މައާފަށް އެދޭނީ ހަގީގަތުގައި ވެސް އެދެން ޖެހޭ ހާލަތެއްގައި ކަމަށާއި ކުޑަކަކޫ ޖަހާނީ ﷲގެ ހަޟްރަތުގައި އެކަނި ކަމަށް ވިދާޅުވެ އެމްޑީޕީގެ ޗެއާޕާސަން އަދި އިކޮނޮމިކް މިނިސްޓަރު ފައްޔާޒު އިސްމާއިލް ދަ ޑިމޮކްރެޓްސްއަށް މިރޭ ރައްދު ދެއްވައިފިއެވެ.
އެމަނިކުފާނު ޑިމޮކްރެޓުންނަށް ރައްދުދެއްވާފައިވަނީ، ރިޔާސީ އިންތިހާބުގެ ފުރަތަމަ ބުރުގައި ދެވަނަ ލިބިވަޑައިގެންނެވި ނާކާމިޔާބީއަށް ފަހު، ދެވަނަ ބުރަށް ކެމްޕޭން ފެއްޓެވުމަށް ރައީސް އިބްރާހިމް މުހައްމަދު ސޯލިހު އެމަނިކުފާނުގެ ކެމްޕޭނު ޓީމާ އެކު ދަނޑިކޮށި ޖަގަހައިގައި ބޭއްވެވި ބައްދަލު ކުރެއްވުމުގައި ވާހަކަދައްކަވަމުންނެވެ.
ފައްޔާޒު ވަނީ ޑިމޮކްރެޓްސްގެ ޗެއާޕާސަންގެ ނައިބު އަދި ނ. އަތޮޅު ކައުންސިލްގެ ރައީސް މުހައްމަދު ބަޝީރު މިއަދު ހަވީރު އެ ޕާޓީގެ ވަގުތީ ކައުންސިލްގެ ބައްދަލުވުމުގައި ދެއްކެވި ވާހަކައަށް ރައްދު ދެއްވައިފައެވެ.
ދެވަނަ ބުރުގައި މަޖިލީހުގެ ރައީސް މުހައްމަދު ނަޝީދާއި ޑިމޮކްރެޓްސްގެ ތާއީދު ހޯދުމަށް އެމްޑީޕީން ބޭނުންވާތީ އެކަމަށް އިޝާރާތްކުރައްވައި ބަޝީރު ވިދާޅުވީ ޑިމޮކްރެޓްސް އިން އެއްވެސް ކަމެއްގައި އެމްޑީޕީއާ ވާހަކަ ދައްކާނީ ރައީސް ޞާލިހު ޕާބްލިކް ޓީވީގައި، ނަޝީދުގެ ކިބައިން މައާފަށް އެދިވަޑައިގަތުމުން ކަމަށެވެ.
ޑިމޮކްރެޓްސްގެ އެ ވާހަކައަށް އިޝާރާތް ކުރައްވާ ފައްޔާޒު މިރޭ ވިދާޅުވީ މައާފަށް އެދެންޖެހޭ ހާލަތުގައި އެކަން ކުރަން ޖެހިލުމެއް ނުވާނެ ކަމަށާއި އެކަމަކު ކުޑަކަކޫ ޖަހާނެ އިތުރު ފަރާތެއް ނެތް ކަމަށެވެ.
"އަޅުގަނޑުމެން ކުޑަކަކޫ ޖަހާނީ ހަމައެކަނި ﷲ ސުބްހާނަހޫ ވަތައާލާގެ ހަޒުރަތުގައި. އަޅުގަނޑުމެން ކުޑަކަކޫ ޖަހާނެ އެހެން އެއްވެސް ފަރާތެއް ނެތް. އަޅުގަނޑުމެން މައާފަށް އެދޭނީ، އަޅުގަނޑުމެން ހަގީގަތުގައި ވެސް މައާފަށް އެދެން ޖެހޭ ހާލަތުގައި. އަޅުގަނޑުމެން ޖެހިލުމެއް ވެސް ނުވާނެ މައާފަށް އެދޭކަށް ވެސް،" ފައްޔާޒު ވިދާޅުވި އެވެ.
ފައްޔާޒު ވިދާޅުވީ މާލޭގައި އެމްޑީޕީ އިން ބޭއްވި 'އުފާވެރި މާލެ' ޖަލްސާގައި، އިންތިހާބު %56 އިން ކާމިޔާބު ކުރާނެ ކަމަށް އޭނާ ވިދާޅުވުމުން، ދެން މޮޅުވީ ކަމަށް ހީކޮށް ވަރަށް ގިނަ އަދަދެއްގެ މީހުން ވޯޓުލާން ނުގޮސް ތިބި ކަމަށެވެ.
"އަޅުގަނޑު %56 އިން މޮޅުވާ ވާހަކަ ދެންނެވީމާ ވަރަށް ގިނަ ބޭފުޅުން ވޯޓުލާން ނުގޮސް ތިބި، މޮޅުވާތީ. އެހެންވެ އެކަމަށް ތި އެންމެހާ ބޭފުޅުންގެ އަރިހުން އަޅުގަނޑު މައާފަށް އެދެން،" އޭނާ ވިދާޅުވި އެވެ.
އެ އަދަދަށް އެމްޑީޕީ އަށް ވޯޓު ލިބޭ ކަމަށާއި އެހެން ނަމަވެސް މޮޅުވެފައި އޮތް އިންތިހާބެއްގައި ވޯޓުލާން ގިނަ އަދަދެއްގެ ސަޕޯޓަރުން ނުނިކުންނަ ކަމަށް ފައްޔާޒު ވިދާޅުވިއެވެ.
"ފަސޭހަ ކަމެއް ނޫން، ވޯޓުލާން ދިޔުމަކީ ބޮޑެތި ކިޔުތަކުގައި ޖެހިގެން،"
ވޯޓުގެ އިންތިޒާމުތަކަށް ފާޑުވިދާޅުވަމުން ފައްޔާޒު ވިދާޅުވިއެވެ.
ގުޅުންހުރި:
ޕަބްލިކް ޓީވީގައި މާފަށް ނޭދޭނީސް ބަލާވެސް ނުލާނަން އެމްޑީޕީއަށް: ބަޝީރު
