ޑިމޮކްރެޓުންގެ ރިޔާސީ ކެންޑިޑޭޓް އިލްޔާސް ލަބީބް ހުށަހަޅުއްވާ މާލެ ތަސައްވަރު؛ ވެށިފަހި މާލެ ސިޔާސަތުގެ ދަށުން ފުރަތަމަ ތަރައްޤީކުރަން ނިންމާފައިވާ 10 ކޮށީގެ ރަށްވެހިންނަށް އެކަމުގެ މަޢުލޫމާތު ހިމެނޭ ލީފްލެޓާއި، ޕޯސްޓަރާއެކު އިލްޔާސް ލަބީބްގެ ސިޓީފުޅެއް މިއަދު ފޮނުއްވާން ފައްޓަވައިފިއެވެ.
އިލްޔާސް ލަބީބް ސޮއިކުރައްވާ މިއަދު ފޮނުއްވާން ފެއްޓެވި މިސިޓީފުޅުގައި ވެށިފަހި މާލެ ޕްރޮގްރާމް ހިންގާން ނިންމާފައިވާ ގޮތް ހިމަނާފައިވެއެވެ.
"ވެށިފަހި މާލެ ޕްރޮގްރާމްގެ ދަށުން ތިޔަ ގޯތީގެ ވެރިފަރާތަށް 1000 އަކަ ފޫޓުގެ ގޯއްޗެއް ހުޅުމާލެ ނުވަތަ ގްރޭޓަރ މާލެ އޭރިޔާއިން ލިބޭނެ"ކަމަށާއި، "ގޭގެ ރެޖިސްޓްރީގައިވާ 18 އަހަރުން މަތީގެ ކޮންމެ މީހަކަށް 2 ނުވަތަ 3 ކޮޓަރީގެ ކޮންޑޯ ޔުނިޓެއް" ލިބޭނެކަމަށް އެސިޓީގައި ބަޔާންކޮށްފައި ވެއެވެ.
އިލްޔާސް ލަބީބް ހުށަހަޅުއްވާ ވެށިފަހި މާލެ ޕްރޮގްރާމްގައި މާލޭގެ އެންމެ ތޮއްޖެހި، ކޮއްލަވާނިވެފައިވާ 10 ކޮށީގެ ރަށްވެހިން، 111، 351، 355، 356 އަދި 360 ކޮށީގައި ތަރައްޤީކުރާ ކޮންޑޮމީނިއަމް ޢިމާރާތްތަކަށް ބަދަލުކުރުމެވެ.
ސަރުކާރާއި، ސަރުކާރު ޙިއްސާވާ ކުންފުނިތަކުގެ ބެލުމުގެ ދަށުގައި އަމީނީމަގުގައި ހުރި މި 5 ކޮށީގައި ޢިމާރާތްކުރާ ކޮންޑޮމީނިއަމް ތަކަކީ މުނިފޫހިފިލުވުމާއި، ކަސްރަތާއި، ކުޅިވަރާއި، ވިޔަފާރީގެ ހަރަކާތްތައް ހިމެނޭހެން އާރބަން ލައިފްސްޓައިލަކަށް ބޭނުންވާ އެންމެހާ ޚިދުމަތަކާއި ވަސީލަތަކާއެކު ޤާއިމުކުރެވޭ ޒަމާނީ ޢިމާރާތްތަކެކެވެ. އަދި ކުޑަކުދިންނަށް ބޭނުންވާ ޑޭކެޔަރ، އަދި ޢުމުރުން ދުވަސްވީ މީހުންގެ އެލްޑަރކެޔާރ ސެންޓަރުތައްވެސް މި ކޮންޑޮމޯނިއަމްތަކުގައި ހުންނާނެއެވެ.
މިއީ ސިންގަޕޫރުފަދަ ބިންކޮޅު ކުޑަ، ކާރޫބާރޫއާއި، ތޮއްޖެހުން ބޮޑު، އާރބަން ސިޓީތަކުގައި ކާމިޔާބުކަމާއެކު ހިންގާ، އަޖުމަ ބަލާ، ކާމިޔާބުކަން ކަށަވަރުކުރެވިފައިވާ މޮޑެލް އެކެވެ.
އިލްޔާސް ލަބީބްގެ މާލޭ ތަސައްވަރު އޮޅުންފިލުވައިދިނުމަށް މާލޭގައި 28 އޮގަސްޓް 2023 ވީ ހޯމަ ދުވަހުން ފެށިގެން ސިލްސިލާ ކަންމަތީ ބައްދަލުވުންތަކެއް ބާއްވަމުން ދެއެވެ. އެބައްދަލުވުންތަކުގައި ރައީސް މުޙައްމަދު ނަޝީދާއި، މާލެއަށް ނިސްބަތްވެވަޑައިންނަވާ މަޖިލިސް މެންބަރުންގެ އިތުރުން، ސިޓީ ކައުންސިލަރުންނާއި، ޑިމޮކްރެޓުންގެ ޙަރަކާތްތެރިން ވާހަކަދައްކަވާނެއެވެ.
