އިންތިޚާބީ ނައިބު ރައީސް އަލްއުސްތާޒް ޙުސައިން ޢަބްދުލް ލަޠީފް ޕީއެންސީއަށް ސޮއިކުރެއްވި، އިލެކްޝަންސް ކޮމިޝަނަށް ކެންޑިޑެސީ ފޯމް ހުށަހެޅުއްވުމުގެ ކުރިންކަމަށް ޕީޕީއެމްގެ ޗީފް ސްޕޯކްސްޕާސަން ހީނާ ވަލީދު ވިދާޅުވެއްޖެއެވެ.
އެކްސްގައި ޙިއްސާ ކުރެއްވި ޕޯސްޓެއްގައި، ހީނާ މިހެން ވިދާޅުވީ، އިންތިހާބީ ނައިބު ރައީސް، ފަރެސްމާތޮޑާ ދާއިރާގެ މެންބަރު ޙުސައިން މުޙައްމަދު ލަތީފް (ސެމްބެެ) ޕީޕީއެމް ދޫކުރައްވައި، ޕީއެންސީ އަށް ސޮއިކުރައްވައިފައިވާ ކަން ރަސްމީކޮށް ރައްޔިތުންގެ މަޖިލީހުގެ އިދާރާ އަށް އަންގައިފި ކަމަށް އިއްޔެގެ ރައްޔިތުންގެ މަޖިލީހުގެ ޖަލްސާގައި ރިޔާސަތުން އިޢުލާންކުރެއްވުމާ ގުޅިގެން، ބައެއް ފަރާތްތަކުން އެ ވާހަކަ "ޓްވިސްޓް" ކޮށްގެން ފަތުރަމުންދާތީއެވެ.
"ޕްރެޒިޑެންޓް އިލެކްޓް ޙުސައިން ޢަބްދުލްލަޠީފް ސޮއިކުރެއްވީ އިއްޔެއަކު ނޫން. އިލެކްޝަންސް ކޮމިޝަނަށް ކެންޑިޑެސީ ފޯމް ހުށަހެޅުއްވީވެސް ޕީއެންސީއަށް ސޮއިކުރައްވާފަ. ރައްޔިތުންގެ މަޖިލިސްއިން އިއްޔެ އެކަން އިޢުލާން ކުރީ މަޖިލިސްއަށް އެކަން އެންގުމުން."
ހީނާ ވިދާޅުވިއެވެ.
ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާ ފައްޓަވަމުން ރިޔާސަތުން، މަޖިލީހުގެ ރައީސް މުހައްމަދު ނަޝީދު ވިދާޅުވީ އިންތިޚާބުވެފައިވާ ނާއިބްރައީސް ޕާޓީ ބަދަލުކުރައްވާ ރިޔާސީ އިންތިޚާބުގައި ބައިވެރިވެވަޑައިގެންނެވި ކަމަށެވެ. ޕާޓީ ބަދަލުކުރައްވަމުން މަޖިލީހަށް ކަރުދާސް ޑޮކިއުމެންޓް ހުށަހަޅުއްވާފައިވާ ކަމަށާއި، އިލެކްޝަންސް ކޮމިޝަނުން ވެސް ލިޔެކިޔުންތައް މަޖިލީހަށް ހުށަހަޅާފައިވާ ކަމަށެވެ.
ޕީއެންސީގެ އަސާސީ ގަވާއިދުގައިވާ ގޮތުން އެ ޕާޓީގެ ނަމުގައި ރިޔާސީ އިންތިހާބަށް ވާދަކުރެވޭނީ ޕީއެންސީގެ މެމްބަރަކަށެވެ. އެހެންވެ، މި ފަހަރުގެ ރިޔާސީ އިންތިހާބުގައި ވާދަކުރައްވަން، ޕީޕީއެމްގެ އޭރުގެ ނައިބު ރައީސް ޑރ. މުހައްމަދު މުއިއްޒު ވެސް ޕީއެންސީއާ ގުޅިވަޑައިގަތީއެވެ.
މަޖިލީހުގެ މެމްބަރުން ނިސްބަތްވާ ގޮތް:
ދިވެހިރައްޔިތުންގެ ޑިމޮކްރަޓިކް ޕާޓީ (އެމްޑީޕީ) – 56
ދަ ޑިމޮކްރެޓްސް – 13
ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) – 4
ޕީޕަލްސް ނެޝަނަލް ކޮންގްރެސް (ޕީއެންސީ) – 4
މޯލްޑިވްސް ނެޝަނަލް ޕާޓީ (އެމްއެންޕީ) – 3
މޯލްޑިވްސް ޑިވަލަޕްމަންޓް އެލަޔަންސް (އެމްޑީއޭ) – 2
ޖުމްހޫރީ ޕާޓީ (ޖޭޕީ) – 2
ވަކި ޕާޓީއަށް ނިސްބަތްނުވާ މެންބަރުން – 3
ޑރ. މުޢިއްޒާއި އޭނާގެ ރަނިންމޭޓް ހުސައިން މުހައްމަދު ލަތީފް އިންތިހާބު ކާމިޔާބު ކުރެއްވީ 129،159 ވޯޓުންނެވެ. އެމްޑީޕީގެ ކެންޑިޑޭޓް ރައީސް އިބްރާހިމް މުހައްމަދު ސޯލިހަށް ހޯއްދެވުނީ 109،868 ވޯޓެވެ.
