ބަދަލު ހިފުމުގެ ރޫޙް ތާއަބަދަށް ރައްޔިތުންގެ ތެރެއިން ނެތިގެން ދާން ޖެހޭ ކަމަށާއި އެނޫން ހަމައަކުން ޤައުމަށް ހަމަޖެހުން ނާންނާނެ ކަމަށް، އިންތިހާބީ ރައީސް، ޑރ. މުޙައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، މިދިޔަ ހޮނިހިރު ދުވަހު ބޭއްވި އިންތިޚާބުން ލިބުނު ކާމިޔާބީ ފާހަގަ ކުރުމަށް ދިވެހި ރައްޔިތުންނާއި ބައްދަލު ކުރެއްވުމަށް ސޯޝަލް ސެންޓަރުގައި ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
https://x.com/ProgressPartyMV/status/1708882910412222841?s=20
މުއިއްޒު ވިދާޅުވީ، ބަދަލު ހިފުމުގެ ރޫހު ތާއަބަދަށް ރައްޔިތުންގެ ތެރެއިން ނެތިގެން ދާން ޖެހޭ ކަމަށާއި އެނޫން ހަމައަކުން ޤައުމަށް ހަމަޖެހުން ނާންނާނެ ކަމަށެވެ.
ސޯޝަލް ސެންޓަރުގައި މިރޭ ބޭއްވި ރަސްމިއްޔާތުގެ ތެރެއިން
ވެރިކަންކުރުމުގެ ފުރުޞަތު ދެއްވުމަށް އެދިވަޑައިގަންނަވަމުން، އަދުލުވެރި ވެރިކަމެއް ރައްޔިތުންނަށް ކޮށްދޭނެ ކަމަށާއި އިންސާފުވެރިކަމާއި ހަމަހަމަކަމާއި އެކީ ރައްޔިތުންނަށް ހިދުމަތް ކުރާނެ ކަމަށް މުއިއްޒު ވިދާޅުވިއެވެ
އެމަނިކުފާނުގެ އަޒުމަކީ ޤައުމީ މަސްލަހަތު ހިމާޔަތް ކުރުން ކަމަށާއި، އަމިއްލަ މަސްލަހަތު އިސްނުކޮށް، ޤައުމީ މަސްލަހަތު އިސްކުރުމަށް މުއިއްޒު އިލްތިމާސްކުރެއްވިއެވެ.
"އަދުލުވެރި ވެރިކަމެއް އިރާދަ ކުރެއްވިއްޔާ ރައްޔިތުންނަށް ކޮށްދޭނަން. އިންސާފުވެރިކަމާއި އެކީ ހަމަހަމަކަމާއި އެކީ ރައްޔިތުންނަށް ހިދުމަތް ކުރާނަން. އެއީ އަޅުގަނޑުވީ ވައުދަކީ. އެ ވައުދު މަތީ އިރުއަރާ ކޮންމެ ދުވަހަކު އަޅުގަނޑު ސާބިތުވެ ހުންނާނެ ވާހަކަ ދަންނަވަން"
މުއިއްޒު ވިދާޅުވިއެވެ.
އިންތިޚާބުން ރައްޔިތުން ދެއްކީ ގައުމުގެ ކުރިމަގު ބިނާ ކުރުމަށް ނަތީޖާ ނެރެދޭނެ ސަރުކާރެއް ބޭނުންވާކަން ކަމަށާއި ވެއްޓިފައިވާ އަނދަވަޅުން އިގްތިޞާދު ނަގައި ކޮޅަށް ޖަހުމުގައި އެކަން ކުރެވޭނެ ފަރާތަކާއި ހަވާލު ކުރަން ބޭނުންވާ ކަން ކަމަށާއި، އެހެންކަމުން ރައްޔިތުން ބޭނުންވާ ގޮތަށް އެކަންކަން ކޮށްދެއްވާނެ ކަމުގެ ޔަގީންކަން މުއިއްޒު ވަނީ އަރުވާފައެވެ.
މުއިއްޒު ވަނީ ރާއްޖެއަށް ކުރިމަތިވެފައިވާ ނާޒުކު ދަނޑިވަޅުގައި މުސްތަގުބަލު އުޖާލާ ކުރުމަށާއި ދަރިންގެ ޙައްޤުގައި މިނިވަންކަން ޔަގީން ކުރުމަށްޓަކައި ރައްޔިތުން ކުރެއްވި ޤައުމި މަސައްކަތަށް ހިތުގެ ފުންމިނުން ޝުކުރު ދަންނަވާފައެވެ. އެމަނިކުފާނުގެ ޝުކުރުގައި އެމަނިކުފާނާއި ހިޔާލު ތަފާތުވެ، ވޯޓު ނުދެއްވާ ތިއްބެވި ބޭފުޅުން ވެސް ހިމެނެއްވިއެވެ. އެގޮތުން މުއިއްޒު ވިދާޅުވީ، އެބޭފުޅުންނަކީ ވެސް ދިވެހިން ރައްޔިތުން ކަމަށާއި، އެބޭފުޅުން ވެސް ތަފާތު ނުކޮށް، ހަމަހަމަކަމާއި އެކީ އެބޭފުޅުންނާއި މެދު ވެސް ކަންތައް ކޮށްދެއްވާނެ ކަމަށެވެ.
