ނިޒާމީ ބަދަލުގެ ވޯޓާ ނެގުމާމެދު ކުރީގެ ރައީސް އަބްދުﷲ ޔާމީން ޢަބްދުލްޤައްޔޫމްއާ އެކު މަޝްވަރާކުރެއްވުމަށް، މާފުށީ ޖަލަށް ވަޑައިގަތުމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ނިންމަވައިފިއެވެ.
އެކަމާ ގުޅޭގޮތުން ރައީސް ނަޝީދު ވާހަކަދައްކަވާފައިވަނީ، މާލޭގެ ކާނިވަލު ސަރަހައްދުގައި ހުންނަ ދޮންމަނިކު ސްކައި ވިއު ރެސްޓޯރެންޓުގައި މިއަދު ސަޕޯޓަރުންނާ ބައްދަލުކުރައްވައެވެ. އެވަގުތު އެމަނިކުފާނުގެ އަރިހުގައި، ޑިމޮކްރެޓްސްގެ ރިޔާސީ ކެންޑިޑޭޓު އަދި އައްޑޫ ހުޅުދޫ ދާއިރާގެ މެމްބަރު އިލްޔާސް ލަބީބުގެ އިތުރުން ޑިމޮކްރެޓްސްގެ ރަނިންމޭޓު ހުސެއިން އަމްރު ހުންނެވިއެވެ.
"ވެރިކަމުގެ ނިޒާމަށް ބަދަލެއް ގެންނައިރުގައި ރައީސް ޔާމީނާ މިކަމުގެ މަޝްވަރާކުރުން ކޮންމެހެން ބޭނުންތެރި،" ނިޒާމީ ވޯޓުގެ ބަދަލާ ގުޅޭގޮތުން ރައީސް ޔާމީނާ މަޝްވަރާކުރުމަށް އިޝާރަތްކުރައްވަމުން ރައީސް ނަޝީދު ވިދާޅުވިއެވެ.
ނަޝީދު ވިދާޅުވީ، މާދަމާ މާފުށްޓަށް ދިޔުމަށް މަޖިލީހުގެ އަމީން އާންމުގެ އަރިހުގައި ދަންނަވައިފައިވާނެ ކަމަށާއި، ވެރިކަމުގެ ނިޒާމަށް ބަދަލެއް ގެންނަން ރައީސް ޔާމީން ދެކެވަޑައިގަންނަވާ ގޮތް އެ ބައްދަލުވުމުގައި އޮޅުންފިލުއްވާނޭ ކަމަށެވެ.
"ރައީސް ޔާމީނުގެ އަރިހުގައި ދަންނަވަން ބޭނުންވަނީ ވެރިކަމުގެ ނިޒާމަށް ބަދަލެއް ގެންނަން 25 ވަނަ ދުވަހުގެ ކުރީގައި، އެ ވޯޓު ނެގުމުގައި އެ މަނިކުފާނު ދެކެވަޑައިގަންނަވާ ގޮތަކަށް އަދި އަޅުގަނޑުމެންނަށް އެހީތެރިވެދެވެން އޮތް ގޮތެއް އޮތް ނަމަ އެ ވާހަކަ،"
ނަޝީދު ވިދާޅުވިއެވެ.
ނަޝީދު އިތުރަށް ވިދާޅުވީ އެމްޑީޕީ އިން ގޮތެއް ނިންމަންދެން މަޑުކޮށްގެން ތިބުމަކީ ހައްލެއް ނޫން ކަމަށާއި ވީހާ ވެސް އަވަހަކަށް ގޮތެއް ނިންމަން ޖެހޭ ކަމަށާއި، އެކަމުގައި ޕީޕީއެމްއާ ވެސް މަޝްވަރާ ކުރެވުނު ކަމަށާއި އެހެން ނަމަވެސް އެ ޕާޓީއާ އެކު ކުރެވުނު މަޝްވަރާތައް ހުއްޓުމަކަށް އައީ އެއްބަސްވުމުގައި ސޮއިކުރަން އެ ޕާޓީ އިން އިއުތިރާޒުކުރާތީ ކަމަށެވެ.
އަނެއްކޮޅުން ވެރިކަން ކުރާ މައި ޕާޓީ އެމްޑީޕީއަށާއި ރައީސް އިބްރާހިމް މުހައްމަދު ސޯލިހަށް މިއަދު އޮތް އެންމެ ރަނގަޅު ގޮތަކީ ގާނޫނޫ އަސާސީ އިސްލާހު ކުރުމަށް ޑިމޮކްރެޓްސްއާ އެކު މަސައްކަތް ކުރުން ކަމުގައި ނަޝީދު ވިދާޅުވިއެވެ.
"އެކަން ރައީސް ޞާލިހު ބަލައިގަންނަވައި ދެން ގާނޫނު އަސާސީއަށް ގެންނަން ޖެހޭ ބަދަލުތައް އިސްލާހުކުރަން އަޅުގަނޑުމެންނާ އެކީގައި ގެނައުމަށް މަސައްކަތް ކުރުމަކީ ބޭނުންތެރި ކަމެއް."
ރައީސް ނަޝީދު ވިދާޅުވިއެވެ.
ރައީސް އިބްރާހިމް މުހައްމަދު ޞާލިހު މި އިންތިހާބުން މޮޅު ނުވެވޭނެކަން ތަކުރާރުކޮށް ފާހަގަކުރައްވަމުން، ނަޝީދު ވިދާޅުވީ ރައީސް ޞާލިހު 2 ވަނައިގައި އޮތީ ބޮޑު ތަފާތަކުން ކަމަށާއި އެހެން ކަމުން މި އިންތިހާބުން ކާމިޔާބު ކުރުމަކީ މުސްތަހީލު ކަމެއް ކަމަށެވެ.
ކިޔުންތެރިންގެ ޚިޔާލުތައް:
ބަލަ މީހުން އެބަ ބުނޭ ފާއިތުވެ ދިޔަ ތިން ދައުރަށް ބަލާ އިރި ފުރަތަމަ ބުރުން ދެވަނަ ލިބުނު މީހާ އަށޭ އިންތިޚާބް ކާމިޔާބު ވެފަ އޮތީ އެހެންވީމަ އަދި އިބޫ ނުޖެހޭ ނޫންބާ ބަލި ގަބޫލުކޮށް ތިޔަމީހާގެ ފަހަތަށް އަރާކަށް. ޢަދި ތިބުނާ ނިޒާމް ބަދަލުކުރާ ވޯޓެއް ނެގި ޔަސް ބަރުލަމާނީ ގެނަޔަސް މިހާރު މަޖްލިސްގެ މެމްބަރުން ނަށް ބަލާއިރު އިބޫއަށް ތާއީދުކުރާ އެމްޑީޕީ މީހުން ނޫމްބާ ގިނައީ އެހެންވީމަ އަދި ނުފެނޭ އަންނިއަށް ވެރިކަން ލިބޭނެ އެއްގޮތެއްވެސް. ޞަރުލަމާނީ ގަ ކިތައްމެ އަހަރަކު ވެސް ވެތިކަމުގަ ހުރެވޭ ނޫންބާ.