ޔަހޫދީ އިސްރާޢީލުގެ ހައްދުފަހަނައަޅާފައިވާ އަސްކަރިއްޔާއިން ފަލަސްޠީނުގެ ބިންތަކަށް އަރައި ހިންގަމުންދާ ލާއިންސާނީ ޖަރީމާތަކުގައި ގަސްދުގައި ފަލަސްޠީނުގެ ޞިއްޙީ ޚިދުމަތްތެރިންނަށް ހަމަލަ ދެމުންދާ ކަމަށް ބުނެ، އ.ދ އިން ކަންބޮޑުވުން ފާޅުކޮށްފިއެވެ. އ.ދއިން މި ކަން ހާމަކޮށްފައި ވަނީ ދުނިޔޭގެ އިންސާނީ އެހީތެރިކަމުގެ ދުވަހުގެ މުނާސަބަތުގައި ޝާއިޢުކުރި ރިޕޯޓެއްގައެވެ.
ޔަހޫދީ އިސްރާޢީލުގެ ޓެރެރިސްޓު ސިފައިން ވަނީ ވެރިވެގަނެފައިވާ ހުޅަނގު އައްސޭރީގެ ޖިނީންގައި އޮންނަ ޖިނީން ރެފިޔުޖީ ކޭމްޕައް އަރައި ލާއިންސާނީ އުދުވާންތަކެއް ހިންގާފައެވެ. އަދި، ފަލަސްޠީނުގެ ގިނަ ޢަދަދެއްގެ މީހުން ޝަހީދުކޮށްލާފައެވެ. އެކަމަކީ ގަތުލުއާންމެއްގެ ގޮތުގައި ބައިނަލްއަޤުވާމީ މުޖުތަމަޢުން ދަނީ ސިފަ ކުރަމުންނެވެ.
އ.ދގެ އިންސާނީ އެހީތެރިކަމާ ބެހޭ ކޯޑިނޭޓަރ ލިން ހޭސްޓިންގްސް ވިދާޅުވީ މި އަހަރުގެ ތެރޭގައި ޔަހޫދީ އިސްރާޢީލުގެ ޖައްބާރު ސިފައިން ހިންގާފައިވާ ޓެރެރިސްޓު އަމަލުތަކުގައި ފަލަސްޠީނުގެ ޞިއްޙީ ޚިދުމަތްތެރިންނަށް އަމާޒުކޮށް ގިނަ ހަމަލަތަކެއް ދީފައިވާ ކަމަށާއި، މި ހަމަލަތަކުގައި އޭގެ ތެރެއިން 77 މީހުން ޒަޚަމުވެފައިވާ ކަމަށާއި، 30 އެއްހާ އެމްބިޔުލާންސަށް ހަމަލަދީ ގެއްލުންދީފައިވާ ކަމުގައެވެ.
ޔަހޫދީ ޓެރެރިސްޓު ސިފައިން ހަމަލަދީ ޒަޚަމުކޮށްލާފައިވާ ޞިއްޙީ ޚިދުމަތްތެރިންގެ ތެރޭގައި ޑޮކްޓަރުންނާއި، ނަރުހުންނާއި، މަދަނީ ޖަމުޢިއްޔާތަކުގައި މަސައްކަތްކުރާ ވޮލަންޓިޔަރުން ހިމެނޭ ކަމުގައި ހޭސްޓިންގްސް ވިދާޅުވިއެވެ. ޔަހޫދީންގެ އުދުވާންތަކުގައި ޒަޚަމުކޮށްލާފައިވާ ފަލަސްޠީނުގެ ރައްޔިތުންނަށް ޞިއްޙީ ފަރުވާ ފޯރުކޮށްދޭން ޞިއްޙީ ޚިދުމަތްތެރިން ކުރަމުންދާ މަސައްކަތްތަކަށް ޔަހޫދީ ފުލުހުންނާއި ސިފައިން ގަސްދުގައި ހުރަސް އަޅަމުންދާ ކަމުގައި ވެސް ހޭސްޓިންގްސް ވިދާޅުވިއެވެ. .
ޞިއްޙީ ޚިދުމަތްތެރިންނާއި އެ މީހުންގެ އެމްބިޔުލާންސްތަކަށް ގަސްދުގައި ހަމަލަ ދިނުމާއި، ޞިއްޙީ ފަރުވާ ފޯރުކޮށްދިނުމަށް ހުރަސް އެޅުމުގެ އަމަލުތައް ހިމެނެއެވެ. އަދި، ޒަޚަމުވެފައިވާ ފަލަސްޠީނުގެ ރައްޔިތުންނަށް އަމާޒުކޮށް ދެވަނަ ފަހަރަށް ހަމަލަތައް ދެމުންދާ ކަމަށާއި، ޔަހޫދީ ސިފައިން ޒަޚަމުކޮށްލާފައިވާ މީހުންނަށް ޞިއްޙީ ފަރުވާ ފޯރުކޮށްދޭން އުޅުނު ރެޑް ކްރެސެންޓުގެ ޞިއްޙީ ޚިދުމަތްތެރިންނަށް ޔަހޫދީ ސިފައިން 314 ފަހަރަކު ހުރަސް އަޅާފައިވާ ކަމުގައެވެ.
ހަމައެހެންމެ، ރެޑް ކްރެސެންޓުގެ ޞިއްޙީ ޚިދުމަތްތެރިން ފަރުވާ ދެމުންދިޔަ މީހުން ހައްޔަރުކޮށްގެން ގެންދިޔުމަކީ ވެސް ޔަހޫދީ ޖައްބާރު ސިފައިން ޢާންމުކޮށް ކުރާ ކަމެއް ކަމުގައި އެ ޖަމުޢިއްޔާއިން ބުނެއެވެ.
ނާބުލުސްގެ ޖަމުޢިއްޔާއެއް ކަމުގައިވާ ޕަލަސްޓީނިއަން މެޑިކަލް ރިލީފް ސޮސައިޓީގެ ހަމްޒާ އަބޫ ހާޖަރަކީ ޔަހޫދީ ޖައްބާރު ސިފައިންގެ ޝިކާރައަކަށްވެފައިވާ އެކަކެވެ. 2022 ވަނަ އަހަރުގެ ޑިސެންބަރު މަހު ފަލަސްޠީނުގެ ބަޔަކަށް ޞިއްޙީ ޚިދުމަތް ފޯރުކޮށްދޭން ހަރަކާތްތެރި ވަނިކޮށް ޔަހޫދީ ސިފައިން ވަނީ އޭނާގެ މެޔަށް ބަޑި ޖަހައި، ޒަޚަމުކޮށްލާފައެވެ. ހުސްވި ޖުލައި މަހު ޔަހޫދީ ސިފައިން ވަނީ ރެޑް ކްރެސެންޓުގެ އާމިރު އަޙްމަދު އާމިރުގެ ގަޔަށް ވެސް ބަޑިޖަހައި ޒަޚަމުކޮށްލާފައެވެ.
ޔަހޫދީންގެ އަޅުވެތިކަމުގައި ފަލަސްޠީނުގެ މުސްލިމުން ވޭތުކުރަމުން ދަނީ ބިރުވެރިކަމާއި ނުރައްކަލުން ފުރިފައިވާ އަނދިރި ހަޔާތެކެވެ. އ.ދއަށް ވެސް ކުރެވޭ އޮންނަނީ އެންމެ ކަމެކެވެ. އެއީ، ހަރުކަށި އިބާރާތުން ކުށްވެރިކުރާ ކަމަށް ބުނެ ބަރިބަރިއަށް ބަޔާންތައް ނެރުމެވެ.
