ހއ. ދިގުފަރު ހިއްކައި އެ އަތޮޅު އިހަވަންދުއާ ގުޅާލައި ސިނާއީ މަސައްކަތް ކޮށްދޭ ގޮތް ހަދައިދޭނެ ކަމަށް، އިދިކޮޅު ޕީޕީއެމް ކޯލިޝަންގެ ރިޔާސީ ކެންޑިޑޭޓް ޑރ. މުޙައްމަދު މުޢިއްޒު މިރޭ ވިދާޅުވެއްޖެ އެވެ.
އަންނަ މަހުގެ 9 ގައި ބާއްވާ ރިޔާސީ އިންތިހާބުގެ ކެމްޕެއިނަށް ރާއްޖޭގެ އުތުރަށް ފައްޓަވާފައިވާ ދަތުރުގައި، އިހަވަންދޫގައި ބޭއްވި ބައްދަލުވުމުގައި ޕީޕީއެމް/ޕީއެންސީ ކޯލިޝަންގެ ކެންޑިޑޭޓް ވިދާޅުވީ މި ރަށުގައި މީހުން ދިރިއުޅޭ ހިސާބުގައި ދޯނި ފައިބަރު މަސައްކަތް ކުރުމަކީ ސިއްހަތަށް ގެއްލުން ލިބޭ ކަމެއް ކަމަށާއި، ދުޅަހެޔޮ މުޖުތަމައެއް ބިނާކުރުމަށް އެކަން ބަދަލުކުރަން ޖެހުނަސް އޭގެ ހައްލު ގެންނާނެ ބިމެއް ނެތްކަމަށެވެ. އެހެންވެ، ބިމުގެ މައްސަލަ ހައްލުކުރުމަށް ދިގުފަރު ހިއްކައި ދެ ރަށް ގުޅާލައި ސިނާއީ މަސައްކަތަށް ހާއްސަކޮށްދިނުމަށް މުއިއްޒު ވައުދުވެވަޑައިގެންނެވިއެވެ.
އޭގެ އިތުރުން، ފިޝް ކަލެކްޝަން ސެންޓަރެއް ހަދައި އައިސްޕްލާންޓް ބަހައްޓައި ފަސޭހައިން ތެޔޮ ލިބޭނެ ގޮތް ހަމަޖައްސައިދޭނެ ކަމަށް ވެސް އެމަނިކުފާނު ވިދާޅުވިއެވެ.
ސިއްހީ ނިޒާމަކީ ހުރިހާ ހިސާބެއްގައި ވެސް ޔާމީން އިސްކަންދިން އެއް ދާއިރާ ކަމަށާއި މި ރަށުގެ އާބާދީ ބޮޑުއިރު، އެކަށީގެންވާ ވަރުގެ ހޮސްޕިޓަލެއް ނެތް ކަމަށެވެ. އެއްވެސް ބަޔަކު ސުވާލު އުފައްދައިގެން ނުވާނެ ކަމަށް ވިދާޅުވެ، މުއިއްޒު ވަނީ އޭނާ ވެރިކަމަށް ހޮވިއްޖެ ނަމަ ވެރިކަމުގެ ފުރަތަމަ އަހަރު އިހަވަންދޫގައި ރަނގަޅު ފެންވަރުގެ ހޮސްޕިޓަލެއް އިމާރާތް ކޮށްދޭނެ ކަމުގެ ވައުދުވެވަޑައިގެންފަ އެވެ.
މި ރަށުގެ މަގުތައް ހަދާފައި ނުވާތީ ވެސް މުއިއްޒު ކަންބޮޑުވުން ފާޅުކުރެއްވި އެވެ. ވިދާޅުވީ މަގު ހެދުމަކީ ތަރައްގީ ހާސިލްކުރަން ބޭނުންވާނަމަ ކުރަންޖެހޭ ކަމެއް ކަމަށެވެ.
"މަގު ހެދުމަކީ އަޅުގަނޑުމެންނަށް ވަރަށް ފަރިތަ ކަމެއް. އެހެންވީމާ ޔަގީން ކުރައްވާ. މި ރަށުގެ މަގުތައް އަޅުގަނޑުމެން ހަދައިދޭނެކަން."
މުޢިއްޒު ވިދާޅުވިއެވެ.
އިހަވަންދޫގައި ރަނގަޅަށް ކުނި މެނޭޖްކުރެވޭނެ ގޮތެއް ނެތް ކަމަށް މި ރަށު މީހުން ބުނާތީ ހައިރާންވެވަޑައިގެންނެވި ކަމަށް މުއިއްޒު ވިދާޅުވި އެވެ. އެއީ، ގާނޫނުން އާއްމު ހިދުމަތްތަކުގެ ތެރެއިން މަޖުބޫރު ކަމަކަށް ވިޔަސް ސަރުކާރުން މަގުފަހި ނުކޮށްދޭތީ އެކަން ކުރިއަށް ނުގެންދެވޭ ކަމަށް ވިދާޅުވި އެވެ. އެކަމަށް ވެސް މުއިއްޒު ވަނީ އުއްމީދެއް ގެނެސްދެއްވައިފަ އެވެ.
ގެދޮރު ބިނާކުރުމަކީ ކޮންމެ ރައްޔިތެއްގެ އަސާސީ ޙައްޤެއް ކަމަށާއި އެ ކަންކަމަށް ވެސް ހައްލުތަކެއް ގެނެސްދެއްވާނެ ކަމަށް މާލޭގެ މޭޔަރުކަން ވެސް ކުރައްވާ މުއިއްޒު ވިދާޅުވި އެވެ.
ކުރީގެ ރައީސް އަބްދުﷲ ޔާމީން އެންމެ އިސްކަން ދެއްވީ ޒުވާނުންނަށް ކަމަށާއި އެއީ އަބުރުވެރި ދިރިއުޅުމެއް އުޅޭ ބަޔަކަށް ހަދަންޖެހޭ ކަމަށް މުއިއްޒު މިރޭ ވިދާޅުވި އެވެ.
ރިޔާސީ ކެމްޕެއިނަށް އިހަވަންދު އަށް މުއިއްޒު ވަޑައިގަތުމުން ވަރަށް ގިނަ ބަޔަކު ނުކުމެ އޭނާ އަށް މަރުހަބާ ކިޔާފައި ވުމުން އަންގައިދެނީ، ސަރުކާރު ހިންގާ ކޯލިޝަންގެ މައި ޕާޓީ އެމްޑީޕީގެ ހަބެއް ކަމަށް ކުރިން ބުނަމުން އައި ނަމަވެސް މި ވެރިކަމުގެ ފަސް އަހަރުގައި މިހާ ހިސާބަށް އައި އިރު އެކަން ބަދަލުވެ، އިދިކޮޅު ޕީޕީއެމް/ޕީއެންސީ އަށް ތާއީދު އަނބުރާލާފައިވާ ކަމަށް ވެ އެވެ.
އިހަވަންދުއަކީ ރާއްޖޭގައި މަސްވެރިކަމުގައި އެއް ހަބެވެ. މަސްވެރިކަން ކުރިއަރުވައި، އެ ދާއިރާގައި ހުރި ޝަކުވާތައް ހައްލު ކޮށްދިނުމަށް އެކަށީގެންވާ މަސައްކަތެއް ނުކުރާތީ، މުއިއްޒު ވަނީ އިހަވަންދޫގެ މަސްވެރިކަމުގެ ސިނާއަތް ކޮޅަށް ޖަހާނެ ކަމަށް ވިދާޅުވެފައެވެ.
