އެމްޑީޕީގެ ރިޔާސީ މެނިފެސްޓޯގައި ހިމެނޭ އިޤްތިޞާދީ ސިޔާސަތު ލޯންޗުކުރުމަށް މިރޭ ކެމްޕޭން ހަރަކާތެއް ބޭއްވުމަށް އެ ޕާޓީން ހަމަޖައްސައިފިއެވެ.
މި ޙަރަކާތުގައި އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުޙައްމަދު ޞާލިހް ބައިވެރިވެވަޑައިގަންނަވާ ގޮތަށް ވަނީ ހަމަޖެހިފައެވެ. މި ކެމްޕެއިން ހަރަކާތް އޮންނާނީ މިރޭ ރޭ 8:00 ގައި މާފަންނު ސޯޝަލް ސެންޓަރުގައެވެ.
އެމްޑީޕީގެ އެ ޙަރަކާތަކީ އެމް.ޑީ.ޕީން އާއްމުކޮށް ބާއްވާ ޖަލްސާތަކާއި މުޅިން ތަފާތު، އާ ކޮންސެޕްޓަކަށް ބާއްވާ އިވެންޓެއްކަމަށް އެ ޕާޓީން ވިދާޅުވެއެވެ.
އެމް.ޑީ.ޕީއަކީ ހަރުގެ ބައްދަލުވުންތަކާއި، ކަންމަތީ ބައްދަލުވުންތަކާއި، ކެމްޕޭން ޖަގަހަތަކާއި، މިނޫންވެސް ކެމްޕެއިން ކުރުމުގެ ތަފާތު ހަރަކާތްތައް ރާއްޖެއަށް ތަޢާރަފްކުރި ޕާޓީކަން ފާހަގަކުރަމުން އެ ޕާޓީން މިރޭ ބާއްވާ ޙަރަކާތަކީވެސް ރާއްޖޭގެ ސިޔާސީ ހަރަކާތްތަކަށް އެމްޑީޕީއިން އަލަށް ތަޢާރަފްކުރާ ކަންތަކުގެ ލިސްޓަށް އިތުރު ވެގެންދާނެ ނަމްބަރެއްކަމަށެވެ.
މި އިވެންޓްގައި އެމްޑީޕީން ކުރިއަށް އޮތް 5 އަހަރަށް ހުށަހަޅާ މެނިފެސްޓޯގެ ފަހު ބައި ކަމަށްވާ އިޤްތިޞާދީ މެނިފެސްޓޯ ހުށަހެޅުން އޮންނާނެއެވެ.
މިހާތަނަށް އެޕާޓީން ވަނީ މެނިފެސްޓޯގައި ހިމެނޭ ބައެއް ސިޔާސަތުތައް ހާމަކޮށްފައެވެ. ޒުވާނުންނާއި ކުޅިވަރާބެހޭ ސިޔާސަތާއި ހެޔޮވެރިކަމާއި އަދި އުފާވެރި ދިރިއުޅުމުގެ ސިޔާސަތު ހިމެނެއެވެ. އެޕާޓީގެ ރިޔާސީ ކެންޑިޑޭޓް ރައީސް ޞާލިޙް ގެންދަވަނީ ކޮންމެ ރަށަކަށްވެސް ކޮށްދެއްވާނެ ކަންތައްތަކުގެ ލިސްޓު އެ ރަށެއްގައި ބާއްވާ ޖަލްސާގައި އިޢުލާންކުރައްވަމުންނެެވެ.
