ކުރިއަށް އޮތް ރިޔާސީ އިންތިހާބު ކާމިޔާބުކުރެވިއްގެނަމަ، ފ. މަގޫދޫ ފަޅުގައި ތިން ރިސޯޓު ހަދައި އެ ރިސޯޓުތަކުން ލިބޭ ކުލި އަތޮޅުގެ ހުރިހާ ރަށަކަށް ލިބޭނެ ގޮތް ހަމަޖައްސަވާނެ ކަމަށް ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވިދާޅުވެއްޖެއެވެ.
ރާއްޖޭގައި އޮތް އެންމެ މުހިންމު ސިނާއަތަކީ ފަތުރުވެރިކަމުގެ ސިނާއަތު ކަމަށާއި، ރާއްޖެ އަށް އެންމެ ބޮޑު ފައިދާއެއް ކުރަނީ ފަތުރުވެރިކަމުގެ ސިނާއަތުން ކަމަށް އޭނާ ވިދާޅުވިއެވެ.
"މިއީ މަގޫދޫ ފަޅު ތެރެއިން ހާސިލް ކުރެވޭނޭ ކަމެއް. އެހެންވެ، މަދުވެގެން ތިން ރިސޯޓު ގާއިމުކޮށްދޭނަން ބިން ހިއްކައިގެން،"
މުއިއްޒު ވިދާޅުވިއެވެ.
މުއިއްޒު މަގޫދޫއަށް ވެވަޑައިގެންނެވި ވައުދުތަކުގެ ތެރޭގައި، މަގޫދޫ ސިއްހީ މަރުކަޒު ރަނގަޅު ފެންވަރަކަށް ތަރައްގީ ކުރުމާއި، މަގޫދޫ ސްކޫލްގައި މަލްޓި ޕާޕަސް ހޯލެއް އެޅުމާއި، މަގޫދޫ ފަޅު ހިއްކައިގެން ތިން ރިސޯޓު ހެދުން ހިނެއެވެ.
މުއިއްޒު ފާހަގަ ކުރެއްވި ގޮތުގައި ރިސޯޓުތަކުން ލިބޭ ކުލި މިހާރު ވަންނަނީ ދައުލަތުގެ އާމްދަނީގެ ތެރެއަށް ކަމަށާއި، އެކަން ބަދަލުކޮށް ފ. އަތޮޅުގެ ހުރިހާ ރަށްތަކަށް އާމްދަނީ ލިބޭނެ ގޮތް ހަމަޖައްސައި ދެއްވާނެ ކަމަށް މުއިއްޒު ވަނީ ވައުދުވެވަޑައިގެންފައެވެ.
މި ޖަލްސާގައި މުއިއްޒު ވަނީ ފ. އަތޮޅުގައި ހިމެނޭ ހުރިހާ ރަށަކަށް އޭނާ ވެވަޑައިގެންނެވި ވައުދުތައް އިއުލާން ކުރައްވައިފައެވެ.
މި އަތޮޅުގެ ފަސް ރަށަށް ވެސް ބިން ހުރި މިންވަރުން ބިން ހިއްކައިގެން އަތޮޅުގެ ހުރިހާ ރަށަކަށް ހައުސިން ޔުނިޓް ނުވަތަ ރޯ ހައުސް އިމާރާތް ކުރުމުގެ މަޝްރޫއުތައް ކުރިއަށް ގެންދާނެ ކަމުގެ ޔަގީންކަން ރައްޔިތުންނަށް ދެއްވާ ކަމަށާއި، ގެދޮރު އިމާރާތް ކުރުމަށް ހައުސިން ލޯން ލިބޭނެ ގޮތް ހަމަޖައްސާނެ ކަމަށާއި، އަދި ލުއި ލޯނަކީ އިންޓަރެސްޓް ރޭޓް ފަސް އިންސައްތަ އަށް ވުރެ ބޮޑު ނޫން، ރަހުނު ނުބަހައްޓައި އިކުއިޒިޝަން ފީ ފަސޭހަ އިން ދެއްކޭ ލޯނަކަށް ހަމަޖައްސަވާނެ ކަމަށް މުއިއްޒު ވިދާޅުވިއެވެ.
މި ޖަލްސާގައި ވަނީ، އެމްޑީޕީ އުފެދުނީއްސުރެ އެ ޕާޓީގައި، ފ. މަގޫދޫން އިސްސަފުގައި ޙަރަކާތްތެރިވި އެމްޑީޕީގެ ފަހުލަވާނުންތަކެއް އިދިކޮޅު ޕީޕީއެމްއަށް ސޮއިކޮށްފައެވެ. އެ ޖަލްސާގައި ސޮއިކޮށްފައިވަނީ، އެމްޑީޕީގެ މެންބަރެއްގެ ޙައިސިއްޔަތުން، ފ. މަގޫދޫ ކައުންސިލުގެ މެންބަރުކަން ކުރައްވާފައިވާ މޫސާ ޖަލީލާއި، އެރަށު އިސްމާޢީލް މުއާޒުއާއި، ރާއިފް އަދި ޙަސަން މުއާޒެވެ.
