މުއްސަނދިންގެ ޓެކްސް މިލިއަނުން މިލިއަނުން މާފުކޮށްދީފައިވަނިކޮށް، ހއ. ދިއްދޫ ފަރަށް އުރުނު ޓަގު ބޯޓާއި ބާޖުގެ ވެރިފަރާތް 100 މިލިއަން ރުފިޔާއިން ޖޫރިމަނާކޮށްފިއެވެ.
“ޓީބީ މުތާ ޕްރިންސަސް” ނަމަކަށް ކިޔާ ޓަގު ބޯޓާއި “މުތާ ޕްރައިޑް” ނަމަކަށް ކިޔާ ބާޖު ދިއްދޫ ފަރަށް އުރުނީ 2 މެއި 2023 ގައެވެ.
މިކަމާ ގުޅިގެން، އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ) އިން މިއަދު ބުނީ، އެ އުޅަނދުތައް ފުންކޮށް ނިމުމުން އެ ސަރަހައްދުގެ ތިމާވެއްޓަށް ލިބުނު ގެއްލުންތައް ބެލުމަށް ކުރި ސާވޭއިން އެ ފަރުގެ 4،038 އަކަމީޓަރުގެ ސަރަހައްދަކަށް ބޮޑެތި ގެއްލުންތަކެއް ލިބިފައިވާކަމަށެވެ.
ތިމާވެއްޓަށް ލިބިިފައިވާ ގެއްލުންތަކަށް ބަލައި، ތިމާވެއްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލުހޯދުމުގެ ގަވާއިދުގެ ގެ ދަށުން، ޖޫރިމަނާއާއި ބަދަލުގެ އަދަދަކީ 101.7 މިލިއަން ރުފިޔާ ކަމަށް އީޕީއޭ އިން ވިދާޅުވެއެވެ.
ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުގެ ދަށުން ޖޫރިމަނާގެ ގޮތުގައި ކަނޑައެޅެން އޮންނަ އެންމެ ބޮޑު އަދަދަކީ 100 މިލިއަން ރުފިޔާއެވެ. އެ އުޅަނދުގެ ވެރިފަރާތް ކަމުގައިވާ އެޗްއާރުއެސް އިންފްރާޓެކް ޕްރައިވެޓް ލިމިޓެޑް 100 މިލިއަން ރުފިޔާއިން ޖޫރިމަނާކޮށް، އެ ފައިސާ 30 ދުވަހުގެ ތެރޭގައި އެ އެޖެންސީއަށް ދެއްކުމަށް މިއަދު އަންގާފައިވެއެވެ.
އީޕީއޭ އިން ވިދާޅުވެފައިވަނީ، ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުގެ 10 ވަނަ މާއްދާގެ ދަށުން ބާޖު ފަރަށް އަރައިގެން ލިބިފައިވާ ގެއްލުމުގެ ބަދަލު، ޝަރީއަތް މެދުވެރިކޮށް ހޯދުމުގެ މަސައްކަތް އެޓާނީ ޖެނެރަލްގެ އޮފީހާއެކުގައި ފެށުމަށް ކުރަންޖެހޭ ކަންތައްތައް އެ މައްސަލައިގެ އިސްތިއުނާފު މަރުހަލާއިން ނިންމާ ގޮތެއްގެ މަތިން ފެށުމަށް ހަމަޖެހިފައިވާ ކަމަށެވެ.
