އެގްރޯނެޓްގެ ކުރީގެ މެނޭޖިން ޑިރެކްޓަރު އަދި އެމްޑީޕީގެ އިސް ސަފުގައި އުޅުއްވި ހާރޫން ރަޝީދާއިއެކު އެމްޑީޕީގެ 100 އަށްވުރެ ގިނަ މެންބަރުން ޕީޕީީއެމަށް ސޮއިކުރައްވައިފިއެވެ.
އެ ފަރާތްތައް ޕީޕީއެމްއާއި ގުޅިވަޑައިގެންނެވީ ރިޔާސީ އިންތިހާބުގެ ދެވަނަ ބުރަށް މިހާރު އިދިކޮޅު ކެނޑިޑޭޓް ޑރ. މުހައްމަދު މުއިއްޒު ކުރައްވަމުން ގެންދަވާ ދަތުރުފުޅުގައި މިއަދު ވިލިނގިއްޔަށް ވަޑައިގަތުމުންނެވެ.
އެ ޖަލްސާގައި އެ ރަށުގައި އެމްޑީޕީގެ އިސް ސަފުގައި ހަރަކާތްތެރިވާ ގިނަ ބަޔަކު ވަނީ ޕީޕީއެމްއަށް ސޮއިކޮށް އެ ފޯމުތައް ޕްރޮގްރެސިވް ކޮންގްރެސް ކޯލިޝަން ހިންގެވުމާ ހުންނެވި އަބްދުއްރަޙީމް އަބްދުﷲގެ އިތުރުން މުއިއްޒުއާ ވަނީ ހަވާލުކުރައްވާފައެވެ.
މިއަދު ޕީޕީއެމްއާ ގުޅިވަޑައިގެންނެވި އިތުރު ބޭފުޅުންނަކީ ވިލިނގިލީގެ ހޮސްޕިޓަލުގެ ކުރީގެ މެނޭޖިން ޑިރެކްޓަރު އަދި މިހާރުގެ ޖެންޑާ މިނިސްޓްރީގެ ސީނިއާ އެގްޒެކްޓިވް ޝަރީފް އަހްމަދު، ވިލިނގިލި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ނައިބު ރައިސާ ރިފާއަތު ރަޝީދެވެ.
ހަމައެެހެންމެ ފެނަކައިގައި ވަޒީފާ އަދާކުރާ ގިނަ ބަޔަކާއި، ކޫއްޑޫ މަސް ކުނީގެ މުވައްޒަފުންނާއި، އެއާޕޯޓް މަސައްކަތްތެރިންނާއި، ރިސޯޓް މުވައްޒަފުންގެ އިތުރުން ވިލިގިނލީގެ ގިނަ ޒުވާނުންތަކެއް މިއަދު ވަނީ ޕީޕީއެމްއާ ގުޅިފައެވެ.
