"އަދުރޭއަކީ ސިޔާސީ ފަންނުގެ މާހިރެއް، އެއީ ޤައުމު ދަސްކޮށްގެން ކުރެވޭ ކަމެއްް"

ވެރިކަން ކުރުމާއި ސިޔާސީ މަސައްކަތަކީ ވަކި ފަންނެއް ކަމަށާއި، އާ ސަރުކާރު ހަވާލުވުމުގެ މަސައްކަތުގެ ވެރިޔާ ޢަބްދުއްރަޙީމް (އަދުރޭ) އަކީ ސިޔާސީ ފަންނުގެ މާހިރެއް ކަމަށް ބުނެ، ސޯޝަލް މީޑިޔާ އެކްޓިވިސްޓް ޝައްމޫން ޖަލީލް (ލޫކަސް) އަދުރޭއަށް ތަޢުރީފުކުރައްވައިފިއެވެ.

ލޫކަސް ޖަލީލް މިއަދު ސޯޝަލް މީޑިޔާގައި ޙިއްސާ ކުރެއްވި ޕޯސްޓެއްގައި ބުނެފައި ވަނީ، ވެރިކަން ކުރުމާއި ސިޔާސީ މަސައްކަތަކީ ވަކި ފަންނެއް ކަމަށާއި، އާ ސަރުކާރު ހަވާލުވުމުގެ މަސައްކަތުގެ ވެރިޔާ ޢަބްދުއްރަޙީމް (އަދުރޭ) އަކީ ސިޔާސީ ފަންނުގެ މާހިރެއް ކަމަށާއި އެއީ ގައުމު ދަސްކޮށްގެން ކުރެވޭ ކަމެއް ކަމަށެވެ.

"ވެރިކަން ކުރުމާ ސިޔާސީ މަސައްކަތަކީ ވަކި ފަންނެއް. އާ ސަރުކާރު ހަވާލުވުމުގެ މަސައްކަތުގެ ވެރިޔާ @Banafsaaއަކީ ސިޔާސީ ފަންނުގެ މާހިރެއް. އެއީ ގައުމު ދަސްކޮށްގެން ކުރެވޭ ކަމެއް" ލޫކަސް ބުނެފައިވެއެވެ.

ލޫކަސް މިހެން ބުނެފައިވާއިރު، އަދުރޭ ވަނީ ސިޔާސީ މައިދާނުގައި އެތަކެއް ކާމިޔާބީތަކެއް ހޯއްދަވާފައެވެ. ފޮނަދޫ ދާއިރާގެ މެންބަރުކަން ކުރެއްވުމުގެ އިތުރުން އަދުރޭއަކީ ރަައީސް ޔާމީން ހިންގެވި ޕީއޭ އާއި އަދި ފަހުން ރައީސް މައުމޫން އުފެއްދެވި ޕީޕީއެމްގައިވެސް ލީޑަރޝިޕްގެ މަޤާމްތައް ފުުރުުއްވަމުން ގެންދަވި ހިންގުންތެރިއެވެ.

އަދި ރައީސް ޔާމީން އިސްކޮށް ހުންނަވާ ފަހުން އުފެއްދެވި ޕީއެންސީގެ ރައީސްކަމުގެ މަޤާމްވެސް ފުރުައްވަމުން ގެންދަވާ، އަދުރޭ ވަނީ ޕީޕީއެމް ޕީއެންސީ ކޯލިޝަންގެ އިސް ލީޑަރުގެ ޙައިސިއްޔަތުން ވޭތުވެދިޔަ ފަސްއަހަރުގެ ތެރޭގައިވެސް އަމަލީގޮތުން މަސައްކަތްކުރައްވާފައެވެ. ރައީސް ޔާމީން ޖަލުގައި ހުންނަވި ނަމަވެސް، އެ ކޯލިޝަން އެކަތިގަނޑެއްގެ ގޮތުގައި ދަމަހައްޓަވައި މެންބަރުން ޕާޓީއާއެކު ތިބުމަށް އެންމެ ބޮޑު ދައުރެއް އަދާކުރެއްވީވެސް އަދުރޭއެވެ.

އިންތިޚާބީ ރައީސް ޑރ، މުޙައްމަދު މުޢިއްޒުއަށް ޕީއެންސީގެ ޓިކެޓް ކަށަވަރުކޮށް، ވެރިކަން ލިބުމުގައި އެންމެ ބޮޑު ދައުރެއް އަދާކުރައްވާފައިވަނީ ޕީއެންސީގެ ރައީސް އަދުރޭއެވެ. ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ. މުޙައްމަދު މުޢިއްޒުއަށް އިންތިޚާބު ކާމިޔާބު ކޮށްދެއްވުމަށް އެންމެ ބުރަކޮށް މަސައްކަތްކޮށްދެއްވި އެއް ބޭފުޅަކީ، އެ ކޯލިޝަން ހިންގެވުމާ ޙަވާލުވެ ހުންނެވި ޢަބްދުއްރަޙީމް (އަދުރޭ) އެވެ.

ވެރިކަން ބަދަލު ކުރުމުގެ މަރުހަލާ ކުރިއަށް ގެންދިއުމަށްޓަކައި، އިންތިހާބީ ރައީސްގެ ފަރާތުން އެކުލަވާލާ އިންތިގާލީ ކޮމިޓީތަކުގެ ވެރިޔަކަށް ޕީއެންސީގެ ރައީސް އަބްދުއްރަހީމް (އަދުރޭ) ހަމަޖައްސައި، ސިވިލް ސާވިސް ކޮމިޝަނުން ވަނީ އަދުރޭ އެ މަޤާމަށް ރަސްމީކޮށް ހަމަޖައްސަވާފައެވެ. އަދި އިންތިޤާލީ މަރުޙަލާގެ މަސައްކަތްތައް ވަރަށް އަމާންކަމާއި އޮމާންކަމާއެކު އަދުރޭ ގެންދަވާ ކަމީ ޤަބޫލުކުރަންޖެހޭ ޙަޤީޤަތެކެވެ.