ދިވެހި ސަރުކާރުން ރާވައިގެން ސަރުކާރުގެ އެކި މަގާމުތަކުގައި ތިބި ބައެއް މީހުންނާއި ރާއްޖޭގައި އުޅޭ ބިދޭސީންނަށް ހަމަލާ ދިނުމަށް ރާވަމުންދާ ކަމަށް ފަތުރަމުންދާ ވާހަކައިގައި އެއްވެސް އަސާސެއް ނެތް ކަމަށް ފުލުހުން ވިދާޅުވެއްޖެއެވެ.
ފުލުހުން ނެރުނު ނޫސްބަޔާނެއްގައި ބުނީ މިފަދަ ހަމަލާއެއް ދޭން އުޅޭކަމުގެ މައުލޫމާތު ލިބިފައިވާ ކަމަށާއި އެ މައުލޫމާތު ފުލުހުންނަށް ވެސް ލިބިފައިވާ ކަމަށް ބުނެ ސޯޝަލް މީޑިއާ އާއި އޮންލައިން ނޫހެއްގައި ހަބަރު ފަތުރަމުންދާ ކަމަށާއި، ސަރުކާރުގެ ނުވަތަ ދައުލަތުގެ މުވައްޒަފުންނާއި ރާާއްޖޭޭގައި އުޅޭ ބޭރު ގައުމުތަކުގެ މީހުންނަށް ޓާގެޓުކޮށްގެން ހަމަލާއެއް ދިނުމަށް އެއްވެސް ފަރާތަކުން ރާވާފައިވާ ކަމުގެ އެއްވެސް މައުލޫމާތެއް ފުލުހުން ނުވަތަ ސަލާމަތީ ހިދުމަތަކަށް ލިބިފައިނުވާ ކަމަށެވެ.
"މި މައުލޫމާތު ސޯޝަލް މީޑިއާގައި އާންމުކުރި ފަރާތުން މިއީ އެއްވެސް އަސާސެއްގެ މައްޗަށް ބިނާކޮށް ފެތުރި މައުލޫމާތެއްތޯ ސާފުކުރުމަށް ސުވާލުކުރުމުން މިފަދަ މައުލޫމާތެއް ލިބިފައިވާ ކަމަށް ބުނުން ފިޔަވައި މިއީ ސައްހަ އަސާސެއްގެ މައްޗަށް ބިނާކޮށް ފެތުރި މައުލޫމާތެއް ކަމަށް ބުރަވެވޭ ފަދަ އެއްވެސް ހަރުދަނާ ސަބަބެއް ބަޔާންކޮށްފައިނުވެ އެވެ. އަދި މި މައުލޫމާތު ލިބުނު ފަރާތެއް ހިއްސާކުރުމަށް އުޒުރުވެރިވެފައިވެ އެވެ،"
ފުލުހުން ވިދާޅުވެއެެވެ.
މިކަން ދޮގުކުރައްވަމުން ފުލުހުން އިތުރަށް ވިދާޅުވީ، މި މައުލޫމާތު ފެތުރި ގޮތާއި ސަލާމަތީ ހިދުމަތްތަކުގެ މައުލޫމާތާއި އިންޓެލިޖެންސްއަށް ބަލާއިރު މިއީ އެއްވެސް އަސާސެއް ނެތި ރައްޔިތުންގެ ތެރޭގައި ހާސްކަމާއި ބިރުވެރިކަން އުފައްދައި، ސިޔާސީ މަގުސަދެއް ހާސިލްކުރުމަށް ފެތުރި، އަސްލެއް ނެތް ވާހަކަތަކެއް ކަމަށް ބެލެވޭ ކަމަށެވެ.
މި ބާވަތުގެ ދޮގު ޚަބަރުތަކާއި އާންމުންގެ ތެރޭގައި ބިރުވެރިކަމާއި ނުތަނަވަސްކަން ނުފެތުރުމަށް އިލްތިމާސް ކުރައްވަމުން، އަދި ގައުމީ މަސްލަހަތަށް އުނިކަން ލިބޭ ފަދަ ކަންކަން ނުކުރުމަށް ވެސް ފުލުހުން އެދިވަޑައިގަންނަވައެވެ.
