ޖުމްހޫރީ ޕާޓީ (ޖޭޕީ) ގެ ލީޑަރު އަދި ރިޔާސީ ކެންޑިޑޭޓު ޤާސިމް އިބްރާހިމްގެ ވެރިކަމެއްގައި ޤައުމީ ކުޅުންތެރިން އިންޝުއާރ ކުރާނެ ކަމަށް އެ ޕާޓީން ވިދާޅުވެއްޖެއެވެ.
ދަރުމަވެރިންނާއި ކުޅުންތެރިންނާއި ކްލަބު ޖަމިއްޔާތަކާއި އެސޯސިއޭޝަންތަކާ ޤާސިމް ބައްދަލު ކުރެއްވުމަށް ހޮޓެލް ޖެންގައި ރޭ ބޭއްވި ރަސްމިއްޔާތެއްގައި ވަނީ ކުޅިވަރަށް ހާއްސަކޮށް މެނިފެސްޓޯގައި ހިމެނޭ ކަންކަން ތަފްސީލްކޮށްދީފައެވެ.
ޖޭޕީގެ މެނިފެސްޓޯގައި ބުނެފައި ވަނީ ރާއްޖޭގައި ގައުމީ ހައިސިއްޔަތު ލިބިފައިވާ ޤައުމީ ކުޅުންތެރިން އިންޝުއާ ކުރާނެ ކަމަށާއި، އަދި ރަސްމީ ހުރިހާ ކުޅިވަރު އެސޯސިއޭޝަނަކަށް ބިން މިލްކްވެރިކޮށް އެސޯސިއޭޝަންތަކަށް ދާއިމީ ބޯހިޔާވެހިކަން ކަށަވަރު ކޮށްދޭނެ ކަމަށެވެ.
ކުޅިވަރަށް އޮތް ލޯބި އިތުރުކޮށް ސޯޝަލް ސްޓެބިލިޓީ އިތުރު ކުރުމަށް ކުޅިވަރު މީޑިއާއަށް އިންގިލާބީ ބަދަލު ގެންނާނެ ކަމަށާއި ހުރިހާ ރަށެއްގައި ކޮމިއުނިޓީ ސެންޓަރު ގާއިމްކޮށް ބޭރު ދުނިޔޭގެ ތަހުޒީބީ ސިޓީތަކުން ލިބޭފަދަ އިޖުތިމާއީ ދުޅަހެޔޮކަން ކަށަވަރުކޮށްދޭނެ ކަމަށް ވެސް މެނިފެސްޓޯގައިވެއެވެ.
އޭގެ އިތުރުން މަދަނީ ޖަމިއްޔާތަކުގެ ހަރަކާތްތެރިކަން ކަށަވަރުކޮށް "މަދަނީ ޖަމިއްޔާ ބިލްޑިން" ގާއިމްކޮށް ދަރުމަވެރިންގެ ޙައްޤު ކަށަވަރު ކުރާނެ ކަމަށް އެ ޕާޓީގެ މެނިފެސްޓޯގައި ވެއެވެ.
ކްލަބު ޖަމިއްޔާތަކަކީ ސަސްޓެއިނަބަލް އެންޓިޓީއަކަށް ހެދުމަށްޓަކައި ކުޅިވަރު ގާނޫނު އިސްލާހުކޮށް ކްލަބުތަކަށް މާލީ އެހީތެރިކަން ފޯރުކޮށްދިނުމަށާއި، އަތޮޅުތަކާއި މާލޭގައި ހަމަހަމަ ފުރުސަތު ހޯދައިދީ ކުޅިވަރުގައި ހޯމް އެންޑް އަވޭ މޮޑެލް ތައާރަފްކުރުމަށްވެސް މެނިފެސްޓޯގައި ހިމަނާފައިވެއެވެ.
އާ ޖީލެއްގެ ކުޅުންތެރިން ބިނާ ކުރުމަށް ރާއްޖެއާއި ރާއްޖޭން ބޭރުގައި ސްޕޯޓްސް ޑިވެލޮޕްމަންޓް ޕްރޮޖެކްޓެއް ފައްޓާނެ ކަމަށް ވެސް ވަނީ ހިމަނާފައެވެ.
ޖޭޕީއިން މެނިފެސްޓޯގައި، އާ އީޖާދީ ވިސްނުމަށް މާލީ އެހީތެރިކަން ލިބޭނެ ފަންޑެއް ޤާއިމް ކުރުމަށާއި، އަދި ޤައުމު ތަމްސީލު ކުރާ ކުޅުންތެރިންނާއި އޮފިޝަލުންނަށް ޕްރޮފެޝަނަލް ބަޔަކަށް ވެވޭނެފަދަ މުސާރައެއް ކަށަވަރުކޮށްދިނުމަށްވެސް ހިމަނާފައިވެއެވެ.
