ޖުމްހޫރީ ޕާޓީގެ ލީޑަރު ޤާސިމް އިބްރާހީމްގެ ވެރިކަމެއްގައި ވަޒީފާ ނުލިބި ތިން މަހަށްވުރެ ގިނަ ދުވަހު ހުންނަން ނުޖެހޭނެކަމަށް އެ ޕާޓީގެ މެނިފެސްޓޯގައި ހިމަނާ އާންމުކޮށްފިއެވެ.
ޖުމްހޫރީ ޕާޓީގެ ވެބްސައިޓްގައި ވެސް މިހާރު ޝާއިއުކޮށްފައިވާ މެނިފެސްޓޯގައި ވާގޮތުން، ޤާސިމް އިބްރާހީމްގެ ވެރިކަމެއްގައި ވަޒީފާ ނުލިބި ތިން މަހަށްވުރެ ގިނަ ދުވަހު ހުންނަން ނުޖެހޭ މިންވަރަށް ވަޒީފާގެ ފުރުސަތު އިތުރު ކުރާނެއެވެ. އަންއެމްޕްލޮއިމެންޓް ރޭޓް (ވަޒީފާ ނެތް މީހުންގެ ރޭޓް) ސުން އިންސައްތައަށް ދައްކުރުމަކީވެސް ޖޭޕީގެ މެނިފެސްޓޯގައި ހިމެނޭ ވަޢުދެކެވެ. ހަމައެހެންމެ، ޤައުމީ އުފެއްދުންތެރިކަމުގެ މިންވަރު 10 އިންސައްތައަށް ވުރެ މަތީގައި ހިފެހެއްޓުމަކީވެސް ޖޭޕީގެ މެނިފެސްޓޯގައިވަނީ ހިމަނާފައެވެ.
މި މެނިފެސްޓޯގައި މައިގަނޑު 15 އަސާސެއްގެ މައްޗަށް، ނުވަ ވައުދެއް ހިމަނާފައިވާކަމަށާއި، ނަމަވެސް، މި މެނިފެސްޓޯއަށް ހިޔާލު ހުށަހެޅޭނެ ކަމަށާއި އެ ހިޔާލުތަކާ އެކު މެނިފެސްޓޯއަށް ބަދަލުގެނެވޭނެ ކަމަށް ޤާސިމް ވިދާޅުވިއެވެ.
މެނިފެސްޓޯގައި ހިމެނޭ ބައިތައް:
ދީނާއި މިނިވަންކަން ހިމާޔަތްކުރުން
-
އިސްލާމް ދީން ނޫން އެހެން ދީނަކަށް ފުރުސަތު ނުދިނުން
-
އަހަރެއްގެ ތެރޭގައި ގުރުއާން ތަފްސީރު ދިވެހި ބަހުން ޝާއިއުކުރުން
-
ހުޅުލެ އާއި އުތުރާއި ދެކުނުގައި އިސްލާމިކް ސެންޓަރު ގާއިމުުކުރުން
-
65 އަހަރުގެ 100 މީހުން ކޮންމެ އަހަރަކު ސަރުކާރުގެ ހަރަދުގައި ހައްޖަށް ގެއްދިއުން
-
ގުރުއާން ހިތުދަސްކުރާ ގައިދީންނަށް އަދަބު ލުއިކޮށްދީ، މައާފު ދިނުމުގެ އުސޫލެއް ގާއިމުކުރުން
-
ހާއްސަ އިސްލާމިކް ލައިބްރަރީއެއް ގާއިމުކުރުން
-
ފަތުވާ މަޖިލީހުގެ ދައުރު ހަރުދަނާ ކުރުން؛ އެ މަޖިލީހުގެ ލަފައަށް ސަރުކާރުގެ އިދާރާތަކުން އަމަލުކުރަން ޖެހޭ ގޮތް ހެދުން
-
ގުރުއާން ހިތުދަސް ކުރާ މީހުންނަށް ދޭ އެލަވަންސް 3000ރ. އަށް ބޮޑުކުރުން
-
ދަސްވެނިވުމުގެ ކުރިން އިސްލާމީ އަހްލާގިއްޔަތު މޮޑިއުލްއަށް ކިޔަވާ ގޮތަށް ހަމަޖެެއްސުން
-
ޝަރުއީ ލަފާ ދޭ ކޮމިޓީއެެއް އުފެެއްދުން
އަދުލުއިންސާފާއި ރައްކާތެރިކަން
-
ރާއްޖެއަށް ޑްރަގް އެތެރެކުރާ ނެޓުވޯކްތައް ހޯދައި ގާނޫނީ ފިޔަވަޅު އެޅުން
-
މަސްތުވާތަކެތީގެ ވަބާއިން ޒުވާނުން ސަލާމަތްކޮށް، ވަޒީފާގެ ފުރުސަތު ހޯދައިދިނުން
-
ޖުޑީޝިއަލް ކޯޓް ކޮމްޕްލެކްސްއެއް ގާއިމުކުރުން
-
ޝަރުއީ ދާއިރާއަށް ހާއްސަކޮށް ބޯހިޔާވަހިކަން ފޯރުކޮށްދިނުން
-
ކުށްކުރާ ކުދިން އިސްލާހުކުރަން ތިން މަރުކަޒެއް ގާއިމުކުރުން
-
ގައިދީންނަށް އާމްދަނީ ލިބޭ ގޮތް ފަހިކޮށްދިނުން
ހާރިޖީ ގުޅުންތަކުގެ ބަދަހިކަން
-
ބޭރުގެ އެއްވެސް އަސްކަރީ ބޭހެއް ރާއްޖޭގައި ގާއިމުކުރަން ފުރުސަތު ނުދިނުން
-
ރާއްޖެ އާއި ޗާގޯސްއާ ދެމެދު ކަނޑުގެ އިން ވަކިކުރުމަށް، ކަމާ ބެހޭ ބައިނަލްއަގުވާމީ ޓްރައިބިއުނަލް، އިޓްލޮސް އިން ނިންމި ނިންމުމާ ގުޅިގެން ރާއްޖޭގެ ކަނޑުން "ގެއްލުނު" ބައި ހޯދަން ސަރުކާރުގެ ފުރަތަމަ ދުވަހު މަސައްކަތް ފެށުން
-
ގައުމީ ޖާސޫސީ އިދާރާއެއް ގާއިމުކުރުން
-
ފުލުހުންނާއި ސިފައިންގެ މުސާރަ ބޮޑުކުރުން
-
ޖާސޫސީ ކަންކަމާ ބެހޭ ގާނޫނެއް ހެދުން
ދަރަނިން ނެއްޓި، އިގްތިޞާދީ ދުވެލި މެކުހަށް
-
ޝަރުތު ހަމަވާ އެންމެންނަށް ވަޒީފާ ހޯދައިދީ، ވަޒީފާ ނެތް މީހުންގެ ރޭޓް %0އަށް ގެންދިއުން
-
ގައުމުގެ އުފެއްދުންތެރިކަމުގެ މިންވަރު %10ގައި ހިފެހެއްޓުން
-
އުފެއްދުންތެރިކަމުގެ ނިސްބަތުން ބޮލަކަށް ޖެހޭ އާމްދަނީގެ މިންވަރު 18،000 ޑޮލަރުން 27،000 ޑޮލަރަށް މަތިކުރުން
-
ފަތުރުވެރިކަމުގެ ސިނާއަތުން ދައުލަތަށް ލިބޭ އާމްދަނީ 8 ބިލިއަން ޑޮލަރަށް މަތިކުރުން
-
ޔޫޒަބަލް ނުވަތަ ބޭނުންކުރެވޭ ރިޒާވް 1 ބިލިއަން ޑޮލަރަށް މަތިކުރުން
-
ފަސް އަހަރުގެ ތެރޭ ފޮރިން ޑައިރެކްޓް އިންވެސްޓްމަންޓް 15 ބިލިއަން ޑޮލަަރަށް މަތިކުރުން
-
މުދަލާއި ހިދުމަތުގެ އަގު ބޮޑުވާ ނިސްބަތް ނުވަތަ އިންފްލޭޝަން %2ގައި ހިފެހެއްޓުން
-
ދައުލަތުގެ ދަރަނި ގައުމީ އުފެއްދުންތެރިކަމުގެ ނިސްބަތުން %90 އަށް ތިރިކުރުން
-
ފަގީރުކަމުގެ މިންގަނޑު ކަނޑައަޅައި ފަގީރުންނަށް 3،000ރ. ގެ ސީދާ އެހީ ދިނުން
-
މާލީ ދާއިރާގެ ވިޔަފާރި ޒަމާނީކުރުން
-
ދަތުރުފަތުރުގެ ވިއުގަ ޒަމާނީކުރުން
-
ދައުލަތުގެ ކުންފުނިތަކުގެ ހިންގުން އިސްލާހުކުރުން
ސިނާއަތްތަކާއި ވިޔަފާރީގެ ނަފާ އާއިލާތަކުގެ ޖީބަށް
-
ދަނޑުވެރިކަމުގެ ސިނާއަތުން ފުރިހަމަ މަންފާ ލިބޭނޭހެން، ބޭނުންވާނެ އާލާތްތަކާއި ވަސީލަތްތައް ލިބޭނެ މަގު ތަނަވަސްކޮށްދީ، އުފެއްދުންތަކަށް އެކަށޭނަ ނަފާ ލިބޭނެ، ދެމެހެއްޓެނިވި ވިޔަފާރީގެ ފުރުސަތު ފަހިކޮށްދިނުން
-
ދިވެހި ކަނޑުތައް ހިމާޔަތްކޮށް، ކަނޑުތަކުގެ މުއްސަނދިކަމުގެ ހަޒާނާ އިން ދިވެހިންނަށް ހަމަހަމަކަމާ އެކު ނަފާވާނެހެން، ދެމެހެއްޓެނިވި ގޮތެއްގައި މަސްވެރިކަން ކުރެވޭނެ މަގު ތަނަވަސްކޮށްދީ، އެންމެ ފުރިހަމަ މަންފާއެއް ހޯދައިދިނުން
-
ގެސްޓްހައުސް ވިޔަފާރި ފުޅާކުރުން
-
ކުދި އަދި މެދުފަންތީގެ ވިޔަފާރި ފުޅާކުރުން؛ މީގެ ތެރޭގައި، 500 ސްމޯލް ބިޒްނަސް ލީޑަރުން އުފައްދައި 100 މިލިއަނަރުން އުފެއްދުން ހިމެނޭ
ތަރައްޤީގެ ފޮނި މީރުކަން ރާއްޖޭގެ އެކި ކަންކޮޅުތަކަށް
-
އިގްތިސޯދާއި އިޖްތިމާއީ ތަރައްގީގެ ހަތް ސަރަހައްދު ގާއިމުކުރުން
-
އިގްތިސޯދީ، އިޖުތިމާއީ އަދި އުމްރާނީ ކުރިއެރުން ހޯދުމަށް ކުރެވޭ އެންމެހާ ކަންކަމަކީ ތިމާވެއްޓާއި ރައްޓެހި މަސައްކަތްތަކަކަށް ހެދުން
-
ރާއްޖޭގެ ގުދުރަތީ ވެއްޓާއި ދިރޭތަކެތީގެ މުއްސަނދިކަމާއި ގުދުރަތީ ވަސީލަތްތަކާއި ރީތިކަން މިހާރާއި އަންނަން އޮތް ޖީލުތަކުގެ މަންފާއަށްޓަކާ ރައްކާތެރިކަމާ އެކު ފޯރުކޮށްދިނުން
ޖުމްހޫރީ ޕާޓީގެ މެނިފެސްޓޯ އެކުލަވާލެއްވުމުގައި މަސައްކަތްކުރެއްވި ބޭފުޅުން:
ޖުމްހޫރީ ޕާޓީގެ މެނިފެސްޓޯ އެކުލަވާލެއްވުމުގައި ފަންނީ ބޭފުޅުން ހިމެނިވަޑައިގަންނަވާ ކަމަށާއި، މެނިފެސްޓޯ އެކުލަވާލައްވާފައިވަނީ ތިން މަސްދުވަހުގެ މަސައްކަތުން ކަމަށާއި، އަދި މެނިފެސްޓޯ އެކުލަވާލެއްވުމުގައި އެކިއެކި ދާއިރާތަކުގައި މަސައްކަތްކުރައްވާ ފަރާތްތަކުގެ ހިޔާލާއި މައުލޫމާތު ހޯދާފައިވާ ކަމަށާއި، މީގެތެރޭގައި 200 އަށްވުގެ ގިނަ މީހުންނަށް އިންޓަވިއު ކުރެވިފައިވާ ކަމަށް ޖުމްހޫރީ ޕާޓީން ހާމަކުރައްވައެވެ.
