އިސްލާމްދީނުގައި ނަމާދުގެ މަޤާމު

ނޯޓް: މި ލިޔުމުގެ މައްޗަށް ބިނާކޮށް ދެވޭ ސުވާލެއް "ފިޔަ އޮންލައިން" ގެ ފޭސްބުކް ޕޭޖަށް އަޕްލޯޑްކުރެވޭނެއެވެ. މި ލިޔުން ކިޔާލުމަށްފަހު، ދެވިފައިވާ ސުވާލުގެ ރަނގަޅު ޖަވާބުގެ އަކުރު ލިޔާނީ އެފްބީ ޕޯސްޓްގެ ކޮމެންޓް ސެކްޝަންގައެެވެ. ޖަވާބު ދިމާކުރައްވާ ފަރާތްތަކުގެ ތެރެއިން ގުރުއަތުން ދިމާވާ ފަރާތަކަށް އިނާމެއް ލިބިވަޑައިގަންނަވާނެއެވެ.

•••✧•✧•✧•✧•✧•✧•✧•✧•••

އިސްލާމްދީން ބިނާވެފައިވަނީ މައިގަނޑު ފަސް އަޅުކަމެއްގެ މައްޗަށެވެ. ފަސް ރުކުނެއްގެ މައްޗަށެވެ. މި ފަސް ރުކުނުގެ ތެރެއިން ދެވަނަ ރުކުނަކީ ނަމާދެވެ. މާތް ނަބިއްޔާ صَلَّىٰ اللهُ عَلَيْهِ وَسَلَّمَ ޙަދީޘްކުރައްވާފައިވާ ބަސްފުޅެއްގެ މާނައިގައިވެއެވެ. "ނަމާދަކީ ދީނުގެ ތަނބެވެ."

ދީނުގެ އެހެން އަޅުކަންތަކާ ޚިލާފަށް ނަމާދަކީ އެ އަޅުކަމަކަށް އެކި ސަބަބުތަކާ ހުރެ ވަރަށް ޚާއްޞަ އަހައްމިއްޔަތުކަމެއް ދެވިފައިވާ އަޅުކަމެކެވެ. އެގޮތުން ނަމާދު ފަރުޟު ކުރެވުނު ޙާދިޘާއަކީ މީގެ މިސާލެކެވެ. الله تَعَالَىٰ ނަމާދު ފަރުޟުކުރެއްވީ އެކަލާނގެ ރަސޫލާއަށް ދެއްވި މާތް ޝަރަފުކަމުގައިވާ މިޢްރާޖުގެ ޙާދިޘާގައި، އެކަލާނގެ ޙަޟްރަތަށް އެކަލޭގެފާނު އުފުއްލެވުމަށްފަހު، އެއްވެސް މެދުވެރިއަކާނުލައި ބަސް ވަޙީކުރެއްވުމަށްފަހުއެވެ. އަދި އެ ނަމާދު ފަރުޟުކުރެއްވުމުގައި الله تَعَالَىٰގެ ރަޙްމަތުން ފަންސާސް ނަމާދުގެ ޘަވާބު އެންމެ ފަސް ނަމާދުން ލިބޭގޮތް ކަނޑައެޅުއްވިއެވެ. ނަމާދު ވެގެންދިޔައީ މިޢުރާޖުގެ މަތިވެރި ހަދިޔާއަކަށެވެ.

ނަމާދަކީ ކޮންމެ ޙާލެއްގައިވެސް ރައްކާތެރިވާން އަންގަވައިފައިވާ އަޅުކަމެކެވެ. އެ އަޅުކަން ނުކޮށް ދޫކޮށްލުމަށް އެއްވެސް އުޒުރެއް ނެތް އަޅުކަމެކެވެ. ދަތުރެއް ކުރަން ޖެހުނަސް ނަމާދު ދޫކޮށްލެވޭކަށް ނެތެވެ. ބިރުވެރިކަމެއްގައި ނުވަތަ ހަނގުރާމައެއްގެ މަތީގައިކަމުގައި ވީނަމަވެސް ނަމާދު ދޫކޮށްލެވޭކަށް ނޯވެއެވެ. ކިތަންމެ ބަލިވެ އެނދުމަތި ކުރެވިފައިވީކަމުގައި ވިޔަސް ނަމާދުތައް އޭގެ ވަގުތުގައި ކުރަން ޖެހެއެވެ. އަޅުގަނޑުމެންގެ ލޮބުވެތި ނަބިއްޔާ صَلَّىٰ اللهُ عَلَيْهِ وَسَلَّمَ ސުވަރުގެވަޑައިގަތުމުގެ ކުރިން އަޅުގަނޑުމެންގެ މި މުސްލިމު އުންމަތަށް ކުރައްވާފައިވާ އެންމެ ފަހުގެ ވަޞިއްޔަތަކީވެސް ނަމާދު ދޫކޮށް ނުލުމެވެ.

ނަމާދަކީ އަޅާގެ ޢަމަލުތަކުގެ ތެރެއިން ޤިޔާމަތް ދުވަހު އެންމެ ފުރަތަމަ ހިސާބު ބެއްލެވޭނޭ ޢަމަލެވެ. ނަބިއްޔާ صَلَّىٰ اللهُ عَلَيْهِ وَسَلَّمَ ޙަދީޘް ކުރައްވާފައިވާ ބަސްފުޅެއްގެ މާނައިގައިވެއެވެ: [ހަމަކަށަވަރުން ޤިޔާމަތް ދުވަހު އަޅާގެ ޢަމަލުތަކުގެ ތެރެއިން އެންމެ ފުރަތަމަ ޙިސާބު ބެއްލެވޭނީ ނަމާދާ މެދުގައެވެ. ފަހެ ނަމާދު ރަނގަޅުވެއްޖެނަމަ، ނަޖާވެ ކާމިޔާބު ވެއްޖެއެވެ. އަދި ނަމާދު ފަސާދަވެއްޖެނަމަ ގެއްލި ހަލާކުވެއްޖެއެވެ. ފަހެ އޭނާގެ ފަރުޟު ނަމާދުން އުނިވެއްޖެނަމަ الله تَعَالَىٰ ވަޙީކުރައްވާނެއެވެ. [ފަހެ ތިމަންއިލާހުގެ އަޅާ ސުންނަތް ނަމާދު ކޮށްފައިވޭތޯ ބަލާށެވެ. ފަރުޟު ނަމާދުން އުނިވި ތަންތަން އެ ސުންނަތް ނަމާދުތަކުން ފުރިހަމަ ކުރުމަށްޓަކައެވެ.] އެއަށްފަހު އަޅާގެ އެހެން ޢަމަލުތަކާ މެދުވެސް ކަންތައް ކުރެވޭނީ މި ގޮތަށެވެ.]

ވީމާ އަޅުގަނޑުމެން އެންމެންވެސް ނަމާދަށް ފަރުވާތެރިވެ ރައްކާތެރިވުމަށް ޚާއްޞަ ސަމާލުކަމެއް ދޭން ވާނެއެވެ. ދެދުނިޔޭގެ ފަލާޙާއި ކާމިޔާބު އޮތީ އޭރުންނެވެ.

•••✧•✧•✧•✧•✧•✧•✧•✧•••

އެޑިޓަރުގެ ނޯޓް:

މި ލިޔުމަކީ، މަދިީނާ ޔުނިވަރސިޓީގެ ދިވެހި ދަރިވަރުންކޮޅެއް، ހިންގާ ޓެލެގްރާމް ޗެނަލެެއް ކަމަށްވާ pathwaymv ގައި ޝާއިޢުކޮށްފައިވާ ލިޔުމެކެވެ. މިލިޔުން "ފިޔަ އޮންލައިން" ގައި ޝާއިޢުކޮށްފައި މިވަނީ އެ ޗެނަލްގެ ހުއްދައާއެކުގައެވެ. އެ ޗެނަލްއަކީ ދީނީ މަޢުލޫމާތު އާންމުންނަށް ފޯރުކޮށްދިނުމަށްޓަކައި، ތަފާތު ޕްރޮގްރާމްތަކެއް ހިންގުމަށް ހެދިފައިވާ ޗެނަލްއެކެވެ. pathwaymv ގެ ލިޔުންތައް ވިދާޅުވާން ބޭނުންފުުޅުވާނަމަ، ތިރީގައިވާ ލިންކުން ފެނިވަޑައިގަންނަވާނެއެވެ.

https://t.me/pathway_mv