އެންމެ ހަލާލު އެއްޗަކީ ހަލާލު މަސައްކަތްކޮށްގެން އިންސާނާ އަމިއްލައަށް ހޯދާ ތަކެތިކަން ބަޔާންކޮށްދެއްވާފައެވެ. އަދި ރިޝްވަތުގެ އަމަލުފަދަ މާތް ﷲ ހަރާމްކުރެއްވި ގޮތްގޮތުން ހޯދާ ތަކެތިން ކައިބޮއި އުޅުމަކީ އެމީހެއްގެ އަމަލުތައް މާތް ﷲ ގަބޫލުނުކުރައްވާނެކަމެއްކަމަށް މިއަދުގެ ޚުތުބާގައި ބުނެފިއެވެ.
“ރިޝްވަތު ދިނުމާއި ރިޝްވަތު ހިފުމުގެ ނުބައިކަން” މި މައުޟޫއަށް މިއަދު ދިން ހުކުރު ހުތުބާގައި ބުނީ، މުޅި ދުނިޔޭގައި ފެތުރިފައިވާ ނުރައްކާތެރި ބޮޑެތި ވަބާތަކުގެ ތެރެއިން ނުރައްކާތެރިކަން ފިލުވައިލަން އެންމެ އުނދަގޫ އެއް ވަބާއަކީ ރިޝްވަތުގެ ވަބާ ކަމަށެވެ. އަދި ވަރަށް ގިނަ މުޖުތަމައުތަކުގައި ރިޝްވަތުގެ އަމަލުތައް އާންމުވެފައިވާއިރު، ބައެއް މުޖުތަމައުތަކުގައި ކޮންމެވެސް ގޮތަކުން، ކޮންމެވެސް މިންވަރެއްގެ ރިޝްވަތަކާ ނުލައި އެއްވެސް ކަމެއް ނުކުރެވޭ ކަމަށް ބުންޏެވެ.
ހުތުބާގައިވަނީ އެންމެ ހަލާލު އެއްޗަކީ ހަލާލު މަސައްކަތްކޮށްގެން އިންސާނާ އަމިއްލައަށް ހޯދާ ތަކެތިކަން ބަޔާންކޮށްދެއްވާފައެވެ. އަދި ރިޝްވަތުގެ އަމަލުފަދަ މާތް ﷲ ހަރާމްކުރެއްވި ގޮތްގޮތުން ހޯދާ ތަކެތިން ކައިބޮއި އުޅުމަކީ އެމީހެއްގެ އަމަލުތައް މާތް ﷲ ގަބޫލުނުކުރައްވާނެކަމެއްކަމަށް ހުތުބާގައި ބުނެދިނެވެ.
"ދެން އެއަސްފަހު ދަތުރު ދިގުވެ ބޯ ހިރަފުސްވެ ގައި ކިލާވެފައިވާ މީހެއްގެ ވާހަކަ ނަބިއްޔާ ހަދީސްކުރެއްވިއެވެ. އެ މީހާ ދެއަތް އުޑާ ދިމާލަށް އުފުލައި ދުއާ ކުރެއެވެ. އޭ އަޅުގެ ރައްބެވެ. އޭ އަޅުގެ ރައްބެވެ. އެހެނަސް އޭނާގެ ކާތަކެތި ހަރާމެވެ. ބޯތަކެތިވެސް ހަރާމެވެ. އަދި ލާ ފޭރާންވެސް ހަރާމެވެ. އަދި ހެދި ބޮޑުވުންވެސްވަނީ ހަރާމްތަކެތި ކައިގެންނެވެ. ފަހެ އެފަދަ މީހާގެ ދުޢާ އިޖާބަވާނީ ކިހިނަކުން ހެއްޔެވެ؟"
ހުތުބާގައި ބުނެފައިވެއެވެ.
މުދާ ހޯދިގޮތާއި މުދާ ހޭދަކުރިގޮތާއި ގުޅޭގޮތުން ސުވާލުކުރެވޭނެކަންވެސް ހުތުބާގައިވަނީ ހަނދާންކޮށްދީފައެވެ
ރިޝްވަތު ދޭ މީހާއާއި ރިޝްވަތު ދިނުމުގައި މެދުވެރިޔަކަށްވާ މީހާއާއި ރިޝްވަތުގައި ހިފާ މީހާއަށް މާތް ﷲ ލައުނަތް ލައްވާ ކަމަށް މިއަދުގެ ހުކުރު ހުތުބާގައި ބުނެފައިވެއެވެ.
ދިވެހި މުޖުތަމައުގައިވެސް ރިޝްވަތު ދިނުމާއި ރިޝްވަތު ހިފުމުގެ އާދަ ފެތުރި އެކަމަކީ ވަރަށް އާދައިގެ ކަމެއްކަމަށް މުޖުތަމައުގެ މީހުން ދެކެން ފަށާފައިވާކަމަށް ހުތުބާގައި ބުނެދިނެވެ. ރިޝްވަތަކީ ކޮބައިކަން ހާމަކޮށްދެމުން ހުތުބާގައި ބުނީ ރިޝްވަތަކީ ތިމާއަށް ހައްގު ނޫން މަންފާއެއް ލިބިގަތުންކަމަށެވެ. އަދި ރިޝްވަތު ދޭ މީހާއާ ރިޝަވަތުގައި ހިފާ މީހާއާ ރިޝްވަތު ދިނުމުގައި މެދުވެރިއަކަށްވާ މީހާއަށް މާތް ﷲ ލައުނަތް ލައްވާފައިވާކަން ހުތުބާގައި ހަނދާންކޮށްދީ އިންޒާރުކުރިއެވެ.
ހުތުބާގައި ބުނީ، އެފަދަ މުޖުތަމައުތަކުގައި އަދުލު އިންސާފު ގާއިމު ކުރުމަށް ހުންނަ އިދާރާތަކުގައިވެސް ރިޝްވަތުގެ އަމަލުތައް އިތުރުވެފައިވާ ކަމަށާއި އެފަދަ ކަންކަމަކީ ގައުމާއި މުޖުތަމައު ހަލާކުގެ ތެރެއަށް ވެއްޓިގެން ދިއުމަށް މެދުވެރިވެގެންދާ ކަންކަން ކަމަށެވެ. އަދި
ހުތުބާގައި ބުނީ، ރިޝްވަތަކީ ހަރާމް އެއްޗަކަށް ވީހިނދު އެފަދަ ފައިސާއެއްގައި ނުވަތަ މުދަލެއްގައި މުސްލިމުން ހިފައިގެން ނުވާނެ ކަމަށާއި އެފަދަ އެއްޗެއް އަނބިދަރީންނަށާއި ގާތްތިމާގެ މީހުންނަށް ކާން ދީގެންވެސް ނުވާނެ ކަމަށެވެ. އެހެނީ ހަރާމް އެއްޗެއް ކައިގެން އެ މީހެއްގެ ގައިގައި ޖަހާ މަސްގަނޑު، ނަރަކައަށް މާހައްގުކަން ބޮޑު ކަމަށް ކީރިތި ރަސޫލާގެ ހަދީޘްފުޅެއްގައި އައިސްފައިވާ ކަމަށް ބުންޏެވެ.
ހަރާމް ގޮތުގައި ހޯދާފައިވާ ތަކެތިން ކައިބޮއެ އުޅުމާއި އުނުފޭރާން ލުމަކީ އެ މީހެއްގެ އަމަލުތައް މާތް ﷲ ގަބޫލު ނުކުރައްވާނެ ކަމެއް ކަމަށްކަން ފާހަގަކޮށް ހުތުބާގައި ބުނީ، ރިޝްވަތަށް މަގުފަހިވާ ވަރަށް ގިނަ ސަބަބުތައް އިލްމުވެރިން ބަޔާންކުރައްވާފައިވާ ކަމަށެވެ.
އެއްކަމަކީ އެކަމުގައި ބައިވެރިވާ މީހުންގެ އީމާންކަން ނެތުން ކަމަށާއި ރިޒުގު ދެއްވަނީ މާތް ﷲ ކަން އެ މީހުންނަށް ގަބޫލު ނުކުރެވުން ކަމަށް ހުތުބާގައި ބުންޏެވެ. އަދި މާތް ﷲ ހަރާމް ކުރައްވާފައިވާ ގޮތްގޮތުން ފައިސާއާއި ތަކެތި ހޯދިކަމުގައިވިޔަސް އެ ތަކެތީގައި ބަރަކާތެއް ނުހުންނާނެ ކަމާއި އެ ގޮތަށް އުޅެން ވެއްޖެ ނަމަ މުޅި އުމުރުގައިވެސް އުޅެން ޖެހޭނެ ގޮތަކީ އެއީކަން ހިތަށް ނޭރުމަކީވެސް ސަބަބެއް ކަމަށް ބުންޏެވެ.
ދެވަނަ ކަމެއްގެ ގޮތުގައި އިލްމުވެރިން ވިދާޅުވެފައިވަނީ ލިބޭ މިންވަރަށް ޝުކުރުވެރި ނުވުމާއި ތިމާއަށްވުރެ ތަނަވަސް މީހުން އުޅޭ ގޮތަށް އުޅޭ ހިތްވުން ކަމަށެވެ. އެއީ މިންވަރަށް އީމާންނުވެވެނީ ކަމަށާއި މާ އަވަހަށް މުއްސަނދިވާން ބޭނުންވުން ކަމަށްވެސް ބުންޏެވެ.
ހުތުބާގައި ބުނީ، މީހަކަށް ލިބޭ އާމްދަނީ މަދުވުމަކީ އެ މީހަކު ރިޝްވަތު ހިފުމަށް ނުވަތަ ދީނުގައި ހަރާމް ކުރައްވާފައިވާ އެ ނޫންވެސް ކަންތަކަށް އަރައިގަތުމަށް މަޖުބޫރުކުރުވާ ކަމެއް ނޫން ކަމަށެވެ. މާތް ﷲގެ މިންވަރަށް އީމާންވެ، އެ މީހެއްގެ އަމަލުތައް އިސްލާހުކޮށް އިއްޒަތުއް ނަފުސު ރައްކާތެރި ކުރުމާއެކު އެ މީހެއްގެ ރިޒުގު ތަނަވަސް ކޮށްދެއްވުމަށް އެދި ﷲގެ ހަޟްރަތުގައި ދަންނަވަންވީ ކަމަށްވެސް ބުންޏެވެ.
ޚުތުބާ ނިންމާލާފައިވަނީ މޮރޮކޯއަށް ހުކުރު ދުވަހުގެރޭ އައި ބާރުގަދަ ބިންހެލުމާ ގުޅިގެންނާއި އާދީއްތަދުވަހު ލީބިޔާއަށް އެރި ބާރުގަދަ ތޫފާންނުގެ ސަބަބުން ނިޔާވި މުސްލިމުންނަށާއި ހާލުގައި ޖެހުނު މުސްލިމުންނާއި އަނިޔާވި މުސްލިމުންނަށްޓަކައި ހާއްސަ ދުޢާކުރަމުންނެވެ.
