ވެރިކަމުގެ ނިޒާމީ ވޯޓު ނަގަންޖެހޭ އެއްވެސް އަސާސެއް ނެތް: އަބްދުﷲ ދީދީ

ވެރިކަމުގެ ނިޒާމީ ވޯޓު ނަގަންޖެހޭ އެއްވެސް އަސާސެއް ނެތް ކަމަށް ކުރީގެ އުއްތަމަ ފަނޑިޔާރު ޑޮކްޓަރ އަބްދުﷲ ދީދީ ވިދާޅުވެއްޖެއެވެެ.

އެމަނިކުފާނު މިހެން ވިދާޅުވީ ދެންމެ ސޯޝަލް މީޑިޔާގައި ޙިއްސާކުރެއްވި ޕޯސްޓެއްގައެވެ.
‏އަބްދުﷲ ދީދީ ވިދާޅުވީ ޕަބްލިކް ރެފެރެންޑަމަކީ ވަކި މީހެއްގެ ފަރްދީ މަޞްލަޙަތު އިސްކޮށްގެން، ނެގޭ ކުޅޭކުޅޭ އެއްޗަކަށް ވެގެން ނުވާނެ ކަމަށެވެ.
‏ޤާނޫނުއަސާސީ އަށް ގެނެވޭ ބައެއް އިޞްލާޙުތައް ތަޞްދީޤު ކުރުމުގެ ކުރިން، ޤާނޫނުއަސާސީގެ 262 ގެ (ށ) ގެ ދަށުން ނެގުން ލާޒިމުކޮށްފައިވާ ރެފެރަންޑަމްތައް ފިޔަވައި، ޤާނޫނުއަސާސީގެ ދަށުން “ޕަބްލިކް ރެފެރަންޑަމް” ނުވަތަ ރައްޔިތުންގެ ޚިޔާލުހޯދުމުގެ ޢާންމު ވޯޓެއް ނެގުމުގެ ބާރު ރައްޔިތުންގެ މަޖިލީހަށް ދީފައިވަނީ ޤާނޫނުއަސާސީގެ 70 ވަނަ މާއްދާގެ (ށ) ގެ (6) ގެ ދަށުން، ކަމަށާއި، އެއީ “ރައްޔިތުންނާ ގުޅޭ މުހިންމު ކަންތައްތަކުގައި”ކަމަށްވެސް އެމަނިކުފާނު ވިދާޅުވިއެވެ.

އަބްދުﷲ ދީދީ އިތުރަށް ވިދާޅުވީ، ހަމަ އެ ބާރު ރައީސުލްޖުމްހޫރިއްޔާ އަށް ދީފައިވަނީ ޤާނޫނުއަސާސީގެ 115 ވަނަ މާއްދާގެ (ޏ) ގެ ދަށުން، ކަމަށާއި، އެއީ “ޤައުމީ މުހިންމު މައްސަލަތަކުގައި”ކަމަށެވެ.

‏”މި މައްސަލައާ ގުޅިގެން އުފެދޭ ސުވާލަކީ : 2008 ގެ ޤާނޫނުއަސާސީގެ ދަށުން ރާއްޖޭގައި މިއަދާ ހަމަޔަށް ޕްރެކްޓިސް ކުރެވެމުންދާ ވެރިކަންކުރުމުގެ ނިޒާމަށް ފަންޑަމެންޓަލް ބަދަލެއް ގެންނަންޖެހޭ ޙާލަތެއް މެދުވެރިވެފައިވާ ކަމަށް ރާއްޖޭގެ ޕަބްލިކް އޮޕިނިއަން ޤަބޫލުކުރޭތޯ؟ ސްޕެޝަލައިޒްޑް ސަރވޭތަކުން އެކަން ކަށަވަރު ކޮށްދޭތޯ؟”

އަބްދުﷲ ދީދީ ވިދާޅުވިއެވެ.

އެކަމަށް ޢިޝާރަތްކުރައްވާ އެމަނިކުފާނު ވިދާޅުވީ، އެހެންކަމުގައި ނުވާނަމަ، ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލުކޮށް ގެންނަންޖެހޭ ގިނަގުނަ ދުސްތޫރީ އިޞްލާޙުތައް ގެނައުމުގެ ޝަރޫރަތެއް މިވަޤުތު ޤާއިމުވެފައި ނެތުމުގެ އިތުރުން، އެއީ ރައްޔިތުންނާ ގުޅޭ މުހިންމު ނުވަތަ ޤައުމީ މުހިންމު މައްސަލައެއް ކަމަށް ބަލަންޖެހޭ އެއްވެސް އަސާސެއް ނެތް ކަމަށެވެ.

އެމަނިކުފާނު މިހެން ވިދާޅުވެފައިވާއިރު، މިހާރު މަންޒަރު ފެންނަގޮތުން، އެތައް މަޝްވަރާތަކަކަށްފަހު، ޑިމޮކްރެޓުންގެ 15000 ވޯޓު ކަށަވަރުކުރަން، އެންމެފަހުން އެމްޑީޕީން ނިޒާމީ ވޯޓަށް މިސްރާބު ޖަހައިފިއެވެ. ރިޔާސީ އިންތިހާބުގެ ދެވަނަ ބުރަށްފަހު ވެރިކަން ކުރާނެ ނިޒާމަކާ ގުޅޭ ގޮތުން ފެންނަ ނުފެންނަ ވޯޓެއް ބާއްވަން އެމްޑީޕީން ތާޢީދު ކުރާ ކަމަށް ވަނީ މަޢުލޫމާތު ލިބިފައެވެ.

ރިޔާސީ އިންތިހާބުގެ ފުރަތަމަ ބުރުގައި 15،839 ވޯޓު ލިބިގެން ތިން ވަނައަށް ގޮސްފައިވާ ޑިމޮކްރެޓުން، މި މަހު 25 ގައި ވެރިކަމުގެ ނިޒާމާ ގުޅޭ ގޮތުން ފެންނަ ނުފެންނަ ވޯޓެއް ނެގުމަށް، ދެވަނަ ބުރަށް ގޮސްފައިވާ އެމްޑީޕީ އާއި ޕީޕީއެމްއަށް ހުށަހެޅިއެވެ.

ޑިމޮކްރެޓުން ހުށަހަޅާފައިވާ ނިޒާމީ ވޯޓާ ބެހޭގޮތުން، އެމްޑީޕީގެ ޗެއާޕާސަން ފައްޔާޒް އިސްމާއިލް ވިދާޅުވެފައިވަނީ ނިޒާމް ބަދަލު ކުރުމާ ގުޅޭ ވޯޓެއް ކުރިޔަށް އޮތް ހަފްތާއެއްހާ ދުވަހުގެ ތެރޭގައި ނެގުމަކީ ކުރެވިދާނެ ކަމެއް ކަމަށް ޤަބޫލު ނުކުރައްވާ ކަމަށެވެ. އޭނާ ވިދާޅުވީ އޭގެ ސަބަބުން ދެވަނަ ބުރުގެ އިންތިހާބަށް ވެސް ވަރަށް ބޮޑަށް ނުފޫޒު ފޯރާނެ ކަމަށެވެ.

އެކަމަކު، ރިޔާސީ އިންތިޚާބުގެ ދެވަނަ ބުރަށްފަހު ޑިމޮކްރެޓުން ހުށަހަޅާ ތާރީޚެއްގައި ނިޒާމީ ވޯޓެއް ބާއްވަން ތާއީދު ކުރައްވާނެ ކަމަށް ފައްޔާޒް އިސްމާޢީލް ވިދާޅުވެފައިވެއެވެ. އަދި އެ ޖަވާބު ޑިމޮކްރެޓުންނަށް ދެއްވާފައިވާ ކަމަށްވެސް ފައްޔާޒް ވިދާޅުވެއެވެ.

މިކަން ނިންމިކަމުގައިވިޔަސް ފައްޔާޒް ވިދާޅުވާ ގޮތުގައި ދެވަނަ ބުރުގައި ޑިމޮކްރެޓްސްއިން އެ ޕާޓީއަށް ތާއީދު ކުރާނެކަން ނުވަތަ ނޫންކަން އަދިވެސް އެނގިވަޑައި ނުގަންނަވައެވެ. އެހެންނަމަވެސް، ރިޔާސީ އިންތިހާބުގެ ދެވަނަ ބުރާއި މެދު ގޮތެއް ނިންމުމަށް ދަ ޑިމޮކްރެޓްސް ޕާޓީން މިރޭ ކައުންސިލް ބައްދަލުވުމެއް ބޭއްވުމަށް ހަމަޖެހިފައިވާ ކަމަށް މަޢުލޫމާތު ލިބެއެވެ.