްސާކުރެވި، އިތުރަށް ކާން ބޭނުންވާ މިންވަރު ދަށްކޮށްދިނުމެވެ. އެގޮތުން، ދުވާލަކު ދޮންކެޔޮ ވަކެއް ކާލުމަކީ ބަރުދަން ލުއިކޮށްދޭ ކަމެކެވެ.
މި ނޫނަސް އެހެން ޑޮކްޓަރުންވެސް ވަނީ، ދޮންކެޔޮ ކެއުމުން، ބަރުދަން ލުއިވުމަށް އެހީތެރިވެދޭނެ ކަމަށް ހާމަކުރައްވާފައެވެ.
