ސައުދީ އަރަބިއްޔާއަށް އުމްރާއަށް ދާ އަންހެނުން ހެދުން އެޅުމުގައި އަމަލުކުރަންވީ އުސޫލެއް ކަނޑައަޅައިފިއެވެ.
ސައުދީ އަރަބިއްޔާއަށް އުމްރާއަށް ދާ އަންހެނުން ހެދުން އެޅުމުގައި އަމަލުކުރާނެ އުސޫލެއް ކަނޑައަޅާފައިވަނީ، ސައުދީ އަރަބިއްޔާގެ ޙައްޖު އެންޑް އުމްރާ މިނިސްޓްރީންނެވެ.
އެ އުސޫލުގައިވާ ގޮތުން މުޤައްދަސް ބިނާތަކަށް ޒިޔާރާތްކުރާއިރު އެކަށީގެންވާ ހެދުމެއް އަޅަންޖެހޭނެއެެވެ. އަދި އާއްމުކޮށްފައިވާ ގައިޑްލައިންގެ ތެރެއިން އަންހެނުންނަށް އިޚްތިޔާރުކުރާ ހެދުމެއް އެޅޭނެކަމަށްވެސް މިނިސްޓްރީން ވަނީ ހާމަކޮށްފައެވެ.
އެ މިނިސްޓްރީން ނެރުނު ބަޔާނެއްގައި ވަނީ، އުމްރާގެ އަޅުކަމަށް ދާ އަންހެނުން ލާ ހެދުމަކީ ގަޔަށް ދޫ ހެދުމަކަށް ވާން ޖެހޭނެކަމަށާއި، އަދި ޒީނަތްތެރި ކުރުމަށް ބޭނުންކުރާ އެއްވެސް ބާވަތެއް ހެދުމުގައި ހުރެގެންނުވާނެ ކަމަށާއި ހެދުމުން މުޅި ހަށިގަނޑު ނިވާވާން ޖެހޭނެ ކަމަށެވެ.
މީގެ ކުރިންވެސް އެކި ފަހަރު މަތިން، ސައުދީ އަރަބިއްޔާއިން ވަނީ ޙައްޖުވުމަށާއި ޢުމްރާވުމަށް އެޤައުމަށް ގޮސް އުޅޭއިރު، އެޤައުމުގެ މުގައްދަސް ބިނާތަކަށް ޙައްޤު އިޙްތިރާމް އަދާކުރުމަށާއި، އަބަދު ފޮޓޯ ނެގުމައިގެން މަޝްޣޫލްވެ ނޫޅުމަށް، އަންގާފައިވެއެވެ. އަދި ޠަވާފް ކުރުމާއި އެހެންވެސް ރުކުންތައް އަދާކުރަމުންދާއިރު ފޮޓޯ ނެގުމަށް ކުއްލިއަކަށް ހުއްޓުންފަދަ ކަންތައް ކުރާނަމަ، ބައިބޯވެ، މީހުން ފިތުންފަދަ ހަދިސާތައް ދިމާވާކަންވެސް އެ މިނިސްޓްރީން ފާހަގަކުރެއެވެ.
މިފަދަ އުސޫލެއް ކަނޑައަޅާފައިވާއިރު، ޢުމްރާގެ އަޅުކަން އަދާކުރުމަށް މަގުފަހިކުރުމުގެ ގޮތުން ސައުދީން ވަނީ ކުރިން ދެމުންދިޔަ 30 ދުވަހުގެ ވިސާ 90 ދުވަހަށް އިތުރުވެސްކޮށްފައެވެ.
