ކޮކާ އުދުހިލާ ހިތްގައިމު "މާލެ ފެހި" ހުޅުމާލެ ނާރސަރީ އައުޓްލެޓް މާލެ ސިޓީ ކައުންސިލުން ހުޅުވައިފިއެވެ. އިއްޔެ ހަވީރު ބޭއްްވި ރަސްމިއްޔާތެއްގައި މިތަން ހުޅުވާ ދެއްވީ މާލެ ސިޓީގެ މޭޔަރު ޑރ. މުހައްމަދު މުއިއްޒެވެ.
މި ބަގީޗާ ހުޅުއްވައިދެއްވަމުން، މުއިއްޒު ވިދާޅުވީ، އެއީ މާލެ ސިޓީ ފެހި ކުރުމުގެ ޕްރޮގްރާމްގެ ތެރެއިން ހުޅުވިގެން ދިޔަ ތަނެއް ކަމަށާއި، މިތަނަކީ މި ރާއްޖޭގައި ހުރި އެންމެ ބޮޑު ނާރސަރީ ކަމަށާއި، އެ ތަނުން މާ ގަސްތަކާއި، މޭވާ އަޅާ ގަސްތަކާއި ގަތުމުގެ ފުރުސަތު އޮންނާނެ ކަމަށެވެ. އަދި ނާރސަރީގައި ހުންނަ ގަސްތައް އޮންލައިންކޮށް ގަތުމުގެ ފުރުސަތު ދިނުމަށް ވެބްސައިޓެއް ވަނީ ތައްޔާރުކޮށްފައިވާ ކަމަށާއި، ވެބްސައިޓް ވަރަށް އަވަހަށް ލޯންޗް ކުރައްވާނެ ކަމަށް މުއިއްޒު ވިދާޅުވިއެވެ.
މިއީ މާލެ ސިޓީ ކައުންސިލުން "އެއް ލައްކަ ގަސް" ޕްރޮގްރާމްގެ ދަށުން ގަސްތައް ބަލަހައްޓާ ހެއްދުމަށް ހުޅުވި މިފަދަ ދެވަނަ އައުޓްލެޓް ކަމަށްވާއިރު، މީގެ ކުރިން މާލޭގައި ހުޅުވި މިފަދަ ފުރަތަމަ އައުޓްލެޓް ހުންނާނީ މާލޭގެ ކާނިވާ ސަރަހައްދުގައެވެ.
އިއްޔެ ދެވަނަ އައުޓްލެޓް ހުޅުވިއިރު، ހުޅުމާލެ އައުޓްލެޓް ހުޅުވާފައި ވަނީ ހުޅުމާލެ ސަހަރާއާ ދިމާ ބިއްދޮށުގައެވެ. އަދި މިހާރު ވިލިމާލޭގެ އައުޓްލެޓް ހުޅުވުމަށް ދަނީ ތައްޔާރުވަމުންދާ ކަމަށް މަޢުލޫމާތު ލިބެއެވެ.
މިތަން ވެސް ހުޅުވިފައި ވަނީ ގަސް ގަނެވޭ ގޮތަށް އައުޓްލެޓްއަކާއި އެކުގައެވެ.
ރާއްޖޭގެ ހުރިހާ އެންމެންނަށް އަދި ވަކިން ހާއްސަކޮށް ރިސޯޓްތަކަށް ގަސްތައް ސަޕްލައި ކުރުމަށް ހަމަޖެހިފައިވާ ކަަމަށާއި، މީގެ ސަބަބުން އެއްލައްކަ ގަސް ޕްރޮގްރާމަށް ބޭނުންވާ ފައިސާ ލިބުމަށް މަގުފަހިވާނެ ކަމަށާއި، އަދި ދެމެހެއްޓެނިވިގޮތުގައި މި ޕްރޮގްރާމް ކުރިއަށް ގެންދިއުމަށް ހަމަޖެހިފައިވާ ކަމަށް މާލޭ ސިޓީ ކައުންސިލުން ހާމަކުރައްވައެވެ.
