މިއީ ބޮޑު މުސީބާތެއް ފަދަ ވެރިކަމެއްގެ ގޮތުގައި ސިފަކުރައްވަމުން، މިސަރުކާރު ދަމަހައްޓަން އިތުރަށް ކުރަންޖެހޭ މަސައްކަތެއް ނޯންނާނެ ކަމަށް ޖުމްހޫރީ ޕާޓީ(ޖޭޕީ)ގެ ރިޔާސީ ކެންޑިޑޭޓް ޤާސިމް އިބްރާހިމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ކެމްޕެއިން ދަތުރުފުޅުގައި ހދ. ކުމުންދޫއަށް ވަޑައިގެން ދެއްކެވި ވާހަކަފުޅުގައެވެ.
ޤާސިމް ވިދާޅުވީ ރައީސް ޞާލިހުއަށް ދެވަނަ ދައުރެއް ދޭން ހެޔޮނުވާނެ ކަމަށާއި މިއީ ބޮޑު މުސީބާތެއް ކަހަލަ ސަރުކާރެއް ކަމަށެވެ.
އީސް ޞާލިހުއަށާއި ސަރުކާރަށް ގާސިމް ވަނީ ފާޑުވިދާޅުވެފައެވެ. އެގޮތުން ވެރިކަން ކުރަން ނުދަންނަ މީހަކު ރައްޔިތުންގެ ވެރިޔަކަށް ހުރުމުގެ ބަދަލުގައި އިސްތިއުފާ ދެއްވަން ގާސިމް ގޮވާލެއްވިއެވެ.
"މިއީ ކޮންފަދަ މުސީބާތެއްތަ. އެހެންވީމަ މީގެއިން ސަލާމަތް ވާންޖެހޭ. އެވަރަށް ބީތާވެއްޖެއްޔާ ވެރިކަން ކުރަން ނުހުންނާނީ. އިސްތިއުފާ ދީފައި ގެއަށް ދާނީ،"
ޤާސިމް ވިދާޅުވިއެވެ.
ގާސިމް ވިދާޅުވީ ރައީސުލްޖުމްހުރިއްޔާ އިބްރާހީމް މުހައްމަދު ސާލިހު ވެރިކަމަށް ގެނައުމަށް ވަކި ގައުމަކުން ހިފާލާފައި ހުރިވަރު ފެންނަމުންދާ ކަމަށެވެ. ރައީސް ސާލިހަށް ވެރިކަމުގެ ދެވަނަ ދައުރެއްދީފިނަމަ، ގައުމު އަޅުވެތިވާނެކަމަށް ވިދާޅުވެ، އޭނަ ވެރިކަމަށް ކުރިމަތިލީ ސަބަބުކަމުގައި ގާސިމް ވިދާޅުވީ، މި ސަރުކާރު ގެނައުމަށް މަސައްކަތްކޮށް ސަރުކާރުން ގޯސް ހަދަމުންދާއިރު، އެ ވާހަކަ ނުދައްކާ ހުރެފިނަމަ ފާފަވެރިވެދާނެތީ ކަމަށެވެ.
ރާއްޖޭގެ މިނިވަންކަން ނަގާލި ސަރުކާރަކަށް ދެވަނަ ދައުރެއް ދެއްވަން ކުރަން ޖެހޭ މަސައްކަތެއް ނޯންނާނެ ކަމަށް ޤާސިމް ވިދާޅުވިއެވެ.
" ދެން އަޅުގަނޑުމެން ދައްކާކަށް ވާހަކައެއް ނޯންނާނެ. އެ ވެރިކަން ދަމަހައްޓަން އަޅުގަނޑުމެން ކޮށްދޭންޖެހޭ މަސައްކަތެއް ނޯންނާނެ، މިއީ ބޮޑު މުސީބާތެއް ކަހަލަ ސަރުކާރެއް.".
ޤާސިމް ވިދާޅުވިއެވެ.
ކޯލިޝަން ހަދައިގެން އެމްޑީޕީއަށް ވެރިކަން ހޯދައިދިނުމުންވެސް އެވެރިކަން ދިޔައީ ސުމަކުން ކަމަށް ކަމަށާއި، ދެފަހަރު ވެރިކަން ކުރަން ލިބުމުންވެސް އެމްޑީޕީއަށް ރަނގަޅުވެރިކަމެއް ރައްޔިތުންނަށް ހޯދައިނުދެވުނު ކަމަށް ޤާސިމް ވިދާޅުވިއެވެ.
"ދެފަހަރުމަތިން އެމްޑީޕީ ވެރިކަމަށް އައި. އެހެންނަމަވެސް ސުމަކުން ދިޔައީ. ނޭނގުނު ވެރިކަން ކުރާކަށް. ރާއްޖޭގެ މިނިވަންކަން ނަގާލާ ސިފައިންނާއި ފުލުހުން އެތިބެން ޖެހެނީ މި ރާއްޖޭގެ ދެ ވަނަ ދަރަޖައިގައި. ދިވެހި ސިފައިންނަށް ތަންތަނަށް ގޮސް ވަންނަން ދިމާކުރީމާ، ޤައުމުގެ ސަލާމަތަށްޓަކައި ބަލާ ޗެކްކުރަން ތަންތަނަށް ވަންނަން ފެށީމާ ހޯހޯއޭ، އެހެން ބުނެވޭނެ ބަޔަކު ތިބެގެން ނުވާނެ މިތާކު،" ޤާސިމް ވިދާޅުވިއެވެ.
ރާއްޖެއަށް އިންޑިޔާއިން ނުފޫޒު ފޯރުވާކަން ޤާސިމް ފާހަގަކުރެއްވިއެވެ. އަދި ރާއްޖޭގެ ދެކުނާއި އުތުރާއި މެދުރާއްޖެތެރޭގެ އިތުރުން މާލޭގައި ވެސް އިންޑިޔާ ސިފައިން ހަރަކާތްތެރިވާކަމަށް ޤާސިމް ވިދާޅުވިއެވެ.
ޤާސިމް މިހެން ވިދާޅުވެފައިވާއިރު، އިދިކޮޅު ޕީއެންސީ ފިޔަވައި ދެން ތިބީ ޕާޓީތަކަކީ ރިޔާސީ އިންތިޚާބު ދެވަނަ ބުރަަކަށް ގެންގޮސް، ވޯޓު ބައިބައިކުރުމަށް އިންތިޚާބަށް ނުކުމެ ތިބި ސިޔާސީ ފަރާތްތައް ކަމަށް ރައީސް އިބްރާހީމް މުޙައްމަދު ޞާލިޙް މިއަދު ވިދާޅުވެފައިވަނިކޮށެވެ.
ކެމްޕޭނުގައި ބ. ފެހެންދުއަށް ވަޑައިގެން ވާހަކަފުޅުދައްކަވަމުން ރަައީސް ވިދާޅުވީ އެ ޕާޓީތަކުގެ ބޭނުމަކީ ދެވަނަ ބުރެއްގައި ބަޔަކާއެކު ކޯލިޝަން ހަަދައި ދެން އަންނަ ސަރުކާރެއްގައި މަގާމުތަކެއް ހޯދުންކަމަށެވެ. އަދި އެއީ މުޅިން އަމިއްލަ މަންފާއަށް ކުރާ ކަންތައްތަކެއްކަމަށް ރައީސް ވިދާޅުވިއެވެ.
"އެއް ބައެއްގެ މަޤްސަދަކީ ދެވަނަ ބުރަކަށް މި ގެންދިއުން ބައިބައި ކޮށްލައިގެން ނަމަވެސް،" ރައީސް ވިދާޅުވިއެވެ.
އެ މަނިކުފާނު މި ވާހަކަފުޅުތައް ބިނާކުރެއްވީ ޖުމްހޫރީ ޕާޓީއާއި އެމްއާރްއެމްއަށް ނިސްބަތްކޮށް ކަމަށް ބެލެވެއެވެ. އެހެނީ، އިންތިޚާބަށް ނުކުތުމުގެ ކުރިން ރައީސް ކޯލިޝަަންގެ ދައުވަތު ދެއްވުމުން އެކަން ގަބޫލުނުކޮށް ވަކިން މަސައްކަތް ފެށި ދެ ޕާޓީއެވެ.
ޖުމްހޫރީ ޕާޓީން އެޕާޓީގެ ލިޑަރ ޤާސިމް އިބްރާހިމް ވާދަކުރައްވާއިރު، އަމިއްލަ ކެންޑިޑޭޓެއްގެ ގޮތުގައި ވާދަކުރައްވަނީ އެމްއާރްއެމްގެ ރައީސްކަމުގައި ހުންނެވި ފާރިސް މައުމޫނެވެ.
