ރާއްޖޭގައި ޑިމޮކްރެސީގެ ހަޔާތެއް ގެނައުމަށް މަސައްކަތްކުރި ބޭފުޅުންގެ ތެރެއިން އެންމެ އިސްސަފުގައި، އެންމެ ފުރަތަމަ އެންމެ ބޮޑު އަނިޔާއެއް ލިބުނު އެންމެ ނިކަމެތި މީހުންތަކުގެ ތެރޭގައި އެމަނިކުފާނު ހިމެނިވަޑައިގަންނަވާ ކަމަށް ޖުމްހޫރީ ޕާޓީގެ ރިޔާސީ ކެންޑިޑޭޓް ޤާސިމް އިބްރާހީމް އަމިއްލަފުޅަށް ވިދާޅުވެއްޖެއެވެ.
އޭނާ މިހެން ވިދާޅުވީ، ށ. ފީވަކުގައި ބޭއްވި ކެމްޕޭން ޖަލްސާގައި ވާހަކަފުޅު ދައްކަވަމުންނެވެ.
ޤާސިމް އިބްރާހީމް ވިދާޅުވީ، ރާއްޖޭގެ ޑިމޮކްރަޓިކް ހަޔާތުގައި އެންމެ ބުރަ މަސައްތަތެއް ކުރައްވާފައިވާ ބޭފުޅަކީ އެމަނިކުފާނު ކަމަށާއި، އެހެންނަމެވެސް އެ މަސައްކަތުގެ ސަބަބުން، ރާއްޖެއަށް ގިނަ ކުރިއެރުންތަކެއް ލިބިފައިވާ ކަމަށެވެ.
މިއަދު އެ ހުރިހާ މަސައްކަތްތަކެއް، ފަސްޖަހާ ވަޅުޖެހިގެންދާ މަންޒަރު ފެންނަމުންދާ ކަމަށާއި، ދިވެހިންގެ މިނިވަންކަން ގެއްލިގެންދާނެ ކަމުގެ ބިރުވެސް މިހާރު އެބައޮތް ކަމަށް އެމަނިކުފާނު ވިދާޅުވިއެވެ.
ޤާސިމް ވިދާޅުވީ، އެމަނިކުފާނު ރިޔާސީ އިންތިހާބަށް ކުރިމަތިލެއްވީ، ބޮޑު މަގާމެއް ހޯއްދަވާކަށްނޫން ކަމަށާއި، ރިޔާސީ އިންތިހާބުގައި ވާދަކުރެއްވީ ދިވެހި ރައްޔިތުން ބޮޑު ކެހިވެރިކަމަކުން ސަލާމަތްކޮށް، ރައްކާތެރިކޮށްދިނުމަށްޓަކައި ކަމަށެވެ.
ޤާސިމް ވިދާޅުވީ، ރާއްޖޭގައި ކޮރަޕްޝަން މިހާރު އިންތިހާއަށް މަތިވެއްޖެ ކަމަށާއި، 3 ބިލިއަން ޑޮލަރާއި ހަމަޔަށް ދައުލަތުގެ ދަރަނި އަރައިގެން ގެސްފައިވާ ކަމަށެވެ.
ވޭތުވެދިޔަ ތިން ހަތަރު އަހަރުގެ ތެރޭގައި، އިންޑިއާއިންވެސް ގިނަ ލޯނުތަކެއް ރާއްޖެއަށް ދީފައިވާ ކަމަށް ޤާސިމް ވިދާޅުވިއެވެ.
އަންނަ ސެޕްޓެންބަރު މަހުގެ 9 ވަނަ ދުވަހު ބާއްވާ ރިޔާސީ އިންތިހާބުގައި ރައީސުލްޖުމްހޫރިޔާ ކަމުގެ މަގާމަށް ކުރިމަތިލައްވާފައި ތިއްބެވި ބޭފުޅުންގެ ތެރެއިން އެމަގާމަށް އެންމެ ގާބިލް ބޭފުޅަކީ ކޮބައިތޯ ވިސްނާ އިވެލުއޭޓްކުރުމަށް ޤާސިމް އެދިވަޑައިގެންނެވިއެވެ.
