މާދަމާ އޮންނަ ރިޔާސީ އިންތިޚާބަށް އަމިއްލަ ގޮތުން ކުރިމަތިލައްވާފައިވާ ކެންޑިޑޭޓް އަޙްމަދު ފާރިސް މައުމޫންގެ ކެމްޕެއިން ނިންމުމުގެ ޙަރަކާތްތަައް މިއަދުގެ 2 ޖަހާއިރު ފަށާގޮތަށް ހަމަޖެހިއްޖެއެވެ.
ފާރިސްގެ ކެމްޕެއިން އޮފީހުން ހާމަކުރައްވާފައިވާ ގޮތުގައި، ކެމްޕެއިން ނިންމުމުގެ ޙަރަކާތްތައް މިއަދު ފެށުމަށް ހަމަޖެހިފައިވަނީ މެންދުރުފަހު 2 ޖަހާއިރުން ފެށިގެން ކަމަށާއި، އެ ޙަރަކާތަކީ މާލޭ ސީ ހައުސް ކެފޭގައި އޮންނަ "ފާރިސްއާއެކު ކޮފީ" މި ހަރަކާތެވެ. މިހަރަކާތުގައި ފާރިސްގެ މެނިފެސްޓޯގެ ވަޢުދުތަކާމެދު މަޝްވަރާކުރެވޭނެ ކަމަށް މަޢުލޫތު ދެއްވައެވެ. އަދި މި ހަރަކާތް ނިންމާލުމަށް ހަމަޖެހިފައިވަނީ 3 ޖަހަންދެެން ކަމަށްވެސް މަޢުލޫމާތު ދެއްވައެވެ.
އެންމެ ފަހު ޙަރަކާތެއްގެ ގޮތުގައި އޮންނާނީ ސީ ހައުސް ކުރިމަތިން ފެށޭ ހިނގާލުމުގެ ހަރަކާތެއް ކަމަށާއި، އެ ޙަރަކާތް ކުރިއަށްދާނީ ހަވީރު 4 އިން 6 އަށް ކަމަށްވެސް ފާރިސްގެ ކެމްޕެއިން އޮފީހުން މަޢުލޫމާތު ދެއްވައެވެ.
އަދި މި ޙަރަކާތްތަކުގައި ބައިވެރިވުމަށް ފާރިސްގެ ކެމްޕެއިން އޮފީހުން ދަޢުވަތު ދެއްވައެވެ.
