ރަހިމުގެ ގުޅުން ދެމެހެއްޓުމަކީ އުމުރު ދިގުވެ، ރިޒުޤު ތަނަވަސްވެ، ނުބައި މަރަކުން މަރުވެދިޔުމާއި ދުރުހެލި ކުރައްވާނެ ކަމެއް ކަމަށް ހުކުރު ޚުތުބާގައި ބުނެފިއެވެ.
އަދި ރަހިމުގެ ގުޅުން ދެމެހެއްޓުމަކީ ﷲގެ ރުހިވޮޑިގަތުން ލިބޭނެ ކަމެއް ކަމަށާއި އެއީ ދުނިޔެއާއި އާހިރަތުގެ ކާމިޔާބީ ލިބޭނެ ކަމެއް ކަމަށް ބުންޏެވެ. މީގެ އިތުރުން ރަހިމުގެ ގުޅުން ދެމެހެއްޓުމަކީ ފާފަ ފުއްސަވާ ކަމެއް ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނެފައިވަނީ ރަހިމުގެ ގުޅުން ދެމެހެއްޓުމަކީ ވާޖިބެއް ކަމަށާއި ރަޙިމުގެ ގުޅުން ދެމެހެއްޓުމަކީ ސުވަރުގެ ވަނުމުގެ ސަބަބުތަކުގެ ތެރޭގައި ހިމެނޭ ކަމެއް ކަމަށް ހުތުބާގައި ބުންޏެވެ.
މައިންބަފަައިންނާއި ގާތްތިމާގެ މީހުންނަށް ހެޔޮކޮށް ހިތުމަކީ އެކަމުގެ ސަބަބުން ހެޔޮކަމާއި، ލާބައިގެ ގިނަގުނަ ދޮރުތައް ހުޅުވޭ ކަމެއް ކަމަށާއި އޭނާގެ ރިޒްޤް ތަނަވަސްކޮށް ދެއްވުމަށާއި ޢުމުރު ދިގުކޮށް ދެއްވުމަށް ލޯބި ކުރާ މީހާ އޭނާގެ ރަޙިމުގެ ގުޅުން ދެމެހެއްޓުމަށް ކީރިތި ރަސޫލާ ޞޢވ އިރުޝާދު ދެއްވާފައިވާ ކަމަށް ޚުޠުބާ ފައިވެއެވެ.
މައިންބަފައިންނަށް އިހާނާތްތެރިކޮށް ހިތާ މީހުންނަށް އާޚިރަތް ދުވަހުން ލިބޭނެ ޢަޒާބުގެ އިތުރަށް، ދުނިޔެމަތީގައިވެސް އެކަމުގެ ޢުޤޫބާތް ލިބޭނެ ކަމަށް މާތް ނަބިއްޔާ ޞޢވ އަންގަވާފައިވާ ކަމަށާއި، ފަރާތަކުގެ ތެރެއިން އަނިޔާ ކުރުމާއި، މައިންބަފައިންނަށް ނުކިޔަމަންތެރިވުމާއި، ގާތްތިމާގެ ކަމުގެ ގުޅުން ކަނޑާލުން ފިޔަވާ އެންމެހާ ފާފަތަކުގެ ޖަޒާ، ޤިޔާމަތް ދުވަހާއި ހަމައަށް މާތް ﷲ ފަސްކުރައްވަތެވެ. ނަމަވެސް މިކަންކަމުގެ ޖަޒާ މަރުވުމުގެ ކުރިން ދުނިޔެމަތީގައި ވެސް، އެމީހަކަށް އެކަލާނގެ އަވަސް ކުރައްވާނެ ކަމަށް ޚުޠުބާގައި ވެއެވެ.
މިއަދު އަޅުގަނޑުމެންގެ ތެރެއިން ފެންނަމުންދަނީ ހިތާމަވެރި މަންޒަރުތަކެއް ކަމަށާއި، މައިންބަފައިން ޢުމުރުން ދުވަސް ވުމުން އަޅާނުލާ ގެއިން ބޭރު ކޮށްލާ މަންޒަރާއި ބިކަ ޙާލުގައި ޖައްސާ މަންޒަރު ކަމަށާއި، ޢުމުރުން ދުވަސްވެފައި ތިބި މައިންބަފައިން ނަށް އެއްޗެހި ކިޔައި، އަޑުލައި، މޫނުމަތީގައި ޒުވާބުކޮށް ހަދާ މަންޒަރު ފެންނަ ކަމަށް ޚުޠުބާގައި ވެއެވެ. ނަމަވެސް މިގޮތަށް ކަންތައްތައް ކުރުމަކީ ހުއްދަވެގެންވާ ކަމެއްނޫން ކަމަށާއި މައިންބަފައިން ލޯބޯ ކޮށިވެފައިވާ ޙާލުގައި އެމީހުންގެ ފަރާތުން ދިމާވާ ކަންކަމަށް ކެތްތެރި ވާން ޖެހޭނެ ކަމަށާއި އެމީހުނާ މުޚާތަބު ކުރަން ޖެހޭނީ އިޙުތިރާމާއި އޯގާތެރި ކަމާއި އެކުގައި ކަމަށް ޚުޠުބާގައި ވެއެވެ.
މައިންބަފައިން ނަށް ހެޔޮކޮށް ހިތުމުގެ ތެރޭގައި އެމީހުން ދުނިޔެ ދޫކޮށް ދިއުމުން އެމީހުންނަށް ޓަކައި ހެޔޮ ދުޢާ ކުރުމާއި، އެބައިމީހުން ގެ ގާތްތިމާގެ މީހުންނާއި ރަޙުމަތްތެރީންނާއި އެކު ގުޅުން ބެހެއްޓުން ހިމެނޭ ކަމަށާއި މިކަމަށް ރަޙިމުގެ ގުޅުމޭ ކިޔޭ ކަމަށް ޚުޠުބާގައި ވެއެވެ.
ގާތްތިމާގެ މީހުނާ ގުޅުން ކެނޑުމަކީ ސުވަރުގެ ވަނުމުން މަރުޙޫމު ވެދާނެ ކަމެއް ކަމަށް ވެސް ކީރިތި ރަސޫލާ ޞޢވ ޙަދީޘް ކުރައްވާފައިވާ ކަމަށް ޚުޠުބާގައިވެއެވެ.
