ޕީއެންސީގެ ރިޔާސީ ކެންޑިޑޭޓު ޑރ މުޙައްމަދު މުޢިއްޒުގެ މެނިފެސްޓޯ އިފްތިތާހުކުރުން މި މަހުގެ 20 ވަނަ ދުވަހުގެ ރޭގަނޑުގެ ވަގުތެއްގައި ކުރިއަށް ގެންދިއުމަށް ނިންމައިފިއެވެ.
އިދިކޮޅުގެ ރިޔާސީ ކެންޑިޑޭޓު ޑރ މުއިއްޒުގެ މެނިފެސްޓޯ ލޯންޗުކުރުމުގެ ރަސްމިއްޔާތު ހުޅުމާލޭގެ ދެވަނަ ފިޔަވަހީގައި ބާއްވަން ހަމަޖެހިފައިވާއިރު، އެމަނިކުފާނުގެ މެނިފެސްޓޯއަށް ދެވިފައިވާ ނަމަކީ “ދިވެހީންގެރާއްޖެ” އެވެ.
ޕީއެންސީގެ ކެންޑިޑޭޓު އަދި ރަނިންގްމޭޓުވެސް ދިވެހިރާއްޖޭގެ އެކި އަތޮޅުތަކުގެ ރަށްތަކަށް ދަތުރުކުރައްވައި ކެމްޕެއިން ހަރަކާތްތައް ކުރިއަށް ގެންދަވާއިރު، މި ހަރަކާތްތަކުގެ ތެރެއިން ޑރ މުއިއްޒުވަނީ އެމަނިކުފާނުގެ ވެރިކަމެއްގައި ރައްޔިތުންނަށް ކޮށްދިނުމަށް ހަމަޖެހިފައިވާ ބައެއް ކަންކަމުގެ ވަޢުދުތައް ވަމުންނެވެ.
މުއިއްޒު ވިދާޅުވަނީ، ރަށް ގިރުމާއި ކުނި މެނޭޖް ކުރުމަކީ އަސާސީ ކަންކަން ކަމަށެވެ. މިއީ ސިޔާސީ ޕޯޑިއަމެއްގައި ހުރެ ވައުދުވާން ޖެހޭ ކަމެއް ނޫން ކަމަށާއި، ސަރުކާރަށް ލިބޭ އާމްދަނީން އެކަން ކަން ހަމަޖެއްސޭނެ ކަމަށް ވެސް މުއިއްޒު ވިދާޅުވިއެވެ.
