ޖުމްހޫރީ ޕާޓީ (ޖޭޕީ) ގެ ލީޑަރު އަދި ރިޔާސީ ކެންޑިޑޭޓު ޤާސިމް އިބްރާހިމްގެ ވެރިކަމެއްގައި، ކުޅިވަރު އެސޯޝިއޭޝަންތަކަށް ބިން މިލްކު ކުރެވުމާއި މަދަނީ ޖަމިއްޔާ ބިލްޑިންގ ގާއިމްކޮށް ދަރުމަވެރިންގެ ހައްގު ކަށަވަރުކުރުމަށް، އެ ޕާޓީގެ މެނިފެސްޓޯގައި ހިމަނައިފިއެވެ.
ދަރުމަވެރިންނާއި ކުޅުންތެރިންނާއި ކްލަބު ޖަމިއްޔާތަކާއި އެސޯސިއޭޝަންތަކާ ޤާސިމް ބައްދަލު ކުރެއްވުމަށް ހޮޓެލް ޖެންގައި ރޭ ބޭއްވި ރަސްމިއްޔާތެއްގައި ވަނީ ކުޅިވަރަށް ހާއްސަކޮށް މެނިފެސްޓޯގައި ހިމެނޭ ކަންކަން ތަފްސީލްކޮށްދީފައެވެ.
ދަރުމަވެރިންނާއި، ކުޅުންތެރިންނާއި، އޮފިޝަލުންނާއި، ކްލަބު ޖަމިއްޔާތަކާއި، އެސޯސިއޭޝަންތަކާއި، ސަޕޯޓަރުންނަށް ހާއްސަކޮށްގެން ޖޭޕީން ހޮޓެލް ޖެންގައި ކުރިޔަށްގެންދާ ހަފްލާގެ ތެރެއިިން pic.twitter.com/cGgOjhGtBu
— JP Secretariat (@JPSecretariat) August 15, 2023
ޖޭޕީގެ މެނިފެސްޓޯގައި ބުނެފައި ވަނީ ރާއްޖޭގައި ގައުމީ ހައިސިއްޔަތު ލިބިފައިވާ ޤައުމީ ކުޅުންތެރިން އިންޝުއާ ކުރާނެ ކަމަށާއި، އަދި ރަސްމީ ހުރިހާ ކުޅިވަރު އެސޯސިއޭޝަނަކަށް ބިން މިލްކްވެރިކޮށް އެސޯސިއޭޝަންތަކަށް ދާއިމީ ބޯހިޔާވެހިކަން ކަށަވަރު ކޮށްދޭނެ ކަމަށެވެ.
މީގެ އިތުރުން، ކުޅިވަރުގެ ޤާނޫނު އިސްލާހު ކުރުމާއި އައު އީޖާދީ ވިސްނުމަށް މާލީ އެހީތެރިކަން ފޯރުކޮށްދިނުމާއި ކުޅުންތެރިންނާއި އޮފިޝަލުންގެ މުސާރަ ކަށަވަރުކުރުންވެސް މެނިފެނސްޓޯގައި ހިމަނާފައިވެއެވެ. އަދި ރާއްޖޭގައި އޮލިމްޕިކްސް ސްޓޭޑިއަމެއް އަޅައި އާޓިސްޓުންނަށް ހާއްސަ ރަށެއް ގާއިމްކޮށްދިނުމަކީވެސް ޖޭޕީގެ ކުޅިވަރުގެ ވައުދެކެވެ.
ދަރުމަވެރިންނާއި، ކުޅުންތެރިންނާއި، އޮފިޝަލުންނާއި، ކްލަބު ޖަމިއްޔާތަކާއި، އެސޯސިއޭޝަންތަކާއި، ސަޕޯޓަރުންނަށް ހާއްސަކޮށްގެން ޖޭޕީން ހޮޓެލް ޖެންގައި ކުރިޔަށްގެންދާ ހަފްލާގެ ތެރެއިިން pic.twitter.com/TMUc5N9epO
— JP Secretariat (@JPSecretariat) August 15, 2023
އޭގެ އިތުރުން މަދަނީ ޖަމިއްޔާތަކުގެ ހަރަކާތްތެރިކަން ކަށަވަރުކޮށް "މަދަނީ ޖަމިއްޔާ ބިލްޑިން" ގާއިމްކޮށް ދަރުމަވެރިންގެ ޙައްޤު ކަށަވަރު ކުރާނެ ކަމަށް އެ ޕާޓީގެ މެނިފެސްޓޯގައި ވެއެވެ.
ކްލަބު ޖަމިއްޔާތަކަކީ ސަސްޓެއިނަބަލް އެންޓިޓީއަކަށް ހެދުމަށްޓަކައި ކުޅިވަރު ގާނޫނު އިސްލާހުކޮށް ކްލަބުތަކަށް މާލީ އެހީތެރިކަން ފޯރުކޮށްދިނުމަށާއި، އަތޮޅުތަކާއި މާލޭގައި ހަމަހަމަ ފުރުސަތު ހޯދައިދީ ކުޅިވަރުގައި ހޯމް އެންޑް އަވޭ މޮޑެލް ތައާރަފްކުރުމަށްވެސް މެނިފެސްޓޯގައި ހިމަނާފައިވެއެވެ.
އާ ޖީލެއްގެ ކުޅުންތެރިން ބިނާ ކުރުމަށް ރާއްޖެއާއި ރާއްޖޭން ބޭރުގައި ސްޕޯޓްސް ޑިވެލޮޕްމަންޓް ޕްރޮޖެކްޓެއް ފައްޓާނެ ކަމަށް ވެސް ވަނީ ހިމަނާފައެވެ.
ޖޭޕީއިން މެނިފެސްޓޯގައި، އާ އީޖާދީ ވިސްނުމަށް މާލީ އެހީތެރިކަން ލިބޭނެ ފަންޑެއް ޤާއިމް ކުރުމަށާއި، އަދި ޤައުމު ތަމްސީލު ކުރާ ކުޅުންތެރިންނާއި އޮފިޝަލުންނަށް ޕްރޮފެޝަނަލް ބަޔަކަށް ވެވޭނެފަދަ މުސާރައެއް ކަށަވަރުކޮށްދިނުމަށްވެސް ހިމަނާފައިވެއެވެ.
ކުޅިވަރު އެސޯސިއޭޝަންތަކަށް މީހުން އިންތިހާބުކުރުމުގައި އޭރަކު ރައީސަކަށް ހުންނަ މީހާގެ ނުފޫޒު އޮތްކަމަށް ބުނެ ޖޭޕީގެ ވެރިކަމެއްގައި އެސޯސިއޭޝަންތައް ކިހާވަރަކަށް މިނިވަންވާނެތޯ ބައްދަލުވުމުގެ ބައިވެރިޔަކު ކުރި ސުވާލަށް ޖަވާބު ދެއްވަމުން ޤާސިމް ވިދާޅުވީ ޤާނޫނު އަސާސީ އާއި ގާނޫނުތަކުގައި ސުވާލުގެ ޖަވާބު ދެވިފައިވާ ކަމަށެވެ. އެގޮތުން ކޮންމެ ރައްޔިތަކީ މިނިވަނެއްކަން ގާސިމް ފާހަގަކުރެއްވިއެވެ.
