ދީނީއިލްމުވެރިޔާ ޑރ.އަލީ ޒާހިރު ބިން ސައީދު ޤާސިމް ކުރިއަށް އޮތް ރިޔާސީ އިންތިހާބުގައި ޕީޕީއެމް/ޕީއެންސީ ކެންޑިޑޭޓް ޑރ.މުހައްމަދު މުއިއްޒަށް ތާއީދު ކުރައްވަން ނިންމަވައިފިއެވެ.
ޑރ.އަލީ ޒާހިރު މިއަދު ކުރެއްވި ޓްވީޓެއްގައި ވިދާޅުވީ ޑރ.މުޢިއްޒު އާއި ބައްދަލުކޮށް ވެރިކަމުގެ ތަސައްވުރު ސާފު ކޮށްފިން ކަމަށެވެ.
"އެމަނިކުފާނާ މެދު އިތުބާރު އެބައޮތް. ހެޔޮވެރިކަމެއް ކޮށްދެވޭނެ ޢިލްމާއި ގާބިލުކަމާއި މަޑުމައިތިރި ރިވެތި ސިފަތައް އެބަހުރި. އަޅުގަނޑުގެ ތާއީދު ޑރ.މުޢިއްޒުއަށް. މާތްﷲ އެ މަނިކުފާނަށް ކާމިޔާބު މިންވަރު ކުރައްވާށި."
ޑރ. އަލީ ޒާހިރު ވިދާޅުވިއެވެ.
ޑރ. ޢަލީ ޒާހިރަކީ ދިވެހިންގެ ގިނަ ބަޔެއްގެ ލޯތްބާއި ތާޢީދު ލިބިވަޑައިގެން ހުންނެވި، ގިނަ ބަޔަކު ބަލައިގަންނަ މަޝްހޫރި ދީނީ ޢިލްމުވެރިއެކެވެ. އަދި މަޝްހޫރު ސަލަފް ޖަމްޢިއްޔާގެ ޙަރަކާތްތެރި މެންބަރެއްވެސް މެއެވެ.
ޑރ. އަލީ ޒާހިރަކީ މޯލްޑިވްސް ނެޝަނަލް ޔުނިވާސިޓީ (އެމްއެންޔޫ) ގެ ފެކަލްޓީ އޮފް އިސްލާމިކް ސްޓަޑީސް އާއި ފެކަލްޓީ އޮފް ޝަރީއާ އެންޑް ލޯ ގެ ޑީންކަން ކުރައްވާފައިވާ ބޭފުޅެކެވެ. ޝައިޚް ވަނީ ދިގު މުއްދަތެއްގައި އެ ޔުނިވާސިޓީގައި ކިޔަވައި ދެއްވައިފައެވެ، އަދި މިހާރުވެސް އެންއެމްޔޫގެ ޝަރީއާ ޑިޕާޓްމަންޓްގައި އަލީ ޒާހިރު ގެންދަވަނީ މަސައްކަތް ކުރައްވަމުންނެވެ.
