ދެވަނަ ބުުރުގައި ވާދަކުރައްވާ ދެ ކެންޑިޑޭޓުންނަށް ހުށަހެޅި ކަރުދާސް ފާރިސް އާންމުކުރައްވައިފި

މިއަހަރުގެ ރިޔާސީ އިންތިޚާބަށް އަމިއްލަގޮތުން ކުރިމަތިލެއްވި އަޙްމަދު ފާރިސް މައުމޫން، ރިޔާސީ އިންތިޚާބުގެ ދެވަނަ ބުރުގައި ތާއީދު ކުރުމަށް ނިންމާ ފަރާތެއް ކަނޑައެޅުމުގެ ކުރިން އެ ދެ ފަރާތަށް ހިއްސާކޮށްފައިވާ ކަރުދާހުގެ ކޮޕީއެއް ރައްޔިތުންގެ މަޢުލޫމާތަށްޓަކައި ދާދި ދެންމެއަކު އެމަނިކުފާނު ޙިއްސާކުރައްވައިފިއެވެ.

ފާރިސް ސޯޝަލް މީޑިޔާގައި ޙިއްސާކުރައްވާފައިވާ ލިސްޓުގައި 24 ކަމެއް ފާހަގަކުރައްވާފައިވެއެވެ.

އެ ލިސްޓުގައި، އެންމެ އިސްކަންދޭ ކަމެއްގެ ގޮތުގައި ފާހަގަކުރައްވާފައިވަނީ، "ދިވެހި ޤައުމުގެ ބިންގާ ކަމުގައިވާ، އިސްލާމްދީނުގެ ތަރަޙައިގެ ތެރެއިން، ޤާނޫނު އަސާސީން ކަށަވަރު ކޮށްދީފައިވާ ޑިމޮކްރަސީގެ ހަރުދަނާ އުޞޫލުތަކާއި ހަމަތަކާއި ޚިލާފުނުވުން." މި ހުށަހެޅުމެވެ. އޭގެތެރޭގައި:

• އިސްލާމް ދީންފިޔަވައި އެހެންދީންތަކަށް ރާއްޖޭގައި ފުރުސަތު ނުދިނުން
• ދީނީގޮތުން ހަރުކަށި ފިކުރުފެތުރިގެން ދިޔަނުދިނުމަށްޓަކައި ހަރުދަނާފިޔަވަޅު ތަކެއް އެޅުން، ހިމެނެއެވެ.

ހަމައެހެންމެ، ދިގުރާސްތާގެ ޤައުމީ ތަރައްޤީގެ ޕްލޭނެއް ހެދުން ހިމެނިފައިވާއިރު އޭގެ ދަށުން ދެ ކަމެއް ފާހަގަކުރައްވާފައިވެއެވެ. އެއީ ސަރުކާރުގެ ސިޔާސަތުތަކާއި، ތަރައްޤީގެ މަޝްރޫޢުތަކަކީ ޤައުމީ ތަރައްޤީގެ ޕްލޭނެއްގެ ލަނޑުދަނޑިތަކާ އެއްގޮތަށް ކުރެވޭކަންތަށްތަކަށް ހެދުމަށްޓަކައި ދިގުރާސްތާގެ ޤައުމީ ތަރައްޤީގެ ޕްލޭނެއް އެކުލަވާލައި، ރައްޔިތުންގެ ރިފަރެންޑަމްއަކުން ފާސް ކުރުމާއި، މާލޭ ސަރަހައްދަށް މީހުން ޖަމާކުރުމުގެ ސިޔާސަތު ބަދުލުކޮށް ސަރަހައްދީ ތަރައްގީ އަށް އަމާޒުހިފުމެވެ.

ފާރިސް ހުށަހަޅުއްވާފައިވާ ކަންތައްތައް އަލަށް އުފެދޭ ސަރުކާރަކުން ޙާޞިލުކުރުމަށްޓަކައި، ޓައިމް ފުރޭމެއްވެސް ހުށަހަޅުއްވާފައިވެއެވެ. އެގޮތުން، މިހާރުން މިހާރަށް ތަންފީޒުކުރުމަށް ހުށަހަޅާ ކަންތައްތަކާއި، ވެރިކަމުގެ ފުރަތަަމަ އަހަރުގައި ކުރުމަށް ހުށަހަޅާ ކަންކަމާއި، ފުރަތަމަ 100 ދުވަހުގެ ތެރޭގައި ޙާޞިލުކުރުމަށް ހުށަހަޅުއްވާ ކަންތައްތަކާއި، އެކި މަރުޙަލާތަކުގައި ކުރުމަށް ހުށަހަޅާ ކަންކަން ހިމެނިފައިވެއެވެ.

"ރިޔާސީ އިންތިޚާބުގެ ދެވަނަ ބުރުގައި އަޅުގަނޑުމެންގެ ޓީމުން ތާއިދު ކުރުމަށް ނިންމާ ފަރާތެއް ކަނޑައެޅުމުގެ ކުރިން އެ ދެ ފަރާތަށް ހިއްސާކޮށްފައިވާ ކަރުދާހުގެ ކޮޕީއެއް ރައްޔިތުންގެ މަޢުލޫމާތަށްޓަކައި ހިއްސާ ކުރަން."

ފާރިސް ވިދާޅުވިއެވެ.

https://x.com/afarismaumoon/status/1703366540853403981?s=20

ފާރިސް ކުރިން ވިދާޅުވެފައިވަނީ، މިއަދު (އާދިއްތަ ދުވަހު) ކޯލިޝަން ހެދުމާމެދު ގޮތެއް ނިންމަވާނެ ކަމަށެވެ. އެމަނިކުފާނު މިހެން ވިދާޅުވީ، "އެކްސް" ސްޕޭސްގައި މީގެ ދެދުވަސްކުރިން ކުރިއަަށް ގެންދެވި މަޝްވަރާ ސެޝަންގައި، ބައިވެރިއަކު ކުރެއްވި ސުވާލަކަށް ޖަވާބު ދެއްވަމުންނެވެ. އެ ސެޝަންގައި 300 އަށްވުރެ ގިނަ ބައިވެރިން ތިއްބެވިއެވެ.

ފާރިސް ވިދާޅުވީ، ދެވަނަ ބުރަށް ގޮސްފައިވާ ދެ ކެންޑިޑޭޓުންނާއި، އަދި އެ ދެ ކެންޑިޑޭޓުން ނިސްބަތްވާ ދެ ޕާޓީއާ މަޝްވަރާތައް ކުރިއަށް ގެންދަވާ ކަމަށެވެ. އަދި ފާރިސްގެ މެނިފެސްޓޯގައި ހިމެނިފައިވާ ކަންތައްތައް، ދެ ޕާޓީއާވެސް މިހާތަނަށް ޙިއްސާކުރައްވާފައިވާ ކަމަށް ފާރިސް ވިދާޅުވިއެވެ.

"ވަކި ގޮތެއް ނިންމާނީ، ޕާޓީއަކާ ގުޅޭނަމަ، މެނިފެސްޓޯގައި ހިމެނިފައިވާ ކަންކަން ތަންފީޒުކުރުމުގައި އެންމެ ބޮޑު އެހީތެރިކަމެއް ލިބޭނެ ޕާޓީއަކަށް، ނަމަވެސް ނިކުންނަ ނަތީޖާއަށް ބަލާފައި ވަކި ކެންޑިޑޭޓަކަށް ތާޢީދު ނުކޮށް ތިބެންޖެހޭ ޙާލަތެއްވެސް އައިސްދާނެ."

ފާރިސް ވިދާޅުވިއެވެ.

ފާރިސް ވިދާޅުވީ، މެނިފެސްޓޯގައި ހިމެނިފައިވާ ކަންކަން ތަންފީޒުކުރުމަށް އެންމެ ބޮޑަށް ކޮމިޓްމަންޓް ދޭ ޕާޓީއަކަށް ބައްލަވާނެ ކަމަށާއި، އަދި ވަކި ކެންޑިޑޭޓަކަށް ތާޢީދުކުރައްވަން ވިސްނަވާނަމަ، އެންމެ ފަހުގެ ނިންމުމެއް ނިންމުމުގެ ކުރިން ސީދާ ދެ ކެންޑިޑޭޓުންނާވެސް ބައްދަލުކުރައްވާނެ ކުރައްވާނެ ކަމަށެވެ.

ދެވަނަ ބުރު ކާމިޔާބު ކުރުމަށްޓަކައި މިހާރު އޮތް މެނިފެސްޓޯ މިހާރަށްވުރެ ފުރިހަމަ ކުރަންޖެހޭ ކަމަށް ދެ ޕާޓީންވެސް އެއްބަސްވާ ކަމަށާއި، އެހެންކަމުން އެއީ އެމަނިކުފާނުގެ މެނިފެސްޓޯގައި ހިމެނިފައިވާ ކަންކަން އިންކޯޕަރޭޓްކުރުމަށް ލިބޭ ފެހި ސިގުނަލެއްކަމަށެވެ.

ފާރިސް އިތުރަށް ވިދާޅުވީ، ބޭނުންވަނީ ކޭކު ފޮތިން ބައެއް ހޯދުމަށް ނޫންކަމަށާއި، އެެކަމަކު މެނިފެސްޓޯގައި ހުރި މައިގަނޑު ކަންކަން ތަންފީޒުކުރުމުގައި އެންމެ ބޮޑު އެހީތެރިކަމެއް ހޯދޭނެ ގޮތަކީ ކޮބައިތޯ ކަމަށެވެ.

ފާރިސް މި މޭރުމުން ވާހަކަދައްކަވާފައިވާއިރު، ޕީއެންސީގެ ރިޔާސީ ކެންޑިޑޭޓް ޑރ. މުޙައްމަދު މުޢިއްޒު ކަނޑައަޅުއްވާފައިވާ ޚާއްސަ ޓީމާއި ފާރިސް މައުމޫނާއެކު ރިޔާސީ އިންތިޚާބުގެ ދެވަނަ ބުރުގައި ގުޅިގެން މަސައްކަތް ކުރުމާގުޅޭގޮތުން އިއްޔެ ވަރަށް ކާމިޔާބު ބައްދަލުވުމެއް ބާއްވާފައިވާ ކަމަށް ޕީޕީއެމް ކޯލިޝަނުން ވަނީ ވިދާޅުވެފައެވެ.

‏މިބައްދަލުވުމުގައި ޕީޕީއެމް ޕީއެންސީގެ ވެރިކަމެއްގައި ފާރިސް މައުމޫންގެ މެނިފެސްޓޯގައި ހިމެނިފައިވާ މުހިއްމު ކަންކަން ތަންފީޒު ކުރެވޭނެ ގޮތްތަކަކާ ގުޅޭގޮތުން މަޝްވަރާކޮށްފައިވާ ކަމަށް އެ ކޯލިޝަނުން މަޢުލޫމާތު ދެއެވެ.

"މިހާރު ކުރިއަށް ދަނީ މަޝްވަރާތައް. އަޕްޑޭޓް ކުރާނަން މީޑިއާތަކަށް އަންނަ ޑިވެލޮޕްމަންޓްތައް."

ޕީޕީއެމް ކޯލިޝަންގެ ސްޕޯކްސްޕާސަން ހީނާ ވަލީދު ވިދާޅުވިއެވެ.

ޕީޕީއެމް ކޯލިޝަންގެ ލީޑަރޝިޕުން ވަނީ، ފާރިސްގެ އެމްއާރުއެމްގެ ލީޑަރޝިޕާވެސް ވަނީ މަޝްވަރާ ކޮށްފައެވެ. ނަމަވެސް އެބައްދަލުވުމުގައި ފާރިސް ބައިވެރިވެވަޑައެއް ނުގަންނަވައެެވެ.

އިއްޔެ ފާރިސް އާއި މަޝްވަރާ ކޮށްފައިވަނީ ސިޓީ ގާޑެންގައި މިއަދު ހަވީރުއެވެ. މިބައްދަލުވުމުގައި ކޯލިޝަން މަޝްވަރާތަކާއި ދެފަރާތުން ގުޅިގެން ކުރެވިދާނެ މަސައްކަތް ތަކާއި ގުޅޭގޮތުން ވަނީ މަޝްވަރާ ކުރެވިފައެވެ.

އެ ބައްދަލުވުމުގައި، ޕީޕީއެމްގެ ނައިބް ރައީސް އަހުމަދު ޝިޔާމްއާއި، ޕީޖީ ލީޑަރު އަހުމަދު ސަލީމްއާއި، ޕީއެންސީގެ ނައިބް ރައީސް މުހައްމަދު ސައީދާއި، އާދަމް ޝަރީފްވެސް ބައިވެރިވިއެވެ

އިލެކްޝަންސް ކޮމިޝަނުން  އިޢުލާންކުރެއްވި ވަގުތީ ނަތީޖާއިން ދައްކާގޮތުން އެއްވެސް ކެންޑިޑޭޓަކަށް ފަންސާސް އިންސައްތަ ލިބިފައިނުވާތީ ދެވަނަބުރެއް ބާއްވަން ޖެހެއެވެ.
މި އިންތިޚާބުގެ ޞައްޙަ ވޯޓުގެ ޢަދަދަކީ 220651 އެވެ. އަދި ބާޠިލު 4835 ވޯޓު ހިމެނެއެވެ. ބާޠިލުވެފައިވަނީ އިންތިޚާބުގައި ވޯޓުލުމަށް ނުކުތް މީހުންގެ ތެރެއިން %2.14 މީހުންގެ ވޯޓެވެ.

އިންތިޚާބުގެ ނަތީޖާ ދައްކާގޮތުން، ކުރީގައި އުޅުއްވަނީ ޕީއެންސީގެ ކެނޑިޑޭޓް ޑރ. މުހައްމަދު މުއިއްޒުއެވެ. މުއިއްޒު ކުރީގައި އުޅުއްވަނީ 46 އިންސައްތަ ވޯޓުންނެވެ. ނުވަތަ 101،635 ވޯޓެވެ.

މުއިއްޒުއާ އެންމެ ގާތުން ވާދަކުރައްވަނީ ރައީސުލްޖުމްހޫރިއްޔާ އަދި އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސާލިހެވެ. އޭނާއަށް މިހާތަނަށް ލިބިވަޑައިގަތީ 39 ޕަސެންޓް ނުވަތަ 86161 ވޯޓެވެ.

އިންތިހާބުގެ 3 ވަނަ ލިބިފައިވަނީ ޑިމޮކްރެޓްސްގެ ކެންޑިޑޭޓް އިލްޔާސް ލަބީބެވެ. ހަތަރުވަނައިގައި އުމަރު ނަސީރު އުޅޭއިރު، 5 ވަނައިގައި އުޅެނީ ޖުމްހޫރީ ޕާޓީގެ ރިޔާސީ ކެނޑިޑޭޓް ޤާސިމް އިބްރާޙީމެވެ. 6 ވަނަ ފާރިސް މައުމޫނަށް ލިބޭއިރު ނަތީޖާތަކުން ދައްކާއިރު، އެމްއެންޕީގެ ކެންޑިޑޭޓް މުހައްމަދު ނާޒިމަށް 7 ވަނަ އަދި ހަސަން ޒަމީލަށް ލިބެނީ 8 ވަނައެވެ.

މިއަދުގެ އިންތިހާބުގައި ވޯޓުލުމުގެ ހައްގު ލިބުނު 282,395 މީހުންގެ ތެރެއިން 223،092 މީހުން ވޯޓު ދިނެވެ. އެއީ ހައްގު ލިބުނު އާބާދީގެ 79 ޕަސެންޓެވެ. އިދިކޮޅު ކެންޑިޑޭޓު މުއިއްޒާއި ރައީސް ޞާލިހުގެ އިތުރުން މި އިންތިހާބުގައި ހަ ކެންޑިޑޭޓުން ވާދަ ކުރިއެވެ.

ރިޔާސީ އިންތިޚާބުން އެއްވެސް ކެނޑިޑޭޓަކަށް 50 އިންސައްތައަށްވުރެ އިތުރަށް ވޯޓް ލިބިފައިނުވާތީ ކުރިއަށް އޮތް 5 އަހަރަށް އިންތިޚާބުކުރާ ރައީސުލްޖުމްހޫރިއްޔާއަކު ކަނޑައެޅުމަށް ބާއްވާ އިންތިޚާބުގެ ދެވަނަ ބުރު އޮންނާނީ މިމަހުގެ 30 ވަނަ ދުވަހުއެވެ.
މިފަހަރުގެ އިންތިޚާބަކީ މީގެ ކުރީ ރިޔާސީ އިންތިޚާބުތަކާއި އަޅަބަލާއިރު ބާޠިލު ވޯޓު އެންމެ ގިނަ އިންތިޚާބެވެ.

1- ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒު: 101635 ވޯޓު (%46)
2- އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުޙައްމަދު ޞާލިޙް 86161 ވޯޓު (%39)
3- ދ ޑިމޮކްރެޓްސްގެ ރިޔާސީ ކެންޑިޑޭޓު، އިލްޔާސް ލަބީބް: 15839 ވޯޓު (%7)
4- އަމިއްލަ ގޮތުން ވާދަކުރެއްވި ކެންޑިޑޭޓް ޢުމަރު ނަސީރު: 6343 ވޯޓު (%2)
5- ޖުމްހޫރީ ޕާޓީގެ ރިޔާސީ ކެންޑިޑޭޓު، ޤާސިމް އިބްރާހީމް: 5460 ވޯޓު (%2)
6- އަމިއްލަ ގޮތުން ވާދަކުރެއްވި ކެންޑިޑޭޓު އަޙްމަދު ފާރިސް މައުމޫން: 2979 ވޯޓު (%1)
7- އެމްއެންޕީގެ ރިޔާސީ ކެންޑިޑޭޓު މުހައްމަދު ނާޒިމް: 1907 ވޯޓު (%0.86)
8- އަމިއްލަ ގޮތުން ވާދަކުރެއްވި ކެންޑިޑޭޓް އަލްއުސްތާޛް ޙަސަން ޒަމީލު: 327 ވޯޓު (%0.15