ކޯޓުތަކުގެ ފުރާޅުން ޓިނު ނަގާ ތަން ދެކޭކަށް ދެނެއް ރައްޔިތުން ބޭނުމެއް ނުވޭ: ރައީސް ޞާލިޙް

ކުރީގެ ސަރުކާރުތަކުން ވަނީ ކައުންސިލްތަކުގެ ބޭނުން ކަނޑުވާ މުވައްސަސާތައް އަޅުވެތިކޮށްފައި ކަމަށާއި ކޯޓުގެ ފުރާޅުން ޓިނު ނަގައިގެންނާއި ފަނޑިޔާރުން ބިންމަތިކޮށްފައިވާކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ވިދާޅުވެއްޖެއެވެ.

ރޭ އަލިމަސް ކާމިވާގައި ބޭއްވި އެމްޑީޕީގެ ބޮޑު ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، ކުރީގެ ސަރުކާރުތަކުން ވަނީ ކައުންސިލްތަކުގެ ބޭނުން ކަނޑުވާ މުވައްސަސާތައް އަޅުވެތިކޮށްފައި ކަމަށާއި ކޯޓުގެ ފުރާޅުން ޓިނު ނަގައިގެންނާއި ފަނޑިޔާރުން ބިންމަތިކޮށްފައިވާ ކަމަށެވެ. އެހެންނަމަވެސް އެފަދަ ހާލަތަކަށް ޤައުމުދާކަށް ރައްޔިތުން މިހާރު ނޭދޭ ކަމަށް އެމަނިކުފާނު ވިދާޅުވިއެވެ.

"ކައުންސިލްތައް ގަނޑުކޮށް ސަސްޕެންޑުކުރާ ޤައުމަކަށް މިޤައުމުވާކަށް ދެނެއް ރައްޔިތުން ބޭނުމެއް ނުވޭ، މުވައްސަސާތައް އަޅުވެތިކޮށް، ކޯޓުތަކުގެ ފުރާޅުން ޓިނު ނަގާ، ފަނޑިޔާރުން ބިންމަތިކުރާތަން ދެކޭކަށް ދެނެއް ރައްޔިތުން ބޭނުމެއް ނުވޭ. ޖުޑީޝަރީ އާއި ރައްޔިތުންގެ މަޖިލިސް ގުޅަކުޅޭ ފަސްގަނޑަކަށް ހަދަން ރައްޔިތުން ބޭނުން ނުވޭ." ރައީސް ވިދާޅުވިއެވެ.

ރައީސް ވިދާޅުވީ، ޔާމީން ސަރުކާރުގައި އޮޑިޓަރ ޖެނެރަލް ނިޔާޒް މަޤާމުން ވަކިކުރަންވެގެން، އެމްއެމްޕީއާރުސީ މައްސަލައިގައި އޭރުގެ ރައްޔިތުންގެ މަޖިލީހުގެ ރައީސް ރިޕޯޓެއް ހެދުމަށްފަހު ރައީސުލްޖުމްހޫރިއްޔާއަށް އެރިޕޯޓް ހުށަހެޅުމުން ރޭގަނޑެއްގައި ރައްޔިތުންގެ މަޖިލިސް ހުޅުވައިގެން ގަދަކަމުން މެންބަރުން ލައްވައި ވޯޓު އެޅުއްވި ކަމަށެވެ.

މިސަރުކާރުން ރާއްޖެއަށް ތަރައްޤީ އިންތިހާއަށް ގެނެވިފައިވާ ކަމަށާއި ރައްޔިތުން އެކަން ވަރަށް ފުރިހަމައަށް ބަލައިގެންފި ކަމަށް ރައީސް ވިދާޅުވިއެވެ.

ރާއްޖޭގެ 16 އަތޮޅަކަށް ދިޔުމުން ފެނިގެން ދިޔައީ ރައްޔިތުން އަނިޔާވެރިކަމަށް އެނބުރި ދާން ބޭނުން ނުވާ ކަމަށާއި ކުޑަރަށެއް ބޮޑު ރަށެއް ނުބަލާ މި ސަރުކާރުން ގެނައި ތަރައްޤީއާމެދު ރައްޔިތުން ހަމަޖެހިފައިވާ މަންޒަރުކަމަށް ރައީސް ވިދާޅުވިއެވެ