ސަރުކާރުން ފައްޓާ މަޝްރޫޢުތައް ހުއްޓެނީ ރައްޔިތުންގެ ފައިސާ އިސްރާފުކުރާތީ ކަމަށާއި، އެއް ޕްރޮޖެކްޓެއް ނުނިންމާ ހަމަ އެޕްރޮޖެކްޓު ހަތަރު ފަސް ކުންފުންޏަކަށް ދެމުންދާ ކަމަށް ޕީޕީއެމް-ޕީއެންސީ ގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ހދ. ކުޅުދުއްފުށީގައި ބޭއްވި ކެމްޕެއިން ޖަލްސާގައި ދެއްކެވި ވާހަކަފުޅުގައެވެ.
"ސަރުކާރުން ފައްޓާ މަޝްރޫޢުތައް މި ހުއްޓެނީ ރައްޔިތުންގެ ފައިސާ އިސްރާފުކުރާތީ. އެއް ޕްރޮޖެކްޓެއް ނުނިންމާ ހަމަ އެޕްރޮޖެކްޓު ހަތަރު ފަސް ކުންފުންޏަކަށް އެބަދޭ."
މުޢިއްޒު ވިދާޅުވިއެވެ.
މުއިއްޒު ވިދާޅުވީ، ހިނގަހިނގާ ހުރި މަޝްރޫޢުތަކާއި ހުއްޓިފައިވާ މަޝްރޫޢުތަކާއި، ސޮއިކޮށްފައި ނުފަށައި އޮތް މަޝްރޫޢެއް ވިޔަސް ބާރު ސްޕީޑުގައި އެ މަސައްކަތްތައް ނިންމާނެ ކަމަށެވެ.
"ރައްޔިތުންގެ މަޝްރޫޢުތައް ކުރިއަށް ގެންދަން އާމްދަނީ ލިބޭ. ނަމަވެސް ކަންކަން ނުނިމެނީ ކަންކަން ކުރާނެ ވައްޓަފާޅި ނެތީމަ. އިރާދަކުރެއްވިއްޔާ އަޅުގަނޑުމެން އެ ގޮތަށް އެކަންވިޔަ ނުދޭނަން."
މުޢިއްޒު ވިދާޅުވިއެވެ.
ވަޒީފާގެ ބިރުވެސް އެބަދައްކާ ކަމަށް ފާހަގަކުރައްވަމުން، ރާއްޖޭގެ ހުރިހައި ރައްޔިތުން ޝާމިލްވާ ގޮތަށް ސިޔާސީ ވަޒީފާއަކުން ފިޔަވައި އެއްވެސް ވަޒީފާއަކުން މީހަކު ނުކަނޑާނެ ކަމަށާއި، އިގްތިޞާދަށް ބަލާއިރު ސަރުކާރު ހިއްސާވާ ކުންފުނިތައް މިއޮތީ ވަރަށް ނާޒުކު ހާލަތެއްގައި ކަމަށް މުޢިއްޒު ވިދާޅުވިއެވެ.
ކުދިކުދި ކުންފުނިތަކަށް ދޭންހުރި ފައިސާ ނުދީ ކުންފުނިތައް ބަނގުރޫޓުކޮށްފި ކަމަށާއި، އިޤްތިޞާދު ހަމަމަގަށް އަޅުވައިގެން، ސަރުކާރު ކުންފުނިތަކުން ކުދިކުދި ކުންފުނިތަކަށް ދައްކަންޖެހޭ ފައިސާ ދައްކާ ޚަލާސްކުރާނެ ކަމަށާއި ޙަޤީޤީ މާނައިގައި ހިންގޭ ކުންފުނިތަކަކަށް އެސް.އޯ.އީ ތައް ހަދައިގެން މެނުވީ އިޤްތިޞާދު ހަރުދަނާއެއް ނުކުރެވޭނެ ކަމަށްވެސް އެމަނިކުފާނު ވިދާޅުވިއެވެ.
މުޢިއްޒު ވިދާޅުވީ، އިގްތިޞާދު ނަގައި ކޮޅަށް ޖަހަމުން ތަރައްޤީ ބާރު ދުވެލީގައި ރައްޔިތުންނާއި ހަމައަށް ގެންގޮސްދިނުމަކީ މައިގަނޑު ވިސްނުން ކަމަށާއި، އިތުބާރުކުރައްވައިފިނަމަ އިޚްލާސްތެރި ބުރަ މަސައްކަތްތަކެއް ކުރާތަން ފެންނާނެ ކަމަށެވެ.
"ވަރަށް ވަރަށް ބޮޑު ހޭދައެއް ކުރަން އަޅުގަނޑުމެން ވާނީ ކަނޑައަޅާފައި. ސިޓީ އެއްގައި ހުންނަންޖެހޭ ފެންވަރުގައި، ދެ ޖިންސަށް ބޭނުންވާ ކުޅިވަރު ވަސީލަތްތައް ހިމެނޭ ސްޕޯޓްސް ކޮމްޕްލެކްސް އެއް މި ސިޓީގައި ޤާއިމްކުރެވިގެންދާނެ."
މުޢިއްޒު ވިދާޅުވިއެވެ.
ކޭލަކުނު އިކޯ ޓޫރިޒަމް ޕްރެޖެކްޓަކީ އެންވަޔަރަމަންޓް ދާއިރާއަށާއި ޓޫރިޒަމްދާއިރާއިން ވަރަށް ދުރަށް ވިސްނައިގެން ކުރިއަށް ގެންދާނެ ވަރަށް ބޮޑު އިންވެސްޓްމަންޓް ޕްރޮޖެކްޓެއް ކަމަށާއި، އޭގެ ސަބަބުން ވަޒީފާތައް އުފެދިގެންދާނެ ކަމަށާއި، އެތަނުގައި އިކޯޓޫރިޒަމް ފެސިލިޓީއެއް ޤާއިމްކޮށްދެއްވާނެ ކަމަށް މުއިއްޒު ވިދާޅުވިއެވެ.
" ޔޫއެސް ޑޮލަރު ނެގޭ ފަދަ އޭޓީއެމް ފެސިލީޓިއެއް ޤާއިމްކޮށްދޭނަން. މިއީ މީގެ ކުރިން އަޅުގަނޑު ދަންނަވާފައި ނުވާ ވާހަކައެއް."
މުއިއްޒު ވިދާޅުވިއެވެ.
ސަރުކާރުގެ ކަމާއި ބެހޭ ކުންފުނި މެދުވެރިކޮށް ޕޯޓު ގެ ފެންވަރު ރަނގަޅުކޮށް ނަފާ ހޯދޭނެ ސްލިޕްވޭ އަކާއި އެކު ތަރައްޤީކުރާނެ ކަމަށާއި، ވޭސްޓް މެނޭޖްމަންޓްގެ ރަނގަޅު ފެންވަރުގެ ސެޓަޕެއް ހަދައި ރަނގަޅަށް އެކަން ކުރެވޭނެ ގޮތް ހަދައިދެއްވާނެ ކަމަށްވެސް މުއިއްޒު ވިދާޅުވިއެވެ.
