މާލޭގެ ބޮޑުތަކުރުފާނު މަގުގައި އިންދާފައިވާ ކަދުރު ރުއްތަކުގައި ރިޔާސީ އިންތިޚާބުގެ ކެމްޕޭން ބެނާތައް ދަމާތީ އެކަން ނުކުރުމަށް މާލޭ ސިޓީ ކައުންސިލްއިން އަންގައިފިއެވެ.
އެ ކައުންސިލްއުން މިއަދު ކުރި އިއުލާނެއްގައި ބުނީ ކެމްޕޭން ބެނާތައް މާލޭގެ ބޮޑުތަކުރުފާނުމަގުގައި އިންދާފައި ހުރި ކަދުރު ރުއްތަކަށް ވައު ޖަހައި، ދަމަމުން ގެންދާކަން ފާހަގަ ކުރެވިފައިވާ ކަމަށާއި، ބައެއް ޕާރޓީތަކުން މިހާރުވެސް ބެނާތައް ކަދުރު ރުއްތަކުގައި ދަމާފައި ހުރުމުން މި ރުއްތަކަށް ގެއްލުން ލިބެމުންދާކަން ސިޓީ ކައުންސިލްއިން ފާހަގަކުރައްވާފައިވެއެވެ.
އެހެންވެ ކެމްޕެއިންގެ އެއްވެސް ބެނާ އެއް ނުވަތަ ދިދަ ފައްޗެއް ކަމުގައި ވީނަމަވެސް ކަދުރު ރުއްތަކުގައި ހަރު ނުކުރުމަށާއި، އޮންނަ އުޞޫލުގެ ތެރެއިން ހުއްދަ ނަންގަވައިގެން ހޮޅިދަނޑީގައި ބެނަރ އަދި ދިދަފަތި ދެމުމަށް ވެސް ކައުންސިލްއިން ވަނީ އަންގަވާފައެވެ.
ބޮޑު ތަކުރުފާނު މަގުގައި ގިނަ އަދަދަކަށް ކަދުރު ރުއްތައް އިންދާފައިވަނީ، މާލޭގައި "އެއްލައްކަ ގަސް" އިންދުމުގެ ޕްރޮގްރާމްގެ ދަށުން ކުރިއަށް ގެންދިޔަ ހަރަކާތެކެވެ. މާލޭގައި "އެއްލައްކަ ގަސް" އިންދުމުގެ މަޝްރޫއަކީ މާލެ އަކީ ފެހި އަދި ހިތްފަސޭހަތަނަކަށް ހެދުމުގެ ގޮތުން ކުރިއަށްގެންދާ މަޝްރޫއެކެވެ.
