ޑރ. އިޔާޒަށް ހަޖަމު ނުވި ފޮޓޯގަނޑު

ސޯޝަލް މީޑިޔާގައި ޑރ. މުޙައްމަދު އިޔާޒަށް ޓެކްކޮށް ޕޯސްޓުކުރި ފޮޓޯގަނޑު ޑރ. މުޙައްމަދު އިޔާޒަށް ކަމަކު ނުދިޔައެވެ. އެ ފޮޓޯގައި ފެންނަނީ، މިއަހަރުގެ ރިޔާސީ އިންތިޚާބުގައި ޕީއެންސީއިން ވާދަކުރައްވާ ކެންޑިޑޭޓް މުޙައްމަދު މުޢިއްޒު އިމާމުވެ ނަމާދު ކުރައްވަން ހުންނަވަނިކޮށެވެ.

އެގޮތުން އޭނާ ދެންމެ ކުރި ޓްވީޓެއްގައި ބުނެފައިވަނީ، 2023 ސެޕްޓެމްބަރު 9 ވަނަ ދުވަހު އޮންނަ އިންތިޚާބަކީ ދިވެހި ރައްޔިތުން ގޮވައިގެން އިމާމްވެ ނަމާދުކުރާނީ ކާކުތޯ ބަލަން ބާއްވާ އިންތިޚާބެއް ނޫން ކަމަށެވެ.

ޑރ. އިޔާޒު އިތުރަށް ވިދާޅުވީ، އެއީ ކުރިޔަށް އޮތް ފަސް އަހަރު ދުވަހު ޤައުމުގެ ހުރިހާކަމެއް ބަލަހައްޓާ ހިންގުމުމުގެ ހުންގާނު ޙަވާލުކުރާނީ ކާކާތޯ ބަލަން ބާއްވާ އިންތިޚާބެއް ކަމަށާއި، ނަމާދުގެ އިމާމްގެ ކިބައިގައި ހުންނަންޖެހޭ ޝަރްޠުތަކަކީ ތަފާތުކަމެއް ކަމަކަށެވެ.

ޤައުމުގެ ހުންގާނު ޙަވާލުކުރަންވާނީ ތިމާ އާއި ޚިޔާލުތަފާތުވާ މީހުންވެސް އެކަހެރިނުކޮށް ގޮވައިގެން އުޅެން ދަންނަފަދަ ބޭފުޅެއް ކަމަށާއި، މިގޮތުން ބަލާއިރު މިކަމަށް އެންމެ ޤާބިލް ބޭފުޅެއްކަމުގައި ފެންނަނީ ރައީސް އިބްރާހީމް މުޙައްމަދު ޞާލިޙް ކަމަށެވެ.

2023 ސެޕްޓެމްބަރު 9 ވަނަ ދުވަހު އޮންނަ އިންތިޚާބަކީ ދިވެހި ރައްޔިތުން ގޮވައިގެން އިމާމްވެ ނަމާދުކުރާނީ ކާކުތޯ ބަލަން ބާއްވާ އިންތިޚާބެއް ނޫން. އެއީ ކުރިޔަށް އޮތް ފަސް އަހަރު ދުވަހު ޤައުމުގެ ހުރިހާކަމެއް ބަލަހައްޓާ ހިންގުމުމުގެ ހުންގާނު ޙަވާލުކުރާނީ ކާކާތޯ ބަލަން ބާއްވާ… https://t.co/brhZzWslds

— Dr.Mohamed Iyaz (@dr_iyaz) August 29, 2023

މިކަމާ ގުޅިގެން އޭގެ ވަގުތުކޮޅެއް ފަހުން އަނެއްކާވަނީ އެހެން ޓްވީޓެއް އޭނާ ކުރައްވާފައެވެ. އޭނާ ވިދާޅުވީ، އިމާމްވެ ނަމާދު ކުރަން ޖެހޭނީ އެޖަމާޢަތަކަށް ޙާޟިރުވެހުރި އެންމެ ބޮޑަށް ޤުރްއާން ހިތުދަސް، އަދި ނަމާދުގެ ފިޤްހީ މައްސަލަތައް އެންމެ ބޮޑަށް ދަންނަމީހަކު ކަމަށާއި، އެއީ ވަކި ދުވަސްވަރެއްގައި ފޮޓޯ ނަގަން ކުރާކަމަކަށް ވެގެން ނުވާނެ ކަމަށާއި، ނޫންނަމަ މާޢޫން ސޫރަތުގައި އެވާ ވަޢީދުގެ ތެރެއަށް ވަދެގެން ހިނގައިދާނެ ކަމަށެވެ.

އިމާމްވެ ނަމާދު ކުރަން ޖެހޭނީ އެޖަމާޢަތަކަށް ޙާޟިރުވެހުރި އެންމެ ބޮޑަށް ޤުރްއާން ހިތުދަސް، އަދި ނަމާދުގެ ފިޤްހީ މައްސަލަތައް އެންމެ ބޮޑަށް ދަންނަމީހަކު. އެއީ ވަކި ދުވަސްވަރެއްގައި ފޮޓޯ ނަގަން ކުރާކަމަކަށް ވެގެން ނުވާނެ. ނޫންނަމަ މާޢޫން ސޫރަތުގައި އެވާ ވަޢީދުގެ ތެރެއަށް ވަދެގެން…

— Dr.Mohamed Iyaz (@dr_iyaz) August 29, 2023

ޑރ. އިޔާޒަކީ އަދާލަތު ޕާޓީގެ އެކްޓިވެސްޓެއްގެ ގޮތުގައި ސޯޝަލް މީޑިއާގައި ބަސްފުޅު ވިދާޅުވެ، ވަރަށް ގިނަ ބޭފުޅުންނާ ޖަދަލުކުރައްވަމުން ގެންދަވާ ބޭފުޅެކެެވެ. މިހާރަކަށް އައިސް ޑރ. އިޔާޒު ދީނީ ކަންކަމުގައި ބަސްފުޅު ވިދާޅުވަމުން ގެންދަވަނީ ވަކި އަތަކަށް ޖެހިގެން، ރައީސް ޞާލިޙް ޕްރޮމޯޓްކުރަންކަމަށް ގިނަ ބަޔަކު ފާހަގަކުރެއެވެ.