އަތޮޅުތަކާއި ރަށްތަކުގެ އިހްތިސާސް އެ ބަޔަކަށް ދީ، ތަރައްޤީގެ ބާރު ރައްޔިތުންގެ އަތްމައްޗަށް ދޫކޮށްލާ ޑިމޮކްރެޓުންގެ ލާމަރުކަޒީ ސިޔާސަތުގައި ހިމަނައިފިއެވެ.
ރިޔާސީ އިންތިހާބަށް މި ޕާޓީން ތައްޔާރުވަމުންދާއިރު ރޭ މިވަނީ، ޑިމޮކްރެޓުން މި އިންތިހާބަށް ތައްޔާރުކުރި މެނިފެސްޓޯ އިއުލާންކޮށްފައެވެ. މި މެނިފެސްޓޯގައި ހިމެނޭނެ އެންމެ މުހިންމު ސިޔާސަތެއް ކަމުގައި ހިމަނާފައިވަނީ އެ ޕާޓީ އުފެދުމުގެ ކުރިންވެސް ޕާޓީގެ އިސް ބޭފުޅުން އެންމެ ބޮޑަށް ވަކާލާތު ކުރުމުންއައި ލާމަރުކަޒު ކުރުމުގެ ސިޔާސަތަށެވެ.
އެ ޕާޓީގެ ސިޔާސަތުގައިވާ ގޮތުން މާލެގައި އޮތް ތޮއްޖެހުން ކުޑަކޮށް އަމިއްލަ ރަށުގައި އާއިލާއާއެކު ހިތްހަމަޖެހިގެން ދިރިއުޅުމަށް ބޭނުންވާ އެންމެ މައިގަނޑު އެއް ތަނބަކީ، މަރުކަޒީ ސަރުކާރުގެ އަތްދަށުގައި އޮތް ބާރުތައް ލާމަރުކަޒުކޮށް، އެ އަތޮޅެއްގެ ބަޔަކަށް ނުވަތަ ރަށުގެ ބަޔަކަށް ދިނުމެވެ.
އެގޮތުން، މި ސިޔާސަތުގެ ދަށުން ޑިމޮކްރެޓުންގެ ސަރުކާރެއް ތަރުތީބުވެގެން އަންނާނީ ރަށްތަކުގެ އިހުތިސާސު ކޮންމެ ރަށަކަށް ކަށަވަރުކޮށްދީ، އަތޮޅުތަކުގައި ހިމެނޭ އެންމެހާ ގުދުރަތީ ވަސީލަތްތަކުގެ މިލް އެ އަތޮޅަށް ލިބޭނެގޮތަށް ގެނެވޭ ގާނޫނީ އިސްލާހަކާއެކު އެވެ. އެ އިސްލާހާއެކު މަސައްކަތްތަކާއި، އާބާދީއާއި، ވަޒީފާތަކާއި، މުވައްޒަފުންނާއި، އިމާރާތްތަކާއި ހިންގުމުގެ ބާރުވެސް ގާނޫނުގެ ދަށުން ލާމަޒުކުރެވޭނެ ކަމަށް، މެނިފެސްޓޯގައި ބަޔާންކޮށްފައިވެއެވެ.
ލާމަރުކަޒު ކުރުމުގެ މި ބޮޑު މަސައްކަތުގެ ދަށުން މި ޕާޓީގެ ސަރުކާރެއްގައި ތިން އިކޮނޮމިކް ޒޯނެއް ގާއިމުކޮށް އެ ޒޯނުތައް ތަރައްގީކުރުމަށް ޕްލޭންތަކެއް އެކުލަވާލާ އެ ޕްލޭންތަކަށް ބޭނުންވާ ފައިސާ އެ ޒޯނުތަކުން އަމިއްލައަށް ހޯދޭނެ މަގު މައި ސަރުކާރުން ތަނަވަސްކޮށްދޭނެ ކަމަށާއި، ޑިމޮކްރެޓުންގެ މި ސިޔާސަތުގެ ދަށުން ކޮންމެ ޒޯނަކަށް، އަތޮޅަކަށް ނުވަތަ ރަށަކަށްވެސް އެ ސަރަހައްދެއްގެ ގުދުރަތީ ވަސީލަތްތަކާއި ދިރުންތަކުން ފައިދާ އާއި ނަފާވެރިކަން ހޯދުމުގެ ބާރު ލިބިގެންދާނެ ކަމަށް އެ ޕާޓީން ހާމަކުރައްވައެވެ.
އަދި، ރިޔާސީ ކެންޑިޑޭޓު ކުރިން ވައުދުވެފައިވާ ގޮތަށް މާލެ ދޫކޮށް ހިޖުރަ ކުރާ ފަރާތްތަކާށް ހާއްސަ އިނާޔަތްތަކެއް ދީ، މާލޭގެ ތޮއްޖެހުން އެއްކޮށް ނައްތާލުމަށް ޑިމޮކްރެޓުން މަސައްކަތް ކުރާނެ ކަމަށާއި، މިފަދައިން ހިޖުރަކުރާ އަދި، މިހާރުވެސް ނިސްބަތްވާ ސަރަހައްދު ނޫން ތަނެއްގައި ދިރިއުޅޭ ފަރާތްތަކަށް، އެ މީހަކު ދިރިއުޅޭ ތަނެއްގެ ކަންކަމާމެދު ބަސްބުނުމެގެ ބާރުވެސް މި ސިޔާސަތުގެ ދަށުން ލިބިގެންދާނެ ކަމަށް އެ ޕާޓީން ވިދާޅުވެއެވެ.
މިފަދައިން ރާއްޖޭގެ ހިންގުން ލާމަރުކަޒު ކުރެވޭއިރު މަރުކަޒީ ސަރުކާރުގެ މައިގަނޑު ދައުރެއްގެ ގޮތުގައި އޮންނާނީ ގައުމީ ތަރައްގީގެ ދުރުރާސްތާ ތަސައްވަރުގެ ތެރޭގައި ހިމެނޭ މަޝްރޫއުތަކުގެ ހިންގުން ލާމަރުކަޒު ކުރެވޭކަން ކަށަވަރުކޮށް ދައުލަތުގެ އެންމެހައި ވަސީލަތްތައް ބޭނުން ކުރެވެނީ އެންމެ ރަނގަޅަށް ހަމަހަމަކަމާއި އެކުކަން ކަށަވަރުކުރުމުގެ އިތުރުން މުއައްސަސާތަކާއި ސަރުކާރު ހިއްސާވާ ކުންފުނިތަކުގެ ވަސލަތްތައް ބޭނުންކުރުމުގައި ހާމަކަންބޮޑު ދެފުށްފެންނަ އިންތިޒާމެއް ގާއިމުކުރުމަށާއި، އަދި ލާމަރުކަޒުކުރުމަށްފަހު ވަކި އަތޮޅުތަކުން އަދި ހިންގާ ކޮންމެ މަޝްރޫއަކީވެސް ރާއްޖޭގެ ގުދުރަތީ ވެއްޓަށް ސަމާލުކަންދެވިގެން ރޭވި ތަންފީޒުކުރެވޭ މަޝްރޫއެއްކަން ކަށަވަރުކުރުމުގެ ޒިންމާވެސް ނަގާނީ މަރުކަޒީ ސަރުކާރުން ކަމަށް އެ ޕާޓީގެ މެނިފެސްޓޯގައިވެއެވެ.
އަދި، ލާމަރުކަޒީ މި ބަދަލާއެކު މިހާރު އޮތް މައި ސަރުކާރުގެ މިނިސްޓްރީތަކުން ކުރާ މަސައްކަތްތައްވެސް ލާމަރުކަޒުކޮށް ނިސްބަތްވާ ދާއިރާގެ ކައުންސިލާ މަތިކުރެވޭނެ ކަމަށާއި، އަދި މައި ސަރުކާރުނއިންފްރާސްޓްރަކްޗާގެ މަސައްކަތްތެއް ތަންފީޒުކުރަންޖެހޭ ހަމައެކަނި ހާލަތެއްގެ ގޮތުގައި މި ސިޔާސަތުގެ ދަށުން ބުނެފައިވަނީ އެއް ސަރަހައްދަށް ވުރެ ގިނަ ސަރަހައްދުގެ މަސްލަހަތުއެކުލެވޭ، ކަނޑައެޅޭ ގައުމީ ފެންވަރުގެ މަޝްރޫތަކުގެ މަސައްކަތް ކުރާނެ ކަމަށް ޑިމޮކްރެޓްސްއިން ހާމަކުރައްވައެވެ.
