މާފަރު ފަޅުތެރެއަށް ވަތް ބޮޑު ކަންނެލި އައިނެއް އެރަށު އެންމެހާ ރައްޔިތުން ނިކުމެ ހިފައިފިއެވެ. ފަޅަށް ވަތް ކަންނެލިތައް ހިފަން ނިކުމުގެ ރަށުގެ ކުދިބޮޑު އެންމެން މިކަމުގައި ބައިވެރިވިއެވެ.
ދިޔަ ބޮޑުވެފައި އޮތް ގަޑީގައި ފަރު ހުރަސްކޮށް ފަޅުތެރެއަށް ވަދެވުނު އައިނަށް ދިޔަވަރު ހިކުމުން އެ ކަންނެލި އައިނަށް ނިކުމެވޭ ގޮތް ނުވުމުން، އެ ކަންނެލި އައިން ހިފުމަށް ރަށުގެ ރައްޔިތުންނަށް ފަސޭހަވެގެން ދިޔައެވެ. މިދުވަސްވަރަކީ މާބޮޑަށް ދިޔަވަރު ބޮޑުވާ ދުވަސް ވަރަކަށް ވުމުން، ދިޔަވަރު ބޮޑުވި ވަގުތު އެ އައިން ފަޅުތެރެއަށް ވަދެ ފަހުން ނިކުމެވޭ ގޮތް ނުވީ ކަމަށް މަޢުލޫމާތު ލިބެއެވެ.
މާފަރު ފަޅުތެރެއަށް މާސިންގާ ކަންނެލި އައިނެއް! 😁
ވަރަށްވެސް ސަޅި ހިތްްޤައިމު މަންޒަރު ތަކެެއް ❤️ pic.twitter.com/s3zDCnVsUr— Sim (@Simwarr) August 20, 2023
އިއްޔެ މެންދުރުންސުރެން ފެށިގެން ކުރި މަސައްކަތުން މި ކަންނެލިތައް ހިފުނީ އިރުއޮއްސުނު ފަހުންނެވެ. ރަށުގެ އެންމެނަށް ކަންނެލިތައް ބަހާލާފައިވާކަމަށާއި، ކޮންމެ ގެއަކަށް ދެ ކަންނެލި ލިބުނު ކަމަށް އެރަށުން މަޢުލޫމާތު ލިބިފައިވެއެވެ.
މާފަރަކީ ބޮޑު ފަޅެއް އޮންނަ، އަދި ކަނޑުއޮޅި މަތީގައި އޮންނަ ރަށެކެވެ. އަދި އެ ރަށުގެ ފަޅުތެރެއަށް އާއްމުކޮށް ރިއްމަސް ވަންނަ ކަން ފާހަގަކުރެވެއެވެ.
