ރާއްޖެ އާއި ޗާގޯސް އާއި ދެ،ެދު އޮންނަ ކަނޑުގެ ސަރަހައްދުން ފުށު އަރާ ސަރަހައްދުގެ އިން ވަކިކުރުމުގެ މައްސަލަ ބަލަމުންދަނިކޮށް ރައީސް އިބްރާހިމް މުހައްމަދު ޞާލިހު މޮރިޝަސްގެ ބޮޑުވަޒީރަށް ފޮނުއްވި ކަމަށް ބުނާ ސިޓީއެއް، އެއްވެސް ރަސްމީ ހައިސިއްޔަތެއް ނެތި ލީކުކޮށްލުމުން އެ ސިޓީއާމެދު ސުވާލު އުފެދިއްޖެއެެވެ.
މޮރިޝަސްއަށް ރައީސް ޞާލިހް ފޮނުއްވި ސިޓީއަކީ ރައީސުލްޖުމްހޫރިއްޔާ އޮފީހުގެ ސިއްރު ސިޓީއެއް ކަމަށްވާތީވެ، ސަރުކާރުގެ އެންމެ މަތީ ވެރިން ބޭނުން ވެގެން ނޫން ގޮތަކަށް އެސިޓީ ވެސް އަދި އެފަދަ އެހެން ލިޔުމެއް ވެސް ލީކް ކުރުމުގެ ފުރުސަތު އޮންނާނެ ކަމަކަށް ނުބެލެވެއެވެ.
ކާކުކަން ނޭނގޭ ޓްވިޓާ އެކައުންޓަކުން ލީކްކޮށްލި ސިޓީއަކީ ރައީސް ޞާލިހް މޮރިޝަސްއަށް ފޮނުވި ސިޓީކަމަށް ރައީސް އޮފީހުގެ ތަރުޖަމާން މިއުވާން މުހައްމަދު ވެސް މިހާރު ވަނީ ކަށަވަރު ކޮށްދެއްވާފައެވެ. އަދި އެކަން ބަލަމުންދާ ކަމަށްވެސް އޭނާ ވިދާޅުވިއެވެ.
އެ ލިޔުމުގައި ރާއްޖޭގެ ކަނޑުން ބައެއް ގެއްލުމުގެ ވާހަކައެއް ނެތް ނަމަވެސް މީގެ ކުރިން ވެސް ގާނޫނީ ތަޖުރިބާކާރުންނާއި އަދި މައްސަލައިގައި އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އިން ނިންމި ނިންމުމުގައި ވެސް ވަނީ ރާއްޖެ އިން އެތައް އަހަރެއް ވަންދެން ޗާގޯސްއަކީ މޮރިޝަސްގެ ބާރު ނުހިނގާ ސަރަހައްދެއް ކަމަށް ކުރަމުން އައި ދައުވާ ރައީސް ޞާލިހްގެ ސިޓީން އަނބުރާ ގެންގޮސްފައިވާކަން ފާހަގަ ކޮށްފައެވެ.
ސިޓީ ސަރުކާރުން ލީކް ކޮށްލާފައި މިވަނީ ހޮނިހިރު ދުވަހުގެ އިންތިހާބުގެ ނަތީޖާ ނިކުތް ގޮތުން އާއްމު ކުރެވެން ހުރި ހުރިހާ އެއްޗެއް އާއްމު ކުރާނެ ކަމަށް ރައީސް ޞާލިހް ވިދާޅުވެފައި ވަނިކޮށެވެ.
ކުރިއަށް އޮތް ދުވަސްތަކުގައި އިންޑިއާއެކު ހަދާފައިވާ އެއްބަސްވުންތަކެއް ކަމަށް ބުނެ ލިޔުންތަކެއް ވެސް ލީކް ކުރަން ވެސް މަސައްކަތްކުރަމުން އެބަދެއެވެ. އެފަދަ ލިޔުންތައް ލީކް ކުރަން ސަރުކާރުން ތައްޔާރުވަމުން އަންނަ ކަމަށް، ގިނަ ފަރާތްތަކަކުން ވަނީ ތުހުމަތުކޮށްފައެވެ.
