މިޤައުމުގައި އިންޑިޔާ ސިފައިން ނެތްކަމަށް ބުނެ މި ސަރުކާރުން ހަދަނީ ރޯ ބުހުތާނު ދޮގު: އެމްޑީއޭ

މިޤައުމުގައި އިންޑިޔާ ސިފައިން ނެތްކަމަށް ބުނެ މި ސަރުކާރުން ހަދަނީ ރޯ ބުހުތާނު ދޮގު ކަމަށް، އެމްޑީޕީއާއެކު ހެދުމަށްފަހު ރޭގެ ވަގުތެއްގައި ކޯލިޝަނާ ދުރައްޖެހުނު އެމްޑީއޭ އިން ވިދާޅުވެއްޖެއެވެ.

ދ. މީދޫ ދާއިރާގެ މެންބަރު އަޙްމަދު ސިޔާމް މުޙައްމަދުގެ ލީޑަރކަމުގެ ދަށުން ހިންގާ އެމްޑީއޭއިން މިހެން ވިދާޅުވެފައިވަނީ، "ސަންސިޔާމް 2023″ ޓްވިޓަރ އެކައުންޓުން ކުރެއްވި ޓްވީޓެއްގައެވެ.

އެ ޕާޓީން ވިދާޅުވެފައިވަނީ، މިޤައުމުގައި އިންޑިޔާ ސިފައިން ނެތްކަމަށް ބުނެ މި ސަރުކާރުން ހަދަނީ ރޯ ބުހުތާނު ދޮގު ކަމަށާއި، މި ޤައުމުގެ މިނިވަންކަން އަޅުގަނޑުމެންނަށް މާ މުހިއްމު ކަމަށެވެ.

އެ ޕާޓީން އިތުރަށް ވިދާޅުވީ، ދިވެހީންގެ ރާއްޖެ އަނބުރާ ހޯދުމަކީ، ދިވެހި ކޮންމެ ރައްޔިތަކަށްމެ މިއަދު ޤައުމީ ވާޖިބެއް ކަމަށެވެ.

"މިޤައުމުގައި އިންޑިޔާ ސިފައިން ނެތްކަމަށް ބުނެ މި ސަރުކާރުން ހަދަނީ ރޯ ބުހުތާނު ދޮގު. މި ޤައުމުގެ މިނިވަންކަން އަޅުގަނޑުމެންނަށް މާ މުހިއްމު. ދިވެހީންގެ ރާއްޖެ އަނބުރާ ހޯދުމަކީ، ދިވެހި ކޮންމެ ރައްޔިތަކަށްމެ މިއަދު ޤައުމީ ވާޖިބެއް!"

އެމްޑީއޭ އިން ހިންގާ "ސަންސިޔާމް 2023″ ޓްވިޓަރ އެކައުންޓްގައި ލިޔުއްވާފައިވެއެވެ.

މިފަދައިން ވިދާޅުވެފައިވާއިރު، އެމްޑީއޭއިން އެމްޑީޕީ ކޯލިޝަނާ ދުރައްޖެހުމުން އެކަމަށް އިޝާރަތްކުރައްވައި، އައްޑޫއަށް ކުރައްވާފައިވާ ދަތުރުފުޅުގެ ތެރެއިން ރައީސް ޞާލިޙް ވިދާޅުވީ، ފުރަތަމަ ބުރުގައި އެ ޕާޓީއާއިއެކު ތިބި ބައެއް ފަރާތްތަކުން ދުރަށް ޖެހުމުން ބައެއް ބޭފުޅުން މާޔޫސްވެފައި ތިބި ކަމަށާއި، އެމްޑީއޭ އިން އެ ޕާޓީ ދޫކޮށް ދިޔަނަމަވެސް އެކަމާ ކަންބޮޑުނުވުމަށެވެ.

" އަޅުގަނޑުމެންނަށް އެނގޭ އެ ބޭފުޅުން އަޅުގަނޑުމެންނަށް ކުރީ ބުރުގައި ކޮށްދެއްވި މަސައްކަތްތައް. އެކަމަށް ޝުކުރު ވެސް އަދާކުރަން. އެ ބޭފުޅުންނަށް ހެޔޮ ރަނގަޅު މުސްތަގްބަލަކަށް ވެސް އެދެން."

ރައީސް ވިދާޅުވިއެވެ.

ރައީސް ޞާލިޙް މިހެން ވިދާޅުވިއިރު، އެމްޑީއޭ އިން ރޭ ބޭއްވި ކައުންސިލް ބައްދަލުވުމުގައި ވަނީ އެމްޑީޕީއާ އެކުގައި އެމްޑީއޭ އިން ހެދި ކޯލިޝަން ރޫޅާލައި، ރިޔާސީ އިންތިހާބުގެ ދެވަނަ ބުރުގައި މުއިއްޒަށް ތާއީދު ކުރަން ފާސްކޮށްފައެވެ.

ރައީސް ޞާލިޙް އިތުރަށް ވިދާޅުވީ، އެމްޑީޕީގެ އުންމީދުތައް ވަރަށް ފޮނި ކަމަށާއި ވަރަށް އުޖާލާ ކަމަށާއި، އަދި އެމްޑީއޭއިން އެ ނިންމެވުން އެއީ ރަނގަޅު ނިންމެއް ނޫންކަން ލަސްތަކެއް ނުވެ ފެންނިގެންދާނެ ކަމަށެވެ.

"ދިވެހިންގެ ތެރޭގައި ބުނެއުޅޭ މުހާވަރާ ބަހެއް އޮވޭ އަންނަ އެއްޗެހިގެ ތެރޭގައި ދާ އެއްޗެހި ހުންނާނެއޭ ކޮންމެވެސް ވަރަކަށް. އެެހެންވީމަ އެކަހަލަ ކަންތައް ދިމާވާނެ."

ރައީސް ވިދާޅުވިއެވެ.

އެކަމާ ކަންބޮޑުނުވެ ކުރިއަށް ވަޑައިގަތުމަށް އެދިވަޑައިގަންނަވަމުން،  އެމްޑީޕީ އަށް ކާމިޔާބު ލިބޭނެ ކަމަށް ރައީސް ޞާލިޙް ވިދާޅުވިއެވެ.

އަންނަ ހޮނިހިރު ދުވަހު އޮންނަ ރިޔާސީ އިންތިހާބުގެ ދެވަނަ ބުުރުގައި އިދިކޮޅު ޕީޕީއެމް ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒަށް ތާއީދު ކުރަން، މަޝްހޫރު ވިޔަފާރިވެރިޔާ ސަންޓްރެވެލް ޝިޔާމް ލީޑަރުކަމުގެ ދަށުން ހިންގަވާ މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ) ގެ ކައުންސިލުން ރޭ ވަނީ ނިންމަވާފައެވެ.

ދ. މީދޫ ދާއިރާގެ މަޖިލިސް މެންބަރު ކަންވެސް ކުރައްވާ އަޙްމަދު ސިޔާމް މުޙައްމަދު ހިންގަވާ އެމްޑީއޭ އިން އެގޮތަށް ނިންމާފައި ވަނީ ދެންމެ އެ ޕާޓީގެ ކައުންސިލްގައި ނެގި ވޯޓެއްގައެވެ. އެމްޑީއޭ ކައުންސިލަށް އެކަން ހުށަހެޅުއްވީ އެ ޕާޓީގެ ކައުންސިލް މެމްބަރު މުހައްމަދު އައްބާސްއެވެ. އެކަމަށް ތާއީދު ކުރެއްވީ، ދާދި ފަހަކާ ޖެެހެންދެން ފޫހިކަމާއެކު އެމްޑީޕީގެ ކެމްޕެއިން ޖަލްސާތަކުގައި ބައިވެރިވި އެމްޑީއޭގެ ނައިބު ރައީސް ޢަލީ މައުރޫފެވެ.

މުޙައްމަދު އައްބާސް ވަނީ މީގެ ދެދުވަސް ކުރިން އޭނާ އަމިއްލަފުޅަށްވެސް، އެމްޑީޕީގެ ރިޔާސީ ކެންޑިޑޭޓަށްް ދެވަނަ ބުރުގައި ތާޢީދު ނުކުރައްވާނެ ކަމަށް ވިދާޅުވެފައެވެ.

ވެލިދޫއަށް އުފަން ވިޔަފާރި ވެރިއެއްކަމަށްވާ މުޙައްމަދު އައްބާސްގެ  ހުށަހެޅުމުގައި ވަނީ ހޮނިހިރު ދުވަހު އޮންނަ ރިޔާސީ އިންތިހާބުގެ ދެވަނަ ބުރުގައި އެމްޑީޕީއާ އެކު ވެފައިވާ ކޯލިޝަން ރޫޅާލައި އިދިކޮޅު ކެންޑިޑޭޓު މުއިއްޒަށް ތާއީދުކޮށް ކޯލިޝަން ހެދުމަށް ހުށަހެޅުމަށެވެ.

އެމްޑީއޭގެ ރައީސް އަދި ރައްޔިތުންގެ މަޖިލިހުގެ ދ. މީދޫ ދާއިރާގެ މެމްބަރު އަހުމަދު ސިޔާމް މުހައްމަދު ރިޔާސަތު ބެލެހެއްޓެވި ބައްދަލުވުމުގައި އެގޮތަށް ފާސްވީ އެމްޑީއޭ ކައުންސިލް ބައްދަލުވުމުގައި ބައިވެރިވެވަޑައިގެންނެވި 35 މެމްބަރުންގެ ތެރެއިން 33 މެމްބަރުންގެ ވޯޓުންނެވެ. އެ ހުށަހެޅުމާ ދެކޮޅަށް އަދި ރައީސް އިބްރާހިމް މުހައްމަދު ޞާލިހަށް ތާއީދުކޮށް ވޯޓު ދެއްވާފައި ވަނީ އެންމެ ދެ މެމްބަރުންނެވެ.

ވަރަށް ތަނަވަސް އަޣްލަބިއްޔަތަކުން، މިކަން ފާސްވުމުން، ޕީޕީއެމް ޕީއެންސީގެ ރިޔާސީ ކެންޑިޑޭޓުގެ ކެމްޕެއިނާ ވަރަށް އަވަހަށް އެމްޑީއޭއިން ގުޅިވަޑައިގަންނަވާނެ ކަމަށް ބެލެވެއެވެ.