ހ. ޝީރީންވިލާގޭގެ އެޕާޓްމެންޓެއްގެ ތެރޭގައި ރަޙުމު ކުޑަގޮތަކަށް މަރާލާފައި އޮއްވާ ފެނުނު، ޏ. ފުވައްމުލަކު ޝިއާއު މުޙައްމަދު ސައީދު މަރާލި މައްސަލައިގެ ޝަރީއަތުގެ އަޑުއެހުމެއް، އަންނަ މަހުގެ 3 ވަނަ ދުވަހު ބޭއްވުމަށް ކްރިމިނަލް ކޯޓުން ތާވަލްކޮށްފިއެވެ.
މި މައްސަލަ ކޯޓަށް ހުށަހެޅުނު ފަހުން މިހާތަނަށް 4 އަޑުއެހުމެއް ބާއްވާފައިވާއިރު، މިމައްސަލައިގެ އެންމެ ފަހުގެ އަޑުއެހުމެއް ބާއްވާފައިވަނީ، މިމަހުގެ 10 ވަނަ ދުވަހުއެވެ.
ދައުލަތުން ވަނީ، މިމަހުގެ 15 ވަނަ ދުވަހު، ޝިއާއުގެ މަރުގެ މައްސަލައިގައި، ދައުވާކުރާ ޢަލީ ޝާހިލްއަށް އައު ވަކީލަކު ހަމަޖައްސައިދީއެވެ.
ޝާހިލަށް އައު ވަކީލަކު ހަމަޖައްސަން ފުރުސަތު ދިނީ ދައުލަތުން އެންމެ ފުރަތަމަ އޭނާއަށް ހަމަޖައްސައިދިން ވަކީލް މައްސަލަ އިން ތަނާޒުލްވުމާ ގުޅިގެން ކަމަށް ކްރިމިނަލް ކޯޓުން ބުނެފައިވެއެވެ.
މިދިޔަ އަހަރުގެ އޮގަސްޓް މަހުގެ 6 ވަނަ ދުވަހު ތޫނުއެއްޗަކުން ޙަމަލާދީ ޝިއާއު މަރާލި މައްސަލައިގައި ޝާހިލްގެ މައްޗަށް ދައުވާކުރަން ޕީޖީން ފޮނުވާފައިވަނީ އެ އަހަރުގެ ޑިސެންބަރުމަހުގެ ތެރޭގައެވެ.
އޭނާގެ މައްޗަށް އުފުލާފައިވަނީ، ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ 5 ވަނަ މާއްދާގެ ދަށުން ތޫނު އެއްޗެއް ބޭނުންކޮށްގެން ޤަޞްދުގައި މީހަކު މެރުމުގެ ކުށުގެ ދަޢުވާގެ އިތުރުން އިތުރު 4 ދަޢުވާއެއް ކަމަށް މަޢުލޫމާތު ލިބެއެވެ.
އޭނާގެ މައްޗަށް އިތުރަށްކުރި ދަޢުވާތަކުގެ ތެރޭގައި އޮރިޔާން ކާޑު ގެންގުޅުމާއި ކެނެބިސް ބޭނުންކުރުމުގެ ދަޢުވާތައް ހިމެނެއެވެ. މި މައްސަލައިގައި ފުލުހުން ޝާހިލް ހައްޔަރުކޮށްފައިވަނީ ކުށުގެ ވެށިންނެވެ.
ޝިއާއު މަރާލާފައިވަނީ ވަރަށް އިހާނެތިކޮށް ނަމަވެސް، އޭނާއަށް ދީފައިވާ އަނިޔާތަކުގެ އެއްވެސް ތަފްޞީލެއް ފުލުހުން ހާމަކޮށްފައެއް ނުވެއެވެ.
