އެމްއާރުއެމްގެ އެކްސްކޯރގެ ގިނަ މެމްބަރުންގެ ތާއީދު ޑރ. މުއިއްޒަށް

އެމްއާރުއެމްގެ އެކްސްކޯރގެ ގިނަ މެމްބަރުންގެ ތާޢީދު، ރިޔާސީ އިންތިޚާބުގެ ދެވަނަ ބުރުގައި ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒަށް ކޮށްފިއެވެ.

މިއަދު ހަވީރު ގަލޮޅު ކަންމަތީގައި އޮތް ޚާއްސަ ހަފްލާފައި މުއިއްޒަށް ތާއީދު ކުރެއްވި ބޭފުޅުންގެ ތެރޭގައި މިސަރުކާރުގެ ސްޓޭޓް މިނިސްޓަރ ކަމާއި ޑެޕިޔުޓީ މިނިސްޓަރގެ މަޤާމާއި އަދި އިސް އެހެން މަޤާމުތައް ފުރުއްވަމުންދާ ބޭފުޅުންވެސް ހިމެނެއެވެ. އަދި މިއަދު މުއިއްޒުގެ ކެމްޕެއިނާ ގުޅުނު ގިނަ ބޭފުޅުންނަކީ އެމްއާރުއެމްގެ ކައުންސިލްގައި ހިމެނޭ ނިމިދިޔަ އިންތިޚާބުގައި ފާރިސްގެ ކެމްޕޭންގައި އެންމެ އިސްކޮށް އުޅުއްވި ބޭފުޅުންނެވެ.

އޭގެތެރޭގައި އަމިއްލަ ގޮތުން ވާދަކުރެއްވި އެމްއާރްއެމްގެ ރައީސް އަހްމަދު ފާރިސް މައުމޫންގެ އިންތިހާބީ އެޖެންޓް އަދި މި ސަރުކާރުގެ ކުރީގެ ޑެޕިޔުޓީ މިނިސްޓަރ އިސްމާއިލް ޒަބީހްއާއި، ފާރިސްގެ ކެމްޕެއިން މެނޭޖަރ އަދި ޔޫތު މިނިސްޓްރީގެ ޑެޕިޔުޓީ މިނިސްޓަރ ޝިމާޒު ޢަލީ ހިމެނެއެވެ.

އެމްއާރުއެމްއިން މުއިއްޒު އެންޑޯޒް ކުރެއްވި ބޭފުޅުން:

• ކުރީގެ ޑެޕިޔުޓީ މިނިސްޓަރ އިސްމާއިލް ޒަބީހު، އެމްއާރުއެމް ކައުންސިލް މެމްބަރު
• ޔޫތު މިނިސްޓްރީގެ ޑެޕިޔުޓީ މިނިސްޓަރ ޝިމާޒު އަލީ، އެމްއާރުއެމް ކައުންސިލް މެމްބަރު
• ޔޫތު މިނިސްޓްރީގެ ޑެޕިޔުޓީ މިނިސްޓަރ އަބްދުﷲ އަނީސް، އެމްއާރުއެމް ކައުންސިލް މެމްބަރު
• އެންވައިރުމަންޓް މިނިސްޓްރީގެ ޑެޕިޔުޓީ މިނިސްޓަރ އަޙްމަދު ޒިޔާން، އެމްއާރުއެމް ކައުންސިލް މެމްބަރު
• ސީނިއާ އެގްޒެކެޓުވް ޑިރެކްޓަރ ޢަލީ ޠާއިފް، އެމްއާރުއެމް ކައުންސިލް މެމްބަރު
• އަޙްމަދު އިބްރާހީމް، އެމްއާރުއެމް ކައުންސިލް މެމްބަރު
• އިސްމާއިލް ރައޫފް، އެމްއާރުއެމް ކައުންސިލް މެމްބަރު
• އަޙްމަދު އަފްޒަލް، އެމްއާރުއެމްގެ މެންބަރެއް
• ޒާން އަޙްމަދު ނިޔާޒު، އެމްއާރުއެމްގެ ސަޕޯޓަރެއް

އެމްއާރުއެމްގެ ރައީސް، އަމިއްލަ ގޮތުން ވާދަކުރެއްވި އަޙްމަދު ފާރިސް މައުމޫން ނިންމާފައިވަނީ ރިިޔާސީ އިންތިޚާބުގެ ދެވަނަ ބުރުގައި އެއްވެސް ކެންޑިޑޭޓަކަށް ތާއީދު ނުކުރުމަށެވެ.

ނަމަވެސް، ފާރިސްއަށް ތާއީދުކުރާ އެޕާޓީގެ ގިނަ ބޭފުޅުންގެ ތާއީދު ވަނީ މުއިއްޒަށް މިހާރު ލިބިގެން ގޮސްފައެވެ.

އެމްއާރުއެމްގެ އިތުރުން ޖުމްހޫރީ ޕާޓީއަށް ނިސްބަތްވާ ގިނަ ބޭފުޅުންތަކެއްވެސް ވަނީ ރޭ ޑރ. މުއިއްޒަސް ތާއީދުކޮށް ޕީޕީއެމްއަށް ސޮއި ކޮށްފައެވެ. އަދި ޑިމޮކްރެޓްސްގެ މެންބަރުންވެސް ދަނީ މުޢިއްޒުއަށް ތާޢީދު ކުރަމުންނެވެ.