ރާއްޖޭގެ ކިޔަވައިދޭ ހުރިހާ ސްކޫލެއްގައި އެއްދަންފަޅިއަކަށް ކިޔަވައިދޭ ގޮތް ހައްދަވައިދެއްވާނެ ކަމަށް، ޖުމްހޫރީ ޕާޓީގެ ރިޔާސީ ކެންޑިޑޭޓް ޤާސިމް އިބްރާހީމް ވިދާޅުވެއްޖެއެވެ.
" މާތްﷲގެ ވާގިފުޅާއެކު އަޅުގަނޑުގެ ވެރިކަމެއްގައި ބޭނުންވަނީ ދިވެހިރާއްޖޭގެ ހުރިހާ ރަށެއްގައިވެސް އެއްދަންފަޅިއަކަށް ކިޔަވައިދޭން. އެކަން އަޅުގަނޑު ކުރާނަން. ކުރާނަން ކުރާނަން ކިޔައިގެން އަޅުގަނޑު ނުއެއް ދަންމާނަން. އެހެންކަމުން މިރަށްވެސް ދާނެ އޭގެ ތެރޭގައި ހިމެނިގެން."
ޤާސިމް ވިދާޅުވިއެވެ.
ރާއްޖޭގެ މީހުން ދިރިއުޅޭ ހުރިހާ ރަށެއްގައިވެސް ކަންތައްކޮށްދޭނެ ކަމަށް ވިދާޅުވަމުން ޤާސިމް ވިދާޅުވީ، ނޮޅިވަރަމްގެ ބަނދަރު އަޕްގްރޭޑްކުރަން އަބަދުވެސް ޖެހޭ ހާލަތެއްގައި އެރަށުގެ ބަނދަރު އެވަގުތަކު އޮތް ހާލަތުން އެހެން ހާލަތަކަށް ދާން ބޭނުންވެއްޖެ ނަމަ އެކަން ސަރުކާރުން އެނަލައިޒްކޮށް ބެލުމަށްފަހުގައި އެކަންކޮށްދޭންވެސް ތައްޔާރަށް ހުރި ކަމަށެވެ.
މީގެ އިތުރުން ނޮޅިވަރަމްގެ މަގުތައް ޒަމާނީ ފެންވަރަށް ހައްދަވައިދެއްވާނެ ކަމަށާއި، ދައުލަތަށް ފައިސާ ލިބުނު ވަރަކުން ދަރަނި އަދާކުރަމުން އެކަންވެސް އެރަށުގެ ރައްޔިތުންނަށް ކޮށްދެއްވާނެ ކަމަށް ޤާސިމް ވިދާޅުވިއެވެ.
ދިވެހީންގެ ދީނާއި، ޢަދުލު އިންސާފާއި، ޤައުމީ ސަލާމަތާއި، ސަލާމަތީ ބާރުތަކާއި، ދިވެހީންގެ ޑިމޮކްރަސީއާއި މިނިވަންކަމާއި، ދިވެހީންގެ ޤައުމިއްޔަތާއި، ރާއްޖޭގެ އެކިކަންކޮޅުތަކުގައި ޢުމުރާނީ ތަރައްޤީ ގެ ބޮޑެތި މަޝްރޫޢުތަކާއި، ބޯހިޔާވަހިކަމާއި، ދަރަނިވެރިކަމުން ސަލާމަތްވާނޭ އާ ވިސްނުންތަކާއި، ދަނޑުވެރިކަމާއި، މަސްވެރިކަމާއި، ވިޔަފާރިއާއި އިޤްތިޞާދު ހަރުދަނާކުރާނޭ ގޮތްތަކާއި، ޞިއްޙަތާއި، ތަޢުލީމާއި، ޑްރަގްގެ ވަބާއިން ސަލާމަތްވެފައިވާ ރާއްޖެއެއް ހޯދުމާއި، ވަކިއަތަކަށް ބުރަނުވާ "ދިވެހީން ފުރަތަމަ" އަށް އަންނަ ޚާރިޖީ ސިޔާސަތާއި، ތިމާވެށި ހިމާޔަތްކުރުމާއި، އާޓިފިޝަލް އިންޓެލިޖަންސްއަށް އަހުލުވެރި ދިވެހިރާއްޖެއެއް އުފަން ކުރުވުމާއި، އިންފޯމޭޝަން ޓެކްނޮލޮޖީ ހަރުދަނާކުރުމާއި، ވިޔަފާރި ހަރުދަނާކުރުމާއި، އިސްރައްވެހީންނާއި ޒުވާނުންނާއި ކުޅިވަރާއި، އަންހެނުންނަށް ޙާއްޞަ ރަންޒަމާނެއް ގެނައުމާއި، މާލީއިދާރާތަކާއި ޤައުމީ ބޭންކު ހަރުދަނާކުރުމާއި، ރާއްޖޭގެ ދަތުރުފަތުރަށް ހެޔޮ ބަދަލެއް ގެނައުމާއި، ފަތުރުވެރިކަމާއި ގެސްޓުހައުސް އިތުރު ގިޔަރަކަށް ލުން ފަދަ ކަންކަން ޤާސިމުގެ މެނިފެސްޓޯގައި ވަރަށް ތަފްސީލްކޮށް ހިމަނުންވާފައިވެއެވެ.
