އިންޓަރނޭޝަނަލް އެއިޑް ކެމްޕެއިންއިން " އަހަރުމެން ފަލަސްތީން އާއި އެކު" މި ނަމުގައި ހުރިހާ މީޑިއާތަކާ ގުޅިގެން ޚާއްސަ ޓެލެތޯނެއް ބާއްވަން ހަމަޖައްސައިފިއެވެ.
އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ޖަމްޢިއްޔާގެ ވައިސް ޗެއަރމަން އާދަމް ނާއިފް ވިދާޅުވެފައިވަނީ، ޓެލެތޯން ފަށާނީ ހުކުރު ދުވަހު ކަމަށާއި، މި ޓެލެތޯން މި މަހުގެ 17 އާ ހިސާބަށް ކުރިއަށް ދާނެ ކަމަށެވެ.
މި ދަނޑިވަޅަކީ އެންމެން އެއްބައިވެގެން އެކީގަ މަސައްކަތް ކުރަން ޖެހިފައި އޮތް ދަނޑިވަޅެއް ކަމަށާއި، އެ ޖަމްޢިއްޔާގެ ތެރޭގައި ވަރަށް ބައިވަރު ހަރަކާތްތަކެއް ރޭވިފައި އެބަ ހުރި ކަމުގައި ވދާޅުވިއެވެ.
ހުކުރު ދުވަހުގެ 11 ޖަހާއިރުން ފެށިގެން މާލޭ ސަރަޙައްދުގެ ހުރިހާ މިސްކިއްތަކެއްގެ ބޭރުގައި ފަންޑު ފޮށިތައް ބެހެއްޓުމަށް ނިންމާފައިވާ ކަމަށް ވެސް އޭނާ ވިދާޅުވިއެވެ.
ހަމައެހެންމެ، ހުކުރު ދުވަހުގެ ހަވީރު އަންހެން ކަނބަލުންގެ އެއްވުމެއް އާޓިފިޝިއަލް ބީޗް ގައި އޮންނާނެ ކަމަށާއި، ހުރިހާ އަންހެން ކަނބަލުންވެސް މި އެއްވުމުގައި ބައިވެރިވުމަށްޓަކައި ކަޅު ކުލައިގެ އެއްޗެހި ތުރު ކުރައްވައިގެން ދިދަ ހިއްޕަވައިގެން ނިކުންނެވުމަށް އެދިލައްވައެވެ.
އޭނާ އިތުރަށް ވިދާޅުވީ ކަސްރަތު ކުރާ ޖަމްޢިއްޔާތަކާއި ޖިމް ތަކާއިވެސް ވާހަކަ ދައްކަމުން މިހާރު ދަނީ "ރަން" އެއް ބޭއްވުމަށް ކަމަށާއި، އަދި އޭގެ ތާރީޚެއް ފަހުން އިޢުލާނު ކުރާނެ ކަމަށާއި، ހޮނިހިރު ދުވަހުގެ ރޭ "ސައިލެންޓް ޕްރޮޓެސްޓް" އެއް އަންހެން ފިރިހެން ހިމެނޭ ގޮތައް ކުރިއަށް ގެންދެވޭނެ ކަމެވެ.
މި ވަގުތަކީ އަޅުގަނޑުމެން ހުރިހާ މުސްލިމުންވެސް ލޭ ހޫނުވެފައި ތިބި ވަގުތެއް ކަމަށާއި، ނަމަވެސް އެ ޖަމްޢިއްޔާއިން ބާއްވާ ހަރަކާތް ތަކުގައި ކެއްތެރިކަން އިސް ކުރެއްވުމަކީ ވަރަށް ބޮޑު އެދުމެއްކަމުގައި އެޖަމްޢިއްޔާއިން އެދެއެެވެ.
