ވަޒީފާއިން މުސްކުޅިކުރެވުމަށްފަހު ޚަރަދުކުރުމަށް ހަމަޖެހިފައިވާ ޕެންޝަން ފަންޑުން ފައިސާ ބޭނުންކުރުމަށް ހުޅުވާލެވިދާނެ 3 ޙާލަތާއި އެކަމުގެ ތަފްޞީލް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުޢިއްޒު ވިދާޅުވެ ދެއްވައިފިއެވެ.
ޑރ. މުޢިއްޒު މި ތަފްޞީލް ދެއްވީ ޕެންޝަން ފަންޑަކީ ވަޒީފާއިން މުސްކުޅިވާ ދުވަހު ޚަރަދުކުރުމަށް ރައްކާކުރެވޭ ފައިސާއެއް ކަމާއި ޕެންޝަން ފަންޑަކީ ފަސޭހައިން ނެގޭގޮތަށް އޮންނަ ފަންޑަކަށް ހަދައިފިނަމަ ރިޓަޔަރމެންޓަށް ދާއިރު އެމީހާ ބޭނުންކުރާނެ ފައިސާއެއް ނުހުންނާނެ ކަމަށާއި، އަދި ޕެންޝަން ފަންޑަށް އެގޮތަށް އެކްސެސް ދިނީމަ މުސްތަޤުބަލްގައި ވާނީ ކިހިނެތްތޯ "އާސްކް މުޢިއްޒު" ޕްރޮގްރާމްގައި އާންމު ފަރާތަކުން ކުރި ސުވާލަކަށް ޖަވާބު ދެއްވަމުންނެވެ.
ޑރ. މުޢިއްޒު ވިދާޅުވީ އެކަމަކީ އާންމު ރައްޔިތުންނަސް ވަރަށް ބޭނުން ޖެހިފައި އޮތްކަމެއް ކަމަށެވެ. އަދި ޕެންޝަން ފަންޑަކީ ޖަމާކުރާ ފައިސާ ރިޓަޔަރ ވާއިރު ނެގޭގޮތަށް އޮންނަ އެއްޗެއް ގޮތުގައި އޮތް އޮތުމުގެ ބަދަލުގައި މުހިންމު 3 ކަމަކަށް އެ ފައިސާއިން ވަކި ވަރެއް ބޭނުންކުރެވޭނެ ގޮތަށް ޑރ. މުޢިއްޒުގެ ސަރުކާރެއްގައި ހަދައިދެއްވާނެ ގޮތުގެ ފޯމިއުލާ ވިދާޅުވެ ދެއްވިއެވެ.
ޤާނޫނުގެ ތެރެއިން މިހާރުވެސް އެޕާޓްމެންޓެއް ގަތުމަށް އަދި ފުރަތަމަ ފަހަރު ޙައްޖަށް ދިއުމަށް ކޮންމެސް ވަރަކަށް ޕެންޝަން ފަންޑުން ފައިސާ ބޭނުންކުރެވުނު ނަމަވެސް އެއީ އެހާ ފަސޭހައިން ހަމަޖެހޭ ކަމެއް ނޫންކަން މުޢިއްޒު ފާހަގަ ކުރެއްވިއެވެ.
އެހެންކަމުން އެމީހެއްގެ ޕެންޝަން ފަންޑަށް ވަކިވަރަކަށްވުރެ ބޮޑުއަދަދެއް ޖަމާވެފަ ހުރިއްޔާ އޭގެން މައިގަނޑު 3 ކަމަކަށް ފައިސާ ނެގޭނެ ކަމަށް މުޢިއްޒު ވިދާޅުވިއެވެ. އެގޮތުން ، ގެދޮރު ބިނާކުރުމާއި، ރާއްޖޭން ބޭރުން މަތީ ތަޢުލީމު ޙާޞިލް ކުރުމާއި، ކުދި އަދި މެދު ފަންތީގެ ކޮންމެވެސް ކަހަލަ ވިޔަފާރިއެއް ފަށަން ބޭނުންވާ މީހުންނަށް އެ ފުރުޞަތު ލިބޭނެ ގޮތަށް ހެދުމަކީ ރަނގަޅު ކަމެއްކަމުގައި މުޢިއްޒު ފާހަގަ ކުރެއްވިއެވެ.
"ގެދޮރު ބިނާކުރުމަށްޓަކައި ވަކިވަރެއް ނެގޭގޮތަށް، ރާއްޖޭން ނުހެދޭ ކޯހެއް ހެދުމަށް ސްކޮލަރޝިޕް ނުލިބޭ ޙާލަތުގަ، ދަރިން ރާއްޖޭން ބޭރަށް ކިޔަވަން ފޮނުވަން ކޮންމެސް ވަރެއް ނެގޭގޮތަށް، 3 ވަނަ ކަމަކަށް ކުދި އަދި މެދު ފަންތީގެ ކޮންމެސް ކަހަލަ ވިޔަފާރިއެއް ފައްޓަން އެމީހަކަށް ޖަމާވެފަހުރި ފައިސާއިން ފައިސާކޮޅެއް ނަގަން. މި މައިގަނޑު 3 ކަންތަކަށް ކޮންމެވެސް ވަރަކަށް ފައިސާ ނެގޭގޮތަށް ހެދުމަކީ ރަނގަޅު ކަމެއް" ޑރ. މުޢިއްޒު ވިދާޅުވިއެވެ.
ޑރ. މުޢިއްޒު ވިދާޅުވީ އެއީ ވަރަށްގިނަ ރައްޔިތުންގެ ފަރާތުން އައިސްފައިހުރި ޝަކުވާތަކެއް ކަމަށާއި، އެކަން ކުރެވޭނީ ޤާނޫނަށް ބަދަލުތަކެއް ގެނެސްގެން ކަމަށެވެ.
މިހާރު ޕެންޝަން ފަންޑުގަ 20 ބިލިއަން ރުފިޔާ ޖަމާވެފައި ހުރިކަން ފާހަގަކުރައްވާ ޑރ. މުޢިއްޒު ވިދާޅުވީ ސަރުކާރުން އެކިކަހަލަ ކަންކަމަށްވެސް ޕެންޝަން ފަންޑުގެ ބޭނުން ހިފާ ކަމަށެވެ.
މުޢިއްޒު ވިދާޅުވީ ޕެންޝަން ފަންޑު އިތުރަށް ފުޅާކޮށް ހަރުދަނާ ކުރެވޭނެ ގޮތްތައްވެސް އެބަހުރި ކަމަށާއި އެހެންކަމުން އެ ފަންޑަށް އިތުރަށް ފައިސާ ވަންނާނެ ގޮތްތައް ހޯދަމުން އިންވެސްޓްމެންޓް ތަކަށް އެފުރުޞަތު ދެމުން ވަކިވަރަކަށްވުރެ ގިނައިން ޖަމާވެފަ ހުރިއްޔާ އެ ފުރުޞަތު ދިނުމަކީ އާންމު ރައްޔިތުންގެ މަސްލަޙަތާ ގުޅިފައޮތް ކަމެއް ކަމަށެވެ.
ޓެކްނިކަލީ އެކަން ކުރާނެ ގޮތުގެ ފޯމިއުލާ ނެރެވޭނެކަން ފާހަގަ ކުރައްވާ މުޢިއްޒު ވިދާޅުވީ އެކަމުން ވާނެ ގެއްލުމެއް ނޯންނާނެ ކަމަށާއި، އޭރުން ރިޓަޔަރމެންޓަށް ފަހުވެސް ރައްޔިތުންނަށް އޭގެ ފައިދާ ލިބިގެންދާނެ ކަމަށެވެ.
"ޓެކްނިކަލީ އެކަން ކުރެވޭނެ ފޯމިއުލާއެއް ނެރެވޭނެ. މިކަމުން ވާނެ ގެއްލުމެއްނޯންނާނެ. ޕެންޝަން ފަންޑު ކުރިއަރާ،ރައްޔިތުންނަށް އޭގެ ފައިދާ ވާނެ. ރިޓަޔާ ވާ ހިސާބުންވެސް ފައިދާ އޮންނާނެ" ޑރ. މުޢިއްޒު ވިދާޅުވިއެވެ.
ޑރ. މުޢިއްޒު ވިދާޅުވީ އެ 3 ކަންތަކަކީ އާންމު ރައްޔިތުންގެ ފަރާތުން ހުށަހަޅާފައިވާ ކަންކަން ކަމަށެވެ.
ކިޔުންތެރިންގެ ޚިޔާލުތައް:
ވަޒީފާގައި މުޅި އުމުރު ހޭދަކުރި މީހާގެ މުސާރައިން ކަނޑާފައި ޕެންޝަން ފަންޑަށް ޖަމާކުރަނީ މުސްކުޅިވާ ދުވަހު އެއިންއެމީހާއަށް ފައިސާ ދޭން.
މުޅި ޢުމުރުގައި ޕެންޝަން ފަންޑަށް ލޯލާރިއެއް ނުލާ މީހާއަށް ވެސް މުސްކުޅިވާ ދުވަހު ހަމަ އެ ޢަދަދަށް ސަރުކާރުން ފައިސާ ދޭނަމަ މުވައްޒަފުންގެ މުސާރައިން ފައިސާ ކެނޑުމަކީ ދެވޭ އަނިޔާއެއް!