ރިޔާސީ އިންތިޚާބުގައި ވާދަކުރައްވާ އިދިކޮޅު ޕީޕީއެމް ޕީއެންސީ ކޯލިޝަންގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުގެ ދެކަނބަލުން ދިރިއުޅުއްވަމުން ގެންދެވި ގޭގައި ގެންގުޅުއްވި މެއިޑް ދަންޖެހިގެން މަރުވީ ކިހިނެއްވެގެން ކަން ފުލުހުންގެ ތަހްޤީޤަށް އެނގޭނެ ކަމަށް މުޢިއްޒުގެ އަނބިކަނބަލުން ސާޖިދާ މުހައްމަދު ވިދާޅުވެއްޖެއެވެ.
އެކަމަނާ މިހެން ވިދާޅުވީ، ޑރ. މުއިއްޒާއި ސާޖިދު ދިރިއުޅުއްވަމުން ގެންދެވި ގޭގައި މަސައްކަތް ކުރަމުން ދިޔަ ބިދޭސީ އަންހެން މީހާގެ މަރާއި ގުޅޭގޮތުން ދައްްކަމުންދާ ވާހަކަތަކާ ގުޅިގެން ދ. މީދޫގައި ކެމްޕެއިން އިވެންޓެއްގައި ދެއްކެވި ވާހަކަފުޅުގައެވެ.
ސާޖިދާ އިއްޔެ ވިދާޅުވީ، މެއިޑެއްގެ ވާހަކަ ދެކެވޭ ކަމަށާއި، މުއިއްޒާއި ގާތް ބޭފުޅުންނަށް މުއިއްޒަކީ އަންހެނަކަށް އިސް އުުފުލާ ބަލައިލާ މީހެއް ނޫން ކަން އެނގޭނެ ކަމަށާއި ވަކި ހިސާބަކަށް ދިޔުމުން އެއްޗެއް ދަންނަވަން މަޖުބޫރުވެއްޖެ ކަމަށެވެ.
" މަރާލި ވާހަކަ އާާއި ޒިނޭގެ ތުހުމަތު ބޮލުގައި އެޅުވުމާއި، މީހެއްގެ މިސާލަކަށް އަބުރު ކަތިލުމުގައިވެސް ހައްދެއް އޮންނާނެ. މި ލެވެލްއަށް ދިޔައީމަ ހަގީގަތުގައި މިއީ ވަރަށް ދެރަ ކަމެއް. މިކަހަލަ ގޯސް ވާހަކަތަކެއް މި ދެކެވެނީ".
ސާޖިދާ އިތުރަށް ވިދާޅުވީ، ފުލުހުންގެ ތަހްޤީޤަށް އެ މެއިޑް އަސްލު ދަން ޖެހިގެން މަރުވި ސަބަބު އެނގޭނެ ކަަމަށާއި، އެބޭފުޅާގެ ފިރިމީހާ ނިދީގެސް އެގޭގައި ކަމަށާއި އަދި އޭނާގެ ފިރިމީހާ އުޅުނީވެސް އެގޭގައި ކަމަށެވެ.
ސާޖިދާ ވިދާޅުވީ، މިފަދަ ކަމެއްގައި މިހާ ބޮޑު ދޮގުތަކެއް ހަދަމުން ދާތީ އެ ވާހަކަ ދައްކަން ބޭނުންވީ ކަމަށާއި، އެކަހަލަ ޙަޤީޤަތެއް ނެތް ވާހަކަތައް ދެކެވެމުންދާތީ ވަރަށް ހިތްދަތިވާ ކަމަށެވެ.
