ފަލަސްތީނުގެ ބިމަށް އަތްގަދަކޮށްގެން ތިބި ޔަހޫދީން މަސައްކަތް ކުރަނީ އެ ބިމުން މުސްލިމުންގެ ވަސްވެސް ފޮހެލުމަށްކަމަށާއި، ސުލައިމާނުގެފާނުގެ ބިނާ ހޯދުމުގެ ނަމުގައި މަސްޖިދުލް އަޤްޞާގެ ދަށުން ޔަހޫދީން ކޮންނަމުންދާ ބިންގަރާސްތަކަކީ ނުރައްކާތެރި ޖަރީމާއެއް ކަމަށް މިއަދުގެ ހުކުތު ހުތުބާގައި ބުނެފި އެވެ.
“ފަލަސްތީނާއި އިސްލާމީ އުއްމަތް” މި މައުޟޫއަށް މިއަދު ދިން ހުކުރު ހުތުބާގައި ބުނީ، ޔަހޫދީން މިހާރު އެ ފެށީ މަސްޖިދުލް އަގްސާ ބިމާ ހަމަކޮށްލުމުގެ މަޝްރޫއު ކަމަށާއި ދެން ފަށާނީ މައްކާއާއި މަދީނާގެ މާތްވެގެންވާ ދެ ހަރަމްފުޅު ނައްތައިލުމުގެ މަޝްރޫއު ކަމަށެވެ.
ފަލަސްތީނުގެ ބިމަކީ އެތައް ގޮތަކުން މުސްލިމުންނާ ގުޅި ލާމެހިފައިވާ ބިމެއް ކަމަށް ޚުތުބާގައި ބުނެފައިވެއެވެ.
އެގޮތުން އެއީ ﷲ ތައާލާ ބަރަކާތް ލައްވައި، މާތްކުރައްވާފައިވާ ބިމެއް ކަމަށާއި އެންމެ ގިނަ ނަބީ ބޭކަލުން އެ ބިމެއްގައި އުފަންވެވަޑައިގަތް އަދި އެތައް ނަބީ ބޭކަލުންނެއް ދިރިއުޅުއްވި ބިން ކަމަށް ބުންޏެވެ. އަދި އެއީ ކީރިތި ރަސޫލާއާއިގެން އެ ބިމަކަށް އިސްރާ ކުރެވުނު މުގައްދަސް ބިން ކަމަށާއި ކީރިތި ރަސޫލާ މަތިވެރިވެގެންވާ މިއުރާޖުގެ ދަތުރުފުޅު ފެއްޓެވީ އެ ބިމުގައި މަސްޖިދުލް އަގްސާއިން ކަމަށްވެސް ބުންޏެވެ.
ހުތުބާގައި ބުނީ، އެ ދަތުރުފުޅުގައި އެންމެހައި ނަބީ ބޭކަލުންނާއިގެން ކީރިތި ރަސޫލާ މަސްޖިދުލް އަގްސާގައި ނަމާދު ކުރެއްވި ކަމަށާއި އިސްރާއާއި މިއުރާޖުގެ އެ ދަތުރުފުޅުން މުސްލިމުންގެ ފުރަތަމަ ގިބުލަ އަލްމަސްޖިދުލް އަގްސާއާއި ދެވަނަ ގިބުލަ ކައުބަތުﷲ ގެފުޅާ ހުރި ގުޅުން އަންގައިދޭ ކަމަށެވެ.
ހުތުބާގައި ބުނީ، ފަލަސްތީނާއި ގުދުސަކީ، ޔަހޫދީންނަށް ދެއްވުމަށް، ﷲ ވައުދުވެވޮޑިގެންފައިވާ ބިމެއް ކަމަށް ދައުވާ ކުރާ ޔަހޫދީން ނަސްލު ނައްތާލުމުގެ ޝިއާރުގެ ދަށުން ފަލަސްތީނުގެ އަހުލުވެރިންނާ ދެކޮޅަށް ޖަރީމާތައް ހިންގަމުން އައީ އިންސާނީ ހައްގުތަކުގެ ޗެމްޕިއަނުން ކަމުގައި ދައުވާކުރާ ހުޅަނގާއި ދުނިޔޭގެ ދެފުށް ދެގޮތް ސިޔާސަތު ގެންގުޅޭ ބޮޑެތި ބާރުތަކުގެ ހިމާޔަތުގައި ތިބެގެން ކަމަށެވެ. އަދި ފަލަސްތީނުގެ ބިމުގައި ހައްދުފަހަނައަޅާފައިވާ ޓެރަރިސްޓް ދައުލަތެއް އުފައްދައިދިނުމުގައި އެންމެ އިސް ދައުރެއް އަދާކުރީ ހުޅަނގާއި ދުނިޔޭގެ ބޮޑެތި ބާރުތައް ކަމަށްވެސް ބުންޏެވެ.
އެކަމުގެ ޙަޤީޤީ ބޭނުމަކީ އެ ނަމުގައި މަސްޖިދުލް އަގްސާގެ ދަށުގައި ފައްޅިތަކެއް އެޅުން ކަމަށާއި މިހާރު އެ ފެށީ މަސްޖިދުލް އަގްސާ ބިމާ ހަމަކޮށްލުމުގެ މަޝްރޫއު ކަމަށާއި ދެން ފަށާނީ މައްކާއާއި މަދީނާގެ މާތްވެގެންވާ ދެ ހަރަމްފުޅު ނައްތައިލުމުގެ މަޝްރޫއު ކަމަށް ހުތުބާގައި ބުންޏެވެ.
ހުތުބާގައި ބުނީ، އަދުއްވުންނާ ކުރެވުނު ހަނގުރާމަތަކުގައި މުސްލިމުންނަށް ނަސްރު ލިބިފައިވަނީ ހަނގުރާމަވެރިންގެ އަދަދާއި ވަސީލަތްތައް ގިނަވެގެން ނޫން ކަމަށާއި ނަމަވެސް އެބައިމީހުން ﷲ ތައާލާއަށް ބަރޯސާވެ، ވަކީލުކުރުމާއެކު ސަބަބުތަކުގައި ހިފައިގެން ކުރިއަށް ދިއުމުން ކަމަށެވެ.
އިސްލާމީ އުއްމަތަކީ އެއް އުއްމަތެއް ކަމާއި ހުރިހާ މުސްލިމުންނަކީ އުހުއްވަތްތެރި ބައެއްކަން ފާހަގަކޮށް ހުތުބާގައި ބުނީ މުސްލިމުންނަށް ކުރިމަތިވާ ކޮންމެ ދަތި ހާލަތެއްގައި އެ މީހުންނަށް އެހީތެރިވުމަކީ މުސްލިމް އުއްމަތުގެ ވާޖިބެއް ކަމަށެވެ.
ހުތުބާގައި ބުނީ ފަލަސްތީނުގެ ރައްޔިތުން ކުރެ، ގެދޮރު ގެއްލި، ހާލުގައި ޖެހިފައިވާ ހުވަފަތް އަންހެނުންނާއި ޅަދަރިންގެ ނުކުޅެދުންތެރިކަމާއި އެ މީހުންގެ ބޯމަތިން ކެނޑިނޭޅި އުދުހެމުންދާ ރެކޮޓުތަކުގެ ބިވެރިކަން އިހުސާސްކުރެވޭ ކޮންމެ މުސްލިމަކު، އެ މީހުންގެ ދިފާއުގައި ތެދުވަން ވެއްޖެ ކަމަށެވެ.
އެންމެ އަސާސީ ހައްގުތަކުން މަހުރޫމު ކުރެވި، އަނިޔާ ލިބި، އަމިއްލަ ބިން ފޭރިގަނެވިފައިވާ މުސްލިމުން އެބައިމީހުންގެ ހައްގުތައް ހޯދުމަށް މަސައްކަތް ކުރުމަކީ އިސްލާމީ ޝަރީއަތާއި ބައިނަލްއަގުވާމީ ގާނޫނުތަކުގައިވެސް އެބައިމީހުންނަށް ލިބިގެންވާ ހައްގެއް ކަމަށް ހުތުބާގައި ބުނެފައިވެއެވެ.
ކިޔުންތެރިންގެ ޚިޔާލުތައް:
މިލިޔުމުގައި ބޭނުންކޮށްފައި އެވަނި މަަސްޖިދުލް އަގުސާގެ ފޮޓޯއެއް ނޫން. މިކަމަށް ސަމާލުކަން ދިނުން އެދެން
Neygey ahannaka