Sunday, 06 October 2024
އެމްޑީޕީގެ މެނިފެސްޓޯގައި ހިމެނޭ އިޤްތިޞާދީ ސިޔާސަތު އާއްމުކުރުމަށް ސޯޝަލް ސެންޓަރުގައި ބޭއްވި ކެމްޕެއިން ޖަލާސާގައި ރައީސް ޞާލިޙް

އެމްޑީޕީގެ އިޤްތިޞާދީ ބޮޑު ބަދަލު: އިސްލާމިކް ފައިނޭންސްގެ ހަބަކަށް ރާއްޖެހެދުން

އެމްޑީޕީއާއި ގުޅިފައިވާ ޕާޓީތަކުގެ މެނިފެސްޓޯގައި ހިމެނޭ އިޤްތިޞާދީ ސިޔާސަތު އާއްމުކުރުމަށް، ރޭ ސޯޝަލް ސެންޓަރުގައި ބޭއްވި ކެމްޕެއިން ޖަލްސާގައި، "އެމްޑީޕީގެ އިޤްތިޞާދީ ބޮޑު ބަދަލު" މެނިފެސްޓޯ އިޢުލާންކުރެވިގެން ގޮސްފައިވެއެވެ.

ރާއްޖެއަކީ ސައްތައިން ސައްތަ އިސްލާމީ ގައުމަކަށްވެފައި، ރާއްޖޭގެ އިގުތިސާދީ ކުރިއެރުވުމަށް އިސްލާމިކް ފައިނޭންސްގެ އުސޫލުތަކުގެ ބޭނުން ހިފުމަކީ މުހިންމު ކަމެއްކަމުގައި ގުޅިފައިވާ ޕާޓީތަކުން ދެކެއެވެ. ބައިނަލްއަގްވާމީ މާލީ ބާޒާރުގައިވެސް އިސްލާމިކް ފައިނޭންސަށް އޮތް ޑިމާންޑް އިތުރުވަމުންދާ ދަނޑިވަޅެއްގައި، ސަރަހައްދީ ފެންވަރުގައި ވާދަކުރެވޭ ފެންވަރަށް ރާއްޖޭގައި އިސްލާމިކް ފައިނޭންސް ކުރިއަރުވައި، ރާއްޖޭގެ އިގުތިސާދަށް އާ ޕްރޮޑަކްޓްތަކެއް ތައާރަފްކޮށް މާލީ ނިޒާމަށް އިންގިލާބީ ބަދަލެއް ގެނެވޭނެ ކަމަށް މެނިފެސްޓޯގައި ހިމަނާފައިވެއެވެ.

Image

އިސްލާމިކް ފައިނޭންސްގެ ސަރަހައްދީ މައި މަރުކަޒަކަށް ރާއްޖެ ހެދުމަށް ކުރިއަށް ރާވާފައިވާ ކަންކަމުގެ ތެރޭގައި ހިމެނޭ ކަންކަންވެސް މެނިފެސްޓޯގައި ހިމަނާފައިވެއެވެ

 

  • ރާއްޖޭގައި އިސްލާމިކް ފައިނޭންސް އިތުރަށް ފުޅާކުރުމަށް ގައުމީ މާސްޓަރ ޕްލޭނެއް އެކުލަވާލައި، ރާއްޖެއަކީ އިސްލާމިކް ފައިނޭންޝަލް ހަބަކަށް ހެދުމަށް އިސްލާމިކް ފައިނޭންސަށް ޚާއްސަ ރީޖަނަލް ފައިނޭންޝަލް ސެންޓަރެއް ގާއިމުކުރާނެ.

  • އިސްލާމިކް ފައިނޭންސް ޕްރޮޑަކްޓްތައް ފޯރުކޮށްދިނުމުގައި ހަރަކާތްތެރިވާ ފަރާތްތަކާއި، އިތުރަށް މިދާއިރާއަށް އިންވެސްޓްކުރުމުގެ ޝައުގުވެރިކަން ހުރި ފަރާތްތަކަށް އިތުބާރު ހޯދައިދިނުމުގެ ގޮތުން، އިސްލާމިކް ފައިނޭންސާ ގުޅުން ހުރި ޚާއްސަ ޣާނޫނީ އޮނިގަނޑެއް އެކުލަވާލައި ތަންފީޒުކުރާނެ.

  • ރާއްޖޭގެ ފައިނޭންޝަލް ސެކްޓަރ ކުރިއެރުވުމަށްޓަކައި ކުރާ މަސައްކަތްތަކުގައި އިސްލާމިކް ފައިނޭންސަށް އިސްކަންދީ، ބޭންކިންގ، އިންޝޫރަންސް، އަދި ޕެންޝަން ފަންޑް ފަދަ ދާއިރާތަކަށް ކޮންވެންޝަނަލް ފައިނޭންސަށްވުރެ ފަހިކޮށް ފަސޭހައިން އިސްލާމިކް ފައިނޭންސަށް އެކްސެސް ލިބޭނެ މާލީ ނިޒާމެއް ޤާއިމުކުރާނެ.

  • ކިޔަވާ ކުދިންނާއި އާންމުންގެ ތެރޭގައި ފައިނޭންޝަލް ލިޓްރަސީ އިތުރުކޮށް، އިސްލާމިކް ފައިނޭންސް ދާއިރާ އިތުރަށް ފުޅާކުރުމަށްޓަކައި ބޭނުންވާނެ އިންސާނީ ވަސީލަތް ތަރައްގީކުރާނެ.

  • ޒަކާތާބެހޭ ގާނޫނެއް އެކުލަވާލައި، ޒަކާތް ފަންޑުން އިންވެސްޓްކުރެވޭނެ ޝަރީއާ ކޮމްޕްލަޔަންޓް އިންވެސްޓްމަންޓް ޕްރޮޑަކްޓްތައް ފަހިކޮށް، އޭގެއިން ނަފާ ހޯދާ، ފަންޑު އިތުރުކުރުވޭނެ.

  • ވަޤުފްގެ ނިޒާމެއް އެކުލަވާލައި ބައިނަލްއަގްވާމީ ވަޤުފް ފަންޑުތަކުން ރާއްޖޭގެ ވަޤުފްތަކަށް އިންވެސްޓްކުރާނެ ނިޒާމެއް ގާއިމުކުރާނެ.

  • އިސްލާމިކް ވެންޗަރ ކެޕިޓަލް ފަންޑެއް މެދުވެރިކޮށް ރާއްޖޭގެ ވިޔަފާރިތައް ފުޅާކުރުމަށް ބޭނުންވާ ކެޕިޓަލް ފޯރުކޮށްދޭނެ

 

Image

މިޖަލްސާގައި ރައީސް ޞާލިޙް ވިދާޅުވީ، އަމާޒަކީ 2028 ވަނަ އަހަރު އަންނައިރު ރާއްޖެ އަންނަ ފަތުރުވެރިންގެ ޢަދަދު 3 މިލިޔަން ހުރަސްކޮށް 4 ނުވަތަ 5 މިލިޔަނަށް ގެންދިޔުންކަމަށެވެ.

މިއާއެކު ރާއްޖޭގެ އިޤްތިޞާދު 2028 ވަނަ އަހަރު އަންނައިރު 170 ބިލިޔަން ރުފިޔާ ފަހަނަ އަޅާގޮސް ދަޢުލަތަށް ލިބޭ އާމްދަނީ 45 ބިލިޔަން ރުފިޔާ ފަހަނަ އަޅާ 50 ބިލިޔަން ރުފިޔާއާހަމައަށް ދާނެކަމަށް ރައީސް ވިދާޅުވިއެވެ.

"އަޅުގަނޑުމެން ލޯނު ނަގައިގެން މަސައްކަތް މިކުރަނީ. ލޯނު ދެއްކޭނެކަމުގެ ޔަޤީންކަމާއި ކަށަވަރުކަން އޮތީމަ. އެހެންވެ އަޅުގަނޑުމެން ރާއްޖޭގެ ސަރަޙައްދުތައް ތަރައްޤީކުރުމަށް ވަޢުދު މިވަނީ. ފައިސާ ހުންނާނެކަމުގެ ޔަޤީންކަން އޮތީމަ. ވާ ވަޢުދުތައް އަކުރުން އަކުރަށް ކޮށްދޭނަން." އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ޞާލިހް ވިދާޅުވިއެވެ.

ރައީސް ވިދަޅުވީ ރާއްޖޭގެ އިޤްތިޞަދު ފުޅާކުރެއްވުމަށް އެކި ސަރަޙައްދުތަކުގައި ޑޮމެސްޓިކް އެއަރޕޯޓްތައް އަޅާ، އާރްޓީއެލް ފެރީގެ ޚިދުމަތުން ރާއްޖެ ގުޅާލުމުގެ މަސައްކަތް ކުރަމުން އަންނަކަމަށެވެ. އަދި މާލޭ ވިޔަފާރި ބަނދަރު ގުޅިފަޅަށް ބަދަލުކުރުމުގެ އިތުރަށް އިޤްތިޞާދީ އެހެން މަސައްކަތްތައް ކުރަމުން އަންނަކަމަށާއި މީގެ ސަބަބުން އެތަކެއް ވަޒީފާތަކެއް އުފެދިގެން ދާނެކަމަށް ރައީސުލްޖުމްހޫރިއްޔާ ވިދާޅުވިއެވެ.

ހިޔާލު ފާޅުކުރައްވާ!

ހިޔާލު ދެއްވާ!

Your email address will not be published. Required fields are marked *

ފަހުގެ

މަޤްބޫލު