މި ސަރުކާރުން ދިން ފްލެޓްތަކުގެ ފިނިޝިންގއަށް ރައްޔިތުން އަތުން ދިޔަ ޚަރަދުގެ އެވްރެޖް އަދަދު އަނބުރާ ދެއްވާނެ ކަމަށާއި ކޮންމެ އިމާރާތެއްގައި އިތުރު ލިފްޓެއް ބަހައްޓާނެ ކަމަށް ޕީއެންސީގެ ރިޔާސީ ކެނޑިޑޭޓް ޑރ.މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ހުޅުމާލޭ ރައްޔިތުންނާއި ބައްދަލުކޮށް މިރޭ ދެއްކެވި ވާހަކަފުޅުގައެވެ.
މުއިއްޒު ވިދާޅުވީ، މިސަރުކާރުން ތަކެތީގެ އަގު ބޮޑުކުރުމާއި ގުޅިގެން ރައްޔިތުންނަށް ލިބިފައިވާ ތަންތަނަށް ކުލި ދެއްކުން ދަތި އުނދަގޫ ކަމަކަށް ވެފައިވާ ކަމަށާއި ކުލި ނުދައްކާ ލަސްވުމުން އަރާފައިވާ ހުރިހާ ޖޫރިމަނާއެއް މާފުކުރާނެ ކަމަށެވެ.
"ކުލި ދެއްކުމުގައި ވަރަށް ދަތިތައް ދިމާވެފައި މިވަނީ، ވަރަށް ބޮޑަށް ޖޫރިމަނާ އަރާފައި މިވަނީ ކުލި ދެއްކުން ލަސްވެގެން. އޯގާތެރި ސަރުކާރެއް ޤާއިމުކުރަން މިއަންނަނީ އަޅުގަނޑުމެން އިރާދަކުރެއްވިއްޔާ، ސޯޝަލް ހައުސިން އެއްވެސް ސްކީމެއްގެ ދަށުން ދައްކަން ޖެހިފައިވާ އަގު ދެއްކުމުގައި އެ ދިމާވެފައިވާ ދައްޗެއްގެ ސަބަބުން ނުދެއްކި ލަސްވެގެން އަރާފައި ހުރި ޖޫރިމަނާތައް އެއްކޮށް މާފުކޮށްދޭނަން." މުއިއްޒު ވިދާޅުވިއެވެ.
ހަމައެހެންމެ، ރާއްޖޭގެ އެކި ކަންކޮޅުތަކުން ރައްޔިތުންނަށް ފޯރުކޮށްދީފައިވާ ސޯޝަލް ހައުސިންގ ޔުނިޓްތަކުގެ ކުލި ނުދެއްކި ލަސްވަމުންދާތީ ގިނަ އަދަދެއްގެ ފައިސާ ވަނީ ޖޫރިމަނާގެ ގޮތުގައި އަރާފައެވެ. އެހެންކަމުން އެ ޖޫރިމަނާ ފައިސާ މާފުކޮށް ރައްޔިތުންނަށް އިތުރަށް ބޯހިޔާވަހިކަން ފޯރުކޮށްދޭނެ ކަމަށް މުއިއްޒު ވަނީ ވިދާޅުވެފައެވެ.
މުއިއްޒު ވިދާޅުވީ މިސަރުކާރުން އެއްވެސް މީހަކަށް ދީފައިވާ ވަޒީފާއެއް ނުވަތަ ގޯއްޗެއް ވިޔަސް އަނބުރާ އަތުނުލާނެ ކަމަށާއި ފަށާފައިވާ މަޝްރޫޢުތައް ހުއްޓާނުލާބެ ކަމަށެވެ. އަދި އެކިއެކި ސިނާއަތްތަކުން ރާއްޖެއަށް އާމްދަނީ ލިބޭނެ ގޮތް ހަދައިދޭނެ ކަމަށާއި މެދުފަންތި އާއި ކުދި ފަންތީގެ ވިޔަފާރިތައް އިތުރަށް ފުލާކޮށް ރައްޔިތުންގެ ޖީބުތައް ފުރާލާނެ ކަމަށް މުއިއްޒު ވަނީ ވައުދުވެފައެވެ.
އިންތިޚާބުގެ ދެވަނަ ބުރަށް ދިވެހި ރައްޔިތުން ކުރިމަތިލާއިރު އިންތިޚާބުގައި ވާދަކުރެއްވި ސިޔާސީ ލީޑަރުންނާއި، ޕާޓީތަކުގެ އިސްބޭފުޅުންނާއި ޢާންމު މެމްބަރުންވެސް އެންމެ ބޮޑަށް އިސްކަންދޭންވީ ސިޔާސީ ގޮތުން ލިބޭ މަންފާއަކަށްވުރެ ޤައުމާއި ރައްޔިތުން އިސްކޮށް ނިންމާ ނިންމުމެއް ނިންމުމަށް ކަމަށެވެ..
