ނިޒާމީ ވޯޓެއް ނަގަން ޖެހިއްޖެނަމަ، އެފަދަ ވޯޓެއް ނެގުމަށްޓަކައި، އިންތިޚާބުތަކާ ބެހޭ އާންމު ގާނޫނުގައިވާ ހަމަތަކަށް ރިޢާޔަތްކުރާއިރު، މަދުވެގެން 30 ދުވަހާއި 45 ދުވަހާ ދެމެދުގެ މުއްދަތެއް އެ އިންތިޚާބު ބޭއްވުމަށްޓަކައި ބޭނުންވާނެ ކަމަށާއި އަދި ގާތްގަނޑަކަށް 40 މިލިޔަން ރުފިޔާ އެ އިންތިޚާބަށް ޚަރަދުވާނެ ކަމަށް އިލެކްޝަންސް ކޮމިޝަންގެ ނައިބު ރައީސް އިސްމާޢީލް ހަބީބު ވިދާޅުވެއްޖެއެވެ.
ހަބީބު މިހެން ވިދާޅުވީ ސޯޝަލް މީޑިޔާގައި ޙިއްސާކުރެއްވި ޕޯސްޓެއްގައެވެ.
"ނިޒާމީ ވޯޓެއް ނަގަން ޖެހިއްޖެނަމަ، އެފަދަ ވޯޓެއް ނެގުމަށްޓަކައި، އިންތިޚާބުތަކާ ބެހޭ އާންމު ގާނޫނުގައިވާ ހަމަތަކަށް ރިޢާޔަތްކުރާއިރު، މަދުވެގެން 30 ދުވަހާއި 45 ދުވަހާ ދެމެދުގެ މުއްދަތެއް އެ އިންތިޚާބު ބޭއްވުމަށްޓަކައި ބޭނުންވާނެ. އަދި ގާތްގަނޑަކަށް 40 މިލިޔަން ރުފިޔާ އެ އިންތިޚާބަށް ޚަރަދުވާނެ."
ހަބީބު ވިދާޅުވިއެވެ.
ހަބީބު އިތުރަށް ވިދާޅުވީ، އެންމެ މުހިންމު ކަމަކީ، މިފަދަ ވޯޓެއް ނެގުމުގެ މަގްސަދާމެދު ވޯޓުލާ މީހުން ހޭލުންތެރިކުރުވުން ކަމަށާއި، ވަކި ނިޒާމަކަށް ތާއީދުކޮށް ވޯޓުލުމުގައި އެ ނިޒާމެއްގެ ފައިދާ އާއި ގެއްލުމާމެދު، ވޯޓުލާ މީހުން ހޭލުންތެރިކުރުވުމަކީ، އިލެކްޝަންސް ކޮމިޝަންގެ ގާނޫނީ ޒިންމާއެއް ކަމަށެވެ.
އޭނާ މިހެން ވިދާޅުވެފައިވާއިރު، ރާއްޖޭގެ ވެރިކަމުގެ ނިޒާމް ބަރުލަމާނީ ނިޒާމަކަށް ފުރޮޅާލަން ޑިމޮކްރެޓްސްއިން ހުށަހެޅި ޤަރާރު ރައްޔިތުންގެ މަޖިލީހުން ބަލައިގެންފިއެވެ. އެ ޤަރާރު ބަލައިގަންނަން ފާސްކުރީ 35 މެމްބަރުންގެ ވޯޓާއެކުއެވެ.
އެ ޤަރާރު ބަލައިގަތުމާއެކު ޑިމޮކްރެޓްސްގެ ޕާލަމަންޓްރީ ގްރޫޕްގެ ލީޑަރު އަލީ އާޒިމް ހުށަހެޅުއްވީ އެ ގަރާރު ރައްޔިތުންގެ މަޖިލީހުގެ މުޅި މަޖިލީހުގެ ކޮމިޓީއަށް ހުށަހެޅުއްވުމަށެވެ. އަދި އެކަމަށް ހުޅުމާލެ ދާއިރާގެ މެމްބަރު އަލީ ނިޔާޒް ތާއީދު ކުރެއްވިއެވެ.
އެ ގަރާރު މުޅި މަޖިލީހުގެ ކޮމިޓީއަށް ގެންދަން ފާސްކުރީ 34 މެމްްބަރުންގެ ވޯޓާއެކުއެވެ. އަދި މާދަމާ އެ ޤަރާރުގެ މައްސަލަ މުޅި މަޖިލީހުގެ ކޮމިޓީގައި ފަށާނެ ކަމަށް ރައީސް ނަޝީދު ވިދާޅުވެ މިއަދު ޖަލްސާ ނިންމާލެއްވިއެވެ.
ރައްޔިތުންގެ މަޖިލިހުގެ ހުޅުދޫ ދާއިރާގެ މެންބަރު އިލްޔާސް ލަބީބް ހުށަހެޅުއްވި ޤަރާރުގައި ވާގޮތުން ނިޒާމީ ވޯޓު ނެގުމަށް ހުށަހަޅާފައިވަނީ ނޮވެމްބަރު 30 ވަނަ ދުވަހުގެ ކުރިންނެވެ. ނަމަވެސް އިލެކްޝަންސް ކޮމިޝަނުން ހާމަކޮށްފައިވަނީ، މިފަދަ ވޯޓެއް ނެގުމަށް މަދުވެގެން 30 ދުވަހާއި 45 ދުވަހާ ދެމެދުގެ މުއްދަތެއް ބޭނުންވާނެ ކަމަށެވެ.
މިހާކުއްލި ގޮތަކަށް މިވަރުގެ ބޮޑު ކަމެއް ކުރަން މި މަސައްކަތްކުރައްވަނީ ހަމަ އިޚްލާޞްތެރިކަމެއް އޮވެގެންތޯ ގިނަ ބަޔަކު ސުވާލު އުފައްދައެވެ.
އަދި ޤައުމުގެ މާލީ ޙާލަތު މިހާ ދަަށްވެފައި އޮއްވައި އަދި ފުލުފުލުން ދެ އިންތިޚާބު ބާއްވަން 100 މިލިއަނަށްވުރެ ގިނަ ރުފިޔާ ދައުލަތުގެ ބަޖެޓުން ޚަރަދުކުރަންޖެހިފައިވާއިރު، އެތަން މިލިއަން ރުފިޔާއެއް ޚަރަދުކޮށްގެން، މި ދަނޑިވަޅުގައި ކުރަން މިިކަން ކުރަން ހެޔޮނުވާނެ ކަމަށްބުނެ އާންމުންދަނި އަޑުއުފުލަމުންނެވެ.
