ޕީއެންސީގެ ކެންޑިޑޭޓް ޑރ.މުހައްމަދު މުއިއްޒު މިރޭ ލ.އަތޮޅަށް ކޮށްދެއްވާނެ ބައެއް ކަންކަން އިއުލާން ކުރައްވައިފިއެވެ.
އެމަނިކުފާނު މިކަން އިޢުލާން ކުރައްވާފައިވަނީ، ރޭ ލ. ފޮނަދޫގައި ބޭއްވި ކެމްޕެއިން ޖަލްސާގައި ވާހަކަ ދައްކަވަމުންނެވެ.
އެންމެ މުހިއްމު އެއް ވައުދެއްގެ ގޮތުގައި ޑރ. މުއިއްޒު ވެވަޑައިގެންނެވީ ވެރިކަން ލިބިވަޑައިގެންފިނަމަ ލ.އަތޮޅު ގާދޫގައި ޓްރާންޝިޕްމެންޓް ބަނދަރެއް ހައްދަވާނެ ކަމުގެ ވައުދެވެ. ދެން ވިދާޅުވީ ލ.އަތޮޅުގެ ހުޅިމެންދޫގައި ރިސޯޓެއް ތަރައްގީކޮށް އެއީ އަމަލީ މައިދާނުގައި ތަޖުރިބާތައް ލިބޭ ހޮޓެލް ސްކޫލަކަށް ހައްދަވާނެ ކަމަށެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ލ.އަތޮޅު ބަރެސްދޫގައި އިއުލާން ކުރެއްވެވި އިންޓަގްރޭޓެޑް ޓްއަރިޒަމް މަޝްރޫއު ކުރިއަށް ގެންދަވާނެ ކަމަށް ވެސް މުއިއްޒު ވައުދުވެ ވަޑައިގެންނެވިއެވެ.
މުއިއްޒު ވިދާޅުވީ ހައްދުއްމައްޗަކީ އާބާދީ އެއްފަސްކޮށް ދިވެހިރާއްޖޭގެ މުސްތަގުބަލް ބިނާ ކުރުމުގައި މުހިއްމު ދައުރެއް އަދާކުރެވޭނެ އަތޮޅެކެވެ.
"ރާއްޖެ ތަރައްގީ ކުރެވޭނީ އާބާދީ އާއި ތަރައްގީ އެއްފަސް ކުރެވިގެން. އެއީ ގަދަކަމުން ކުރެވޭނެ ކަމެއް ނޫން. ކުރާނެ ކަމެއް ވެސް ނޫން. ނަމަވެސް އެވިސްނުމުގެ ދަށުން ކުރިއަށް ދާނަން. ހައްދުއްމަތިން އެމުސްތަގުބަލް ފެންނަން އެބައޮތް."
މުއިއްޒު ވިދާޅުވިއެވެ.
މުއިއްޒު ވިދާޅުވީ އޭނާގެ ސަރުކާރެއްގައި ރާއްޖޭގެ ތިން ސަރަހައްދެއްގައި ލޭންގްއޭޖް ސްކޫލެއް ގާއިމު ކުރާނަން ކަމަށާއި އޭގެތެރެއިން އެއް ސްކޫލް ހުންނާނީ ލ.އަތޮޅު ފޮނަދޫގައި ކަމަށެވެ.
ހަމައެހެންމެ، ފޮނަދޫގެ ސަރުކާރު އޮފީސްތައް އެއްފުރާޅެއްގެ ދަށަށް ގެނައުމަށް ބޮޑު އޮފީސް ކޮޕްލެކްސްއެއް އަޅަން ވެސް މުއިއްޒު ވިދާޅުވިއެވެ.
ހައްދުއްމައްޗަކީ ބިން ބޮޑު އަތޮޅެއްކަން ފާހަގަ ކުރައްވާ މުއިއްޒު ވިދާޅުވީ ކޮންވެންޝަންތައް ބޭއްވުމަށް ކޮންވެންޝަން ސެންޓަރެއް ހައްދުއްމަތީގައި ގާއިމު ކުރާނަން ކަމަށެވެ. އަދި އޭގެ އިތުރުން އައްސޭރި ޓޫރިޒަމްގެ ބޮޑު މަޝްރޫއެއް ކުރިއަށް ގެންދިއުމަށާއި ލ.ގަމު ރީޖަނަލް ހޮސްޕިޓަލް ޓާޝަރީ ފެންވަރަށް ތަރައްގީ ކުރައްވާނަން ކަމަށް ވެސް މުއިއްޒު ވިދާޅުވިއެވެ.
ކައްދޫ އެއާޕޯޓް އިންޓަނޭޝަނަލް ކުރުމަށާއި ލ.އަތޮޅުގައި އިތުރު އެއާޕޯޓެއް އެޅުމަށް ވެސް މުއިއްޒު ވައުދުވެ ވަޑައިގެންނެވިއެވެ. އޭގެ އިތުރުން ގަމާއި ފޮނަދޫގެ ހުރިހާ މަގެއްގެ ތާރު އަޅަން މުއިއްޒު ވައުދުވެ ވަޑައިގެންނެވިއެވެ.
"ރާއްޖޭގެ މުސްތަޤްބަލަށްޓަކައި ވަރަށް މުހިއްމު ދައުރެއް އަދާކުރާނެ އަތޮޅަކަށް ހައްދުއްމަތި ވާނެ. މިރަށުގައި ބިން ހިއްކުމުގެ މަޝްރޫއު ކުރިއަށް ގެންދާނަން. އެއީ އާބާދީ އެއްފަސްކޮށް އިޤްތިޞާދީ ނަފާ އިތުރު ކުރަން ކުރިއަށް ގެންދާނެ މަޝްރޫއެއް. ގެދޮރުވެރިކަމުގެ އެކަށީގެންވާ މަޝްރޫއެއް ކުރިއަށް ގެންދަން ޖެހޭނެ."
މުއިއްޒު ވިދާޅުވިއެވެ.
މުއިއްޒު ވިދާޅުވީ ރައްޔިތުންނަށް ފައިދާވާ ގޮތައް ފަށާފައި އޮތް އެއްވެސް މަޝްރޫއެއް ހުއްޓައެއް ނުލާނަން ކަމަށާއި ނަމަވެސް ރައްޔިތުންނަށް ފައިދާވާ ގޮތައް އެމަޝްރޫއެއް ކުރިއަށް ގެންދަން ގެންނަން ޖެހޭ ބަދަލުތައް ގެންނަވާނެ ކަމަށެވެ.
