ތަޙްޒީބު މުޖުތަމަޢުއެއް ބިނާކުރުމަށް ހުރިހާކަމެއްގައިވެސް ފަރުދީ ޒިންމާ އަދާކުރުމަށް ރައީސުލްޖުމްހޫރިއްޔާގެ ނައިބް ފައިޞަލް ނަޞީމް އިލްތިމާސްކުރައްވައިފިއެވެ.
އެމަނިކުފާނު މިފަދައިން ގޮވާލެއްވީ އިސްކަންދަރު ސްކޫލްގެ އެކި މަޤާމްތަކަށް ހޮވުނު ދަރިވަރުންނަށް ލިޔުން ހަވާލުކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވާ ދެއްކެވި ވާހަކަފުޅުގައެވެ.
ނައިބު ރައީސް ވަނީ ތަޙްޒީބު މުޖުތަމަޢުއެއް ބިނާކުރުމަށް ހުރިހާކަމެއްގައިވެސް ފަރުދީ ޒިންމާ އަދާކުރުމަށް އިލްތިމާސްކުރައްވާފައެވެ.
މި ރަސްމިއްޔާތުގައި ނައިބު ރައީސް ފައިޞަލް ނަޞީމް ވިދާޅުވީ ކޮންމެ މަޤާމެއްގައި މަސައްކަތް ކުރަމުންދާ މީހެއްނަމަވެސް، ޤައުމު ކުރިއަރުވާ ޚިދުމަތް ކުރުމުގެ ޒިންމާ އެމީހަކަށް އޮތްކަމަށެވެ. އެގޮތުން ޤައުމުގައި ހިނގާ ކަންތައްތައް ހައްލުކުރުމަށް ފައިދާވާނެގޮތަކަށް ވިސްނާ އެކަންކަން ހައްލުކުރުމުގެ ބައިވެރިއަކަށް ވާންޖެހޭކަމަށް ނައިބު ރައީސް ވިދާޅުވިއެވެ. އެހެންނޫންނަމަ ކިތަންމެ ގިނަ ވެރިކަމެއް ނިމިގެންދިޔަނަމަވެސް އެފަދަ ނޭދެވޭ ކަންތައްތަކަށް އެކަށީގެންވާ ހައްލެއް ނާންނާނެކަމަށް އެމަނިކުފާނު ވިދާޅުވިއެވެ.
މި ޖަލްސާގައި ދަރިވަރުންނާ މުޚާތަބުކުރައްވާ ނައިބު ރައީސް ވަނީ ކޮންމެ ކަހަލަ މާހައުލެއްގައި އުޅެންޖެހުނުނަމަވެސް ލީޑަރަކަށް ވާން ބޭނުންވާ ކުއްޖާ، ލީޑަރެއްގެ ކިބައިގައި ހުންނަ ސިފަތަކާ އެއްގޮތަށް ދިރިއުޅުމަށް ނަސޭހަތްތެރިވެވަޑައިގެންފައެވެ. އެގޮތުން ހުރިހާ ފިކުރެއްގެ ކުދިންނާ ގުޅިގެން މަސައްކަތް ކުރުމަށާއި، ހުރިހާ ކަމެއްގައިވެސް ކުދިން ޝާމިލްކުރުމަށާއި، އެންމެންނަށްވެސް ހިތްހެޔޮ ކުދިބަޔަކަށް ވުމަށް އެމަނިކުފާނު ނަސޭހަތްތެރިވެވަޑައިގެންނެވިއެވެ. ނައިބް ރައީސް ވިދާޅުވީ އަދުގެ ދަރިވަރުން އެންމެ ބޮޑު އިސްކަމެއް ދޭންވީ އެއްކަމަކީ ސްކޫލް ނިމުމުގެ ކުރިން ކޮންމެވެސް މަސައްކަތެއް ދަސްކުރުމަށްކަމަށެވެ.
ކޮންމެ މަޤާމެއްގައި ހުރިނަމަވެސް ޤައުމުގެ މައްސަލަތަކާއިމެދު ވިސްނާ، އެކަންތައްތައް ޙައްލުކުރުމުގެ ބައިވެރިއަކަށްވުމަށް ނައިބު ރައީސް އިލްތިމާސްކުރެއްވިއެވެ.
